تاڭعاجايىپ تسيرك قويىلىمى

3329
Adyrna.kz Telegram

الماتىدا قازاق مەملەكەتتىك تسيركى جاڭا جىل قارساڭىندا «جاڭا جىلدىق سۋدوكۋ» اتتى جاڭا قويىلىمىن ۇسىندى. قويىلىمعا دەيىن تسيرك ۇجىمى بۇقارالىق اقپارات قۇرالدارىمەن ءباسپاسوز ءماسليحاتىن وتكىزىپ، تىلشىلەردىڭ كوپتەگەن سۇراقتارىنا جاۋاپ بەردى.

جاڭا جىلدىق شوۋدا شەتەلدىك ارتىستەر، الەمگە ايگىلى كلوۋن، شەبەر ۇيرەتىلگەن جانۋارلار ونەر كورسەتەدى. مىسالى، حالىقارالىق تسيرك ونەرى فەستيۆالدارىنىڭ لاۋرەاتى، بىرنەشە دۇركىن جۇلدەگەرى كلوۋن ارمەن اسيريانتس (يسپانيا) پەن ماسكەۋدەگى يۋ.نيكۋلين تسيركىنىڭ ءارتىسى، حالىقارالىق تسيرك ونەرى فەستيۆالدارىنىڭ لاۋرەاتى، بىرنەشە دۇركىن جۇلدەگەرى، ەكۆيليبريست-جونگلەر كريستينا گۋك الماتىلىق جۇرتشىلىقتىڭ العىسىنا بولەندى. ەرتەگى الەمىنىڭ جاڭا جىلدىق شىتىرمان وقيعالارىنا تولى قويىلىمنىڭ كەيىپكەرلەرى دە سان الۋان. اياز اتا مەن اقشاقار، بەزەندىرىلگەن شىرشا، سۇيكىمدى قوياندار، مەيىرىمدى ايۋلار، اقىلدى يتتەر، سيقىرلى، تاڭعاجايىپ كورىنىستەر، جاپون ەرتەگىسىنىڭ كەيىپكەرلەرى تاعى باسقالار ەل-جۇرتتىڭ ەرەكشە كوڭىلىن كوتەرەدى.

الماتى قالاسى قازاق مەملەكەتتىك تسيركىنىڭ ديرەكتورى باقىت بوكەباەۆ:

– بۇگىنگى جاڭا بازارلىق جاپون تاقىرىبىنا نەگىزدەلىپ قويىلعان. جاپون ەلىنىڭ ءتارتىبى، ءتالىم-تاربيەسى قازاق ۇلتىنا ۇقساس بولعاندىقتان، سوعان نەگىزدەپ بارلىق جانردى بىرىكتىرىپ، جاڭا قويىلىمدى ۇيىمداستىردىق. سوعان وراي، جاڭا كوستيۋمدەر تىكتىردىك. ساحنادا جان-جانۋارلاردان بولەك، 65 ادام ونەر كورسەتەدى. تاقىرىبى «جاڭا جىلدىق سۋدوكۋ» بولعاندىقتان، ەرتەگى قاھارماندارىنا بۇكىل زال بولىپ سۋدوكۋدىڭ شەشىمىن تابۋعا كومەكتەسەتىن بولادى. سونىمەن قاتار قويىلىمنىڭ بۇل جولعى ەڭ باستى ەرەكشەلىگى – ات ۇستىندە جىگىتتەر جاسايتىن تيۋركتاردى قىزدار ءبىرىنشى رەت ورىنداعالى وتىر.

ءبىز بارلىق كورەرمەندەرىمىزدى كەلە جاتقان جاڭا جىلمەن قۇتتىقتاپ، ولاردى قىزىقتى قويىلىممەن قۋانتقىمىز كەلدى. جالپى، قازاق مەملەكەتتىك تسيركىندە مەيرامداردا جاڭا قويىلىمداردى جۇرتشىلىقتىڭ نازارىنا ۇسىنۋ ادەمى داستۇرگە اينالعان. جاڭا جىلدىق بۇل ەرتەگى-قويىلىمعا بالالار وزدەرى قاتىسىپ، ويناپ وتىرادى. قيال-عاجايىپقا تولى قويىلىم سونىسىمەن بالالارعا قىزىق. جاڭا جىلدىق بۇل قويىلىم بۇلدىرشىندەردى بىلىمگە باۋلىپ،  جاقسىلىققا جەتەلەپ، ومىردە قيىندىقتار مەن كەدەرگىلەردى جەڭىپ، بيىك ماقساتقا قول جەتكىزە ءبىلۋ كەرەكتىگىن ۇيرەتەدى. ءبىزدىڭ باستى ماقساتىمىز – كوڭىلى كىرشىكسىز بالالاردى قۋانتۋ.

حالىقارالىق تسيرك ونەرى فەستيۆالدارىنىڭ لاۋرەاتى، بىرنەشە دۇركىن جۇلدەگەرى كلوۋن ارمەن اسيريانتس (يسپانيا):

– الماتىعا وسىدان ءبىراز ۋاقىت بۇرىن قازاق مەملەكەتتىك تسيركىنىڭ 45 جىلدىق مەرەيتويىنا ارنالعان حالىقارالىق باعدارلامادا ونەر كورسەتۋ ءۇشىن كەلگەن ەدىم. جاڭا جىلدىق باعدارلاماداعى بۇل قويىلىمدى دايىنداۋعا 5 جىلعا جۋىق ۋاقىت قاجەت بولدى. نەگىزى، تسيرك ونەرىنە كەلگەن ادام ءومىر بويى ۇزدىكسىز ۇيرەنۋ كەرەك. ۋاقىت وتكەن سايىن زامان تالابى جوعارىلاي بەرەدى. اسىرەسە، قازىرگى ينتەرنەت زامانىندا كورەرمەندى تاڭعالدىرۋ وتە قيىن. سەبەبى، ساحناداعى قويىلىمدا تسيرك ارتىستەرى كورەرمەننىڭ كوز الدىندا ونەر كورسەتەدى، ونىڭ جاسايتىن تريۋكتەرىن مونتاج جاساۋعا بولمايدى. سوندىقتان تسيرك ارتىستەرى كورەرمەننىڭ الدىنا شىققان ساتكە دەيىن ۇنەمى شەبەرلىگىن شىڭداۋمەن اينالىسادى.

راسىندا دا بالالارعا سايقىمازاقتىڭ ونەرى وتە قىزىقتى بولدى. يسپانيادان كەلگەن الەمگە ايگىلى كلوۋن ارمەن اسيريانتس ونەر كورسەتە ءجۇرىپ، كورەرمەندى دە ارەناعا شىعارىپ ءتۇرلى ويىندار ويناتۋدى ۇمىتپادى.

جاپون ەرتەگىسى جەلىسىنە قۇرىلعان قويىلىمدا جاۋىز ەمما ءوز نوكەرلەرىمەن بىرىگىپ، جاڭا-جىلدىق مەرەكەنى بولدىرماۋ ءۇشىن سۋدوكۋدى ۇرلاپ اكەتۋگە ارەكەت جاسايدى. تسيرك ارتيستەرى مەن جانۋارلار، ءتىپتى كورەرمەندەر بىرىگىپ سيقىرلى سانداردى تاۋىپ، سۋدوكۋدى قۇتقارۋعا بارىن سالادى. ارمەن قاراي اياز اتا مەن اقشاقار بالالارعا سىيلىق ۇلەستىرىپ، زۇلىم كۇشتەرمەن كۇرەسىپ ءجۇرىپ جاڭا جىلدىق شىرشانى جاعادى.

ا. سەرىكۇلى

 

 

 

پىكىرلەر