الماتى وبلىسىنىڭ تالعار اۋدانىندا «ويقاراعاي» تاۋ-شاڭعى كەشەنى اشىلدى. سالتاناتتى شاراعا وبلىس اكىمى ا.باتالوۆ، اۋدان اكىمى ر.ساتباەۆ جانە «ورمان ەرتەگىسى – اپورت اق-تاس» كومانياسىنىڭ پرەزيدەنتى ە.بالفانباەۆ قاتىستى.
- ەلباسى وبلىسقا كەلگەن ساپارىندا تۋريزم كلاستەرىن قالىپتاستىرۋ تۋرالى تاپسىرما بەرگەن ەدى. سونىڭ ىشىندە شىمبۇلاقتان (شىڭبۇلاق) باستاپ تۇرگەن شاتقالىنا دەيىنگى ارالىقتا تاۋ ءتۋريزمىن دامىتۋ قاجەتتىگىن ايتقان بولاتىن. سوعان بايلانىستى بۇگىن، مىنە، جاڭا تاۋ-شاڭعى كەشەنىن اشىپ وتىرمىز. مەملەكەت تاراپىنان قولداۋ كورسەتىلىپ، رەسپۋبليكالىق ماڭىزداعى اۆتوكولىك جولىنان كەشەنگە دەيىنگى 6,2 كم جولعا كۇردەلى جوندەۋ جاسادىق. «ورمان ەرتەگىسى» تاۋ-شاڭعى كۋرورتىنا ينۆەستور (ەرىك بالفانباەۆ، «اlina» كومپانيالار توبىنىڭ دا پرەزيدەنتى. ج.ن.) ءوزىنىڭ جەكە قاراجاتى ەسەبىنەن 60 ملن. اقش دوللارى، ياعني 30 ملرد تەڭگە قاراجات جۇمسادى. ەرىككە العىس ايتامىن. وتباسىلارىڭىزبەن، دوس-جاراندارىڭىزبەن كەلىپ، تازا اۋادا دەمالىپ، شاڭعى تەۋىپ، يگىلىگىن كورىڭىزدەر، – دەدى قۇتتىقتاۋ ءسوز ارناعان وبلىس اكىمى اماندىق عابباسۇلى.
ينۆەستورلاردىڭ ايتۋىنشا، تاۋ-شاڭعى كەشەنىنىڭ اۋماعى 85 گا. قازىرگى سىرعاناۋ جولاقتىعى – 13 شاقىرىم. ارقان بويىمەن جوعارى كوتەرىلىپ، تومەن قاراي سىرعاناۋعا دا جاعداي جاسالعان. بولاشاقتا سىرعاناۋ ايماعىن 40 شاقىرىمعا دەيىن ۇزارتۋدى جوسپارلاپ وتىر.
دەمالىس ايماعى كۇنىنە 5000 ادامدى قابىلداۋعا دايىن. شاڭعى جولدارى جاز مەزگىلىندە ۆەلوسيپەد تەبۋگە لايىقتالادى. كەلۋشىلەرگە 6 مەيرامحانا، 99 ورىندىق قوناق ءۇي قىزمەت كورسەتەدى.
اردانا ابدىقاسىم، الماتى قالاسىنىڭ 11 جاسار تۇرعىنى:
–«ويقاراعاي» كەشەنىنە وتباسىممەن جانە تۋىسقاندارىممەن كەلدىم. مۇندا دەمالعان وتە قاتتى ۇنادى. ءبىر مەزگىل دەمالىستى تازا اۋادا وتكىزگەن جاقسى ەكەن. تاڭەرتەڭنەن كەشكە دەيىن ءالى ءجۇرمىز. وسىندا وزىمەن بىرگە اكەلگەنى ءۇشىن اناما العىس ايتامىن.
ماليكا سارتقوجاەۆا، الماتى قالاسىنىڭ تۇرعىنى:
–الماتىنىڭ تاۋلارى كەرەمەت، باسقا ەلدەرمەن (جەرلەرمەن) سالىستىرۋعا كەلمەيدى. «ويقاراعاي» شاڭعى كەشەنىنە جاقىندارىمىزبەن كەلىپ وتىرمىز. وتە قاتتى ۇنادى. بولاشاقتا كەشەننىڭ قىزمەت كورسەتۋى بۇدان دا جاقسى بولارىنا سەنەمىن.
الماتى قالاسى مەن الماتى وبلىسىنىڭ تۇرعىندارى قىسقى دەمالىس ورىندارىنا سەرۋەندەۋ بويىنشا وزگە ايماقتاردان كوش ىلگەرى تۇر. وعان تۇمسا تابيعاتىمەن ەرەكشەلەنەتىن تاۋلى جەرلەردىڭ بولۋى سەبەپ بولىپ وتىر. تابيعاتتىڭ بەرگەن سىيىن ۇقساتۋ دا وڭاي شارۋا ەمەس. وسى ولكەدەگى اتقامىنەر ازاماتتار مەن كاسىپكەرلەردىڭ جۇمىلا ىسكە كىرىسۋىنىڭ ارقاسىندا اشىلعان «ويقاراعاي» تۋريستىك كەشەنى دەمالۋشىلار سانىن ودان ءارى ارتتىرارى ءسوزسىز.
جاسۇلان ناۋرىءزالى،
«ادىرنا» پورتالى
