Almaty oblysynda "Oıqaraǵaı" taý-shańǵy kesheni ashyldy

2818
Adyrna.kz Telegram

Almaty oblysynyń Talǵar aýdanynda «Oıqaraǵaı» taý-shańǵy kesheni ashyldy. Saltanatty sharaǵa oblys ákimi A.Batalov, aýdan ákimi R.Sátbaev jáne «Orman ertegisi – Aport Aq-Tas» komanııasynyń prezıdenti E.Balfanbaev qatysty.

- Elbasy oblysqa kelgen saparynda týrızm klasterin qalyptastyrý týraly tapsyrma bergen edi. Sonyń ishinde Shymbulaqtan (Shyńbulaq) bastap Túrgen shatqalyna deıingi aralyqta taý týrızmin damytý qajettigin aıtqan bolatyn. Soǵan baılanysty búgin, mine, jańa taý-shańǵy keshenin ashyp otyrmyz. Memleket tarapynan qoldaý kórsetilip, respýblıkalyq mańyzdaǵy avtokólik jolynan keshenge deıingi 6,2 km jolǵa kúrdeli jóndeý jasadyq. «Orman ertegisi» taý-shańǵy kýrortyna ınvestor (Erik Balfanbaev, «Alina» kompanııalar tobynyń da prezıdenti. J.N.) óziniń jeke qarajaty esebinen 60 mln. AQSh dollary, ıaǵnı 30 mlrd teńge qarajat jumsady. Erikke alǵys aıtamyn. Otbasylaryńyzben, dos-jarandaryńyzben kelip, taza aýada demalyp, shańǵy teýip, ıgiligin kórińizder, – dedi quttyqtaý sóz arnaǵan oblys ákimi Amandyq Ǵabbasuly.

Investorlardyń aıtýynsha, taý-shańǵy kesheniniń aýmaǵy 85 ga. Qazirgi syrǵanaý jolaqtyǵy – 13 shaqyrym. Arqan boıymen joǵary kóterilip, tómen qaraı syrǵanaýǵa da jaǵdaı jasalǵan. Bolashaqta syrǵanaý aımaǵyn 40 shaqyrymǵa deıin uzartýdy josparlap otyr.

Demalys aımaǵy kúnine 5000 adamdy qabyldaýǵa daıyn. Shańǵy joldary jaz mezgilinde velosıped tebýge laıyqtalady. Kelýshilerge 6 meıramhana, 99 oryndyq qonaq úı qyzmet kórsetedi.

 

 Ardana Ábdiqasym, Almaty qalasynyń 11 jasar turǵyny:

–«Oıqaraǵaı» keshenine otbasymmen jáne týysqandarymmen keldim.  Munda demalǵan óte qatty unady. Bir mezgil demalysty taza aýada ótkizgen jaqsy eken. Tańerteńnen keshke deıin áli júrmiz. Osynda ózimen birge ákelgeni úshin anama alǵys aıtamyn.

 Malıka Sartqojaeva, Almaty qalasynyń turǵyny:

–Almatynyń taýlary keremet, basqa eldermen (jerlermen)  salystyrýǵa kelmeıdi. «Oıqaraǵaı» shańǵy keshenine jaqyndarymyzben kelip otyrmyz. Óte qatty unady. Bolashaqta keshenniń qyzmet kórsetýi budan da jaqsy bolaryna senemin.

Almaty qalasy men Almaty oblysynyń turǵyndary qysqy demalys oryndaryna serýendeý boıynsha ózge aımaqtardan kósh ilgeri tur. Oǵan tumsa tabıǵatymen erekshelenetin taýly jerlerdiń bolýy sebep bolyp otyr. Tabıǵattyń bergen syıyn uqsatý da ońaı sharýa emes. Osy ólkedegi atqaminer azamattar men kásipkerlerdiń jumyla iske kirisýiniń arqasynda ashylǵan «Oıqaraǵaı» týrıstik kesheni demalýshylar sanyn odan ári arttyrary sózsiz.

Jasulan NAÝRYZÁLI,

«Adyrna» portaly

 

Pikirler