ەلوردادا «AMANAT» پارتياسىنىڭ قولداۋىمەن قازاقستان مۇگەدەكتەر كونفەدەراتسياسى ۇيىمداستىرعان «جان شۋاق» قوعامدىق سىيلىعىنىڭ لاۋرەاتتارىن ماراپاتتاۋ ءراسىمى ءوتتى.
ءوز سوزىندە، «AMANAT» پارتياسىنىڭ توراعاسى ەرلان قوشانوۆ «جان شۋاق» سىيلىعىن وتكىزۋ ەرەكشە قاجەتتىلىكتەرى بار مىڭداعان ادام ءۇشىن جاڭا مۇمكىندىكتەرگە جول اشقان يگى داستۇرگە اينالعانىن اتاپ ءوتتى.
«15 جىل ىشىندە «جان شۋاق» شەكسىز مۇمكىندىك يەلەرىنە ارنالعان سىيلىققا اينالدى. ولار سىناققا ءتوزىپ، قيىن-قىستاۋ جولدان ءوتتى. ال بۇگىندە كومەككە مۇقتاج جاندارعا وزدەرى قول ۇشىن سوزۋدا. ەلىمىزدە مۇگەدەكتىگى بار ادامداردىڭ ءوزىن-ءوزى دامىتۋى ءۇشىن بارلىق جاعداي جاسالۋدا. ەرەكشە قاجەتتىلىكتەرى بار جاندارعا قولداۋ كورسەتۋ جۇمىسى ارقاشان مەملەكەت باسشىسى قاسىم-جومارت توقاەۆتىڭ باستى نازارىندا. ەل پرەزيدەنتىنىڭ باستاماسىمەن الەۋمەتتىك كاسىپكەرلىك بويىنشا ارنايى جوبالار ىسكە قوسىلىپ، ەرەكشە قاجەتتىلىكتەرى بار جانداردىڭ قۇقىقتارىن قورعاۋ ءۇشىن ومبۋدسمەن ينستيتۋتى قۇرىلۋدا. سونداي-اق، مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا زاڭ قابىلداندى»، – دەدى ەرلان قوشانوۆ.
ول «AMANAT» پارتياسى ەرەكشە قاجەتتىلىكتەرى بار ادامداردىڭ ءومىر ساپاسىن جاقسارتۋ جۇمىسىن ودان ءارى جالعاستىراتىنىن اتاپ ءوتتى. سەبەبى بۇل قادام پارتيانىڭ باستى باسىمدىقتارىنىڭ ءبىرى سانالادى.
قازاقستان مۇگەدەكتەر كونفەدەراتسياسىنىڭ پرەزيدەنتى، ماجىلىستەگى «AMANAT» فراكتسياسىنىڭ مۇشەسى جانات وماربەكوۆانىڭ ايتۋىنشا، بۇل سىيلىقتىڭ باستى ماقساتىنىڭ ءبىرى – ەرەكشە قاجەتتىلىكتەرى بار جانداردىڭ تۇلعالىق دامۋى ءۇشىن جاڭا مۇمكىندىكتەرگە جول اشۋعا كومەكتەسۋ، ولاردىڭ العا جىلجۋعا جانە قوعامعا پايدا اكەلۋگە دەگەن ۇمتىلىسىن قولداۋ.
«وسى سىيلىق تاعايىندالعاننان بەرى ەلىمىزدىڭ عانا ەمەس، سونداي-اق اقش، ليتۆا، پولشا، ەستونيا جانە وزگە دە مەملەكەتتەردىڭ 70-تەن استام رۋحى مىقتى ازاماتتارى لاۋرەات اتاندى. جىل سايىن ءار نوميناتسيا بويىنشا ۇمىتكەرلەر سانى ارتىپ كەلەدى. بيىل «جان شۋاق» سىيلىعىنا قاتىسۋعا ەلىمىزدىڭ بارلىق وڭىرىنەن 100-دەن استام ءوتىنىم كەلىپ ءتۇستى»، – دەپ اتاپ ءوتتى ول.
وسىلايشا، مۇمكىندىگى شەكتەۋلى جاندارعا قارىم-قاتىناس ەتيكاسى جانە سيتۋاتسيالىق كومەك كورسەتۋ بويىنشا وقىتۋ ترەنينگتەرىن ۇيىمداستىرعان كەنتاۋ قالاسىنىڭ تۇرعىنى ەرلان ابديەۆ «كۇشتى جىگەرى جانە جەڭىسكە تالپىنىسى ءۇشىن» سىيلىعىنىڭ يەگەرى اتاندى.
«كاسىپكەرلىك قىزمەتتى دامىتۋعا قوسقان ۇلەسى ءۇشىن» نوميناتسياسى بويىنشا قاراعاندىلىق اسحات ەسەنتۇروۆ ماراپاتتالدى. ول حالىقتىڭ الەۋمەتتىك وسال توبى جانە ەرەكشە قاجەتتىلىكتەرى بار ادامدار جۇمىس ىستەيتىن كاسىپورىن اشتى.
بەلگىلى سۋرەتشى-زەرگەر، يۋنەسكو-نىڭ حالىقارالىق ساپا بەلگىسىنىڭ يەگەرى، شىمكەنتتىك يكرامجان رافيكوۆ «ونەر سالاسىنداعى اسا ۇزدىك جەتىستىكتەرى ءۇشىن» نوميناتسياسى بويىنشا سىيلىق يەلەندى.
«مادەنيەت سالاسىنداعى اسا ۇزدىك جەتىستىكتەرى ءۇشىن» نوميناتسياسى بويىنشا رەسپۋبليكالىق جانە حالىقارالىق مۋزىكالىق بايقاۋلاردىڭ جەڭىمپازى، پاۆلودارلىق ديليارا اسايىنوۆا ماراپاتتالدى.
الماتىلىق باقتىگۇل الىمبەكوۆا «سپورت سالاسىنداعى اسا ۇزدىك جەتىستىكتەرى ءۇشىن» سىيلىعىنىڭ يەگەرى اتاندى. ول بوسفور بۇعازىن ءبىر جارىم ساعاتتان از ۋاقىت ىشىندە ءجۇزىپ ءوتتى. سونداي-اق، پاراسپورتشى، سكانديناۆيالىق سەرۋەندەۋ نۇسقاۋشىسى سانالادى.
«مۇگەدەكتىگى بار ادامداردىڭ عىلىم مەن ءبىلىم بەرۋ قىزمەتىن دامىتۋعا قوسقان ۇلەسى جانە وقۋعا تالپىنىسى ءۇشىن» نوميناتسياسى بويىنشا استانالىق تاڭساۋلە سەرىكوۆ ماراپاتقا يە بولدى. ول كوپتەگەن عىلىمي ەڭبەكتىڭ اۆتورى، سونداي-اق، ەرەكشە قاجەتتىلىكتەرى بار ادامدارعا ارنالعان جوعارى جانە جوعارى وقۋ ورنىنان كەيىنگى ءبىلىم بەرۋ تۇجىرىمداماسىن ازىرلەگەن عالىم سانالادى. ارنايى سەرتيفيكاتتى عىلىم جانە جوعارى ءبىلىم ءمينيسترى ساياسات نۇربەك تابىستادى. ول سونداي-اق قايسار جانمەن تىلدەسىپ، جەڭىسىمەن قۇتتىقتادى.
ال اقمولا وبلىسىنىڭ تسەلينوگراد اۋدانىنداعى «بولاشاق» مۇگەدەكتەر بىرلەستىگىنىڭ باسشىسى امانگەلدى قاپانوۆ بولسا، «مۇگەدەكتىگى بار ادامدارعا قاتىستى قوعامدىق سانانىڭ وڭ وزگەرۋىنە قوسقان ۇلەسى ءۇشىن» سىيلىعىنىڭ لاۋرەاتى دەپ تانىلدى.
جەڭىمپازداردىڭ ارقايسىسى 1 ملن تەڭگە كولەمىندەگى اقشالاي سىيلىققا يە بولدى.
