الكەي مارعۇلان اتىنداعى پاۆلودار پەداگوگيكالىق ۋنيۆەرسيتەتى «IT Junior» حاكاتوننىڭ فينالدىق كەزەڭىن اياقتادى.
حاكاتوننىڭ ءبىرىنشى كەزەڭىنە وبلىستىڭ بارلىق ايماعىنان 54 كوماندا (167 قاتىسۋشى) قاتىستى. فينالعا وتكەن 23 كوماندا – 56 قاتىسۋشى ءوز جوبالارىن ۇسىنىپ، ايماقتاعى ەڭ ۇزدىك باعدارلاماشىلاردىڭ ءبىرى بولۋ قۇقىعىن ساراپقا سالدى.
زياتكەرلىك سايىستاردىڭ دەمەۋشىلەرى IT-كاسىپكەرلەر، تابىستى حالىقارالىق IT-جوبالاردىڭ نەگىزىن سالۋشىلار، پاۆلودار قالاسىنىڭ №8 ليتسەيىنىڭ تۇلەكتەرى ەۆگەني فومەنكو مەن ماكسيم پيسەگوۆ بولدى.
ءىس-iاراعا قاتىسۋشىلار مەن كورەرمەندەرگە ارنالعان قۇتتىقتاۋ سوزىندە حاكاتون مەتسەناتى ەۆگەني فومەنكو:
«قۇرمەتتى قازاقستان مەكتەپتەرى مەن جوعارى وقۋ ورىندارىنىڭ تۇلەكتەرى! سىزدەردىڭ كوپشىلىگىڭىز تابىستى كاسىپكەر بولدىڭىزدار. قاربالاس كەستەڭىزدە ۋاقىت تاۋىپ، ءبىز سياقتى ءوز مەكتەپتەرىڭىز بەن ۋنيۆەرسيتەتتەرىڭىزگە كەلىپ، حاكاتوندارىڭىزدى وتكىزىپ، وسكەلەڭ ۇرپاققا ءوز بىلىمدەرىڭىزبەن بولىسسەڭىزدەر جاقسى بولار ەدى! ەلدى جانە الەمدى بىرگە كوركەيتۋگە اتسالىسايىق! مۇنداي ءىس-شارالار قازاقستان حالقى ءۇشىن يگى داستۇرگە اينالىپ، بۇكىل الەمگە ۇلگى بولسىن!»
تاجىريبەلى ساراپشىلاردىڭ باعالاۋ ناتيجەلەرى بويىنشا كەلەسى كوماندالار جۇلدەلى ورىندارعا يە بولدى:
1 ورىن – 1 000 000 تەڭگە جۇلدەمەن “Koz timesin” كومانداسى (نازارباەۆ زياتكەرلىك مەكتەبى).
2 ورىن – 300 000 تەڭگە جۇلدەمەن “COS/underwood” كومانداسى (تورايعىروۆ ۋنيۆەرسيتەتى).
3 ورىن – 200 000 تەڭگە جۇلدەمەن “FastAsFBoys” (دارىندى بالالارعا ارنالعان №3 گيمنازيا).
-ءبىز وسى بايقاۋعا فۋتبول جاتتىعۋىنا قاتىستى جوبا جاسادىق. بۇل نەگىزىنەن جاتتىقتىرۋشىلار جەتىسپەيتىن الىس اۋىلدا تۇراتىن وقۋشىلارعا قاجەت. ءبىزدىڭ جوبانى «Play market» قوسىمشاسىنان كەز-كەلگەن سمارتفونعا جۇكتەپ الۋعا بولادى. مۇندا قولدانۋشىلاردىڭ موتيۆاتسياسىن ارتتىرىپ، فۋتبول الاڭىنداعى شەبەرلىگىن شىڭداۋعا باعىتتالعان ءتۇرلى داعدىلار قاراستىرىلعان، - دەيدى كوماندا كاپيتانى شاحنازار سايلاۋحان.
جاراتىلىستانۋ عىلىمدارى جوعارى مەكتەبىنىڭ وقىتۋشىسى، PhD دوكتورى، پپۋ دوتسەنتى داريا ابىكەنوۆانىڭ ايتۋىنشا، بايقاۋ بارىسىندا وقۋشىلار مەن ستۋدەنتتەر ءوز يدەيالارىمەن، ازىرلەمەلەرىمەن قازىلار القاسىن تاڭ قالدىردى.
- ۇزدىك حاكاتون جوباسى جاس فۋتبولشىلارعا ماراپاتتاۋ جانە گەيميفيكاتسيا جۇيەسى جەتىلدىرىلگەن فۋتبول شەبەرلىگىن ارتتىرۋعا مۇمكىندىك بەرەتىن ءموبيلدى قوسىمشا بولدى. ەكىنشى جانە ءۇشىنشى ورىنداردى كەپتەلىستەردى شەشۋ جولدارىن ۇسىنعان جاس باعدارلاماشىلار يەلەندى. «اقىلدى باعدارشامنىڭ ارقاسىندا كوماندالار قيىلىستاردىڭ وتكىزۋ قابىلەتىن 2,5 ەسەگە دەيىن ارتتىرا الدى. سونداي-اق ورتاشا جول ءجۇرۋ ۋاقىتىن 20%-عا دەيىن قىسقارتتى!»، – دەيدى داريا بولاتقىزى.
بارلىق جەڭىمپازدار مەن قاتىسۋشىلاردى حاكاتونداعى ءساتتى ونەرىمەن قۇتتىقتايمىز. جاستار مەن ەل بولاشاعى ءۇشىن وسىنداي ماڭىزدى شارانى ۇيىمداستىرىپ، قولداۋ كورسەتكەن دەمەۋشىلەرىمىزگە شەكسىز العىسىمىزدى بىلدىرەمىز!
"ادىرنا" ۇلتتىق پورتالى
