جازۋشى، "قازاق ادەبيەتى" باسىلىمىنىڭ باس رەداكتورى داۋرەن قۋات قازاق ونەرىنە ۇشان-تەڭىز ۇلەس قوسقان ءانشى نۇرعالي ءنۇسىپجانوۆتىڭ اتاۋسىز قالعان مەرەيتويىنا ءۋاج ايتىپ، ءداۋىر دارابوزىنا لايىق قۇرمەت كورسەتىلمەي وتىرعاندىعىن العا تارتتى. بۇگىندە قانشاما ۇرپاقتى بالكومەي دارىنىمەن قاناتتاندىرعان قۇرمەتتى اقساقال ەلەۋسىز قالىپ، ونىڭ ورنىن قازاق تىلىنە قۇرمەتى تومەن جاستار باسقان. بۇل جوسىن جايدى "ادىرنا" ۇلتتىق پورتالى حابارلادى.
- 7-ارنادان ءبىر ءانشى بالانىڭ كونتسەرتى بولىپ جاتىر. الگى بالانىڭ ءان ايتىپ جۇرگەنىنە 15 جىل بولىپتى. قۇداي اقى، ءبىر ءانىن بىلمەيمىن. ءوزى وزبەك پە، ۇيعىر ما — سونداي ءبىر ۇلتتىڭ ءتولى. ايتەۋىر، قازاقشا ءان ايتقانىمەن، قازاقشا سويلەمەيدى. ال ەندى ءان الەمىندەگى ون بەس جىلدىعى دۇركىرەپ وتۋدە. زال تولى حالىق، - دەپ جازدى قالامگەر.
مۇنىمەن قوسا، قالامگەر داۋرەن قۋات قازاق رۋحانياتىنىڭ ابىزىنا اينالعان ءانشىنىڭ ەلەۋسىز قالۋى - قازاق رۋحانياتىنا كوپتىڭ تانىتقان نەمقۇرايدىلىعى دەگەن توقتامعا كەلدى.
- ... وكىنىشتى. الگى ءانشىنىڭ كونتسەرتىن تۆ-دان تاماشالاپ، ۇيىندە نۇرعالي ءنۇسىپجانوۆ وتىر. جاسى بيىل — 85-تە. ساحنادا سايران سالعانىنا — 65 جىل. نۇراعام بۇگىن دە بابىندا. بىراق نەگە ەكەنى بەلگىسىز، ەلەۋسىز قالىپ بارادى. مەرەيتويى دا، ساحناداعى 65 جىلدىعى دا اتاۋسىز قالدى. نەگە؟نۇراعاڭ — وزىمەن زامانداس، تۇستاس كومپوزيتورلاردىڭ اندەرىن قالىڭ ەلگە ايگىلەگەن بالكومەي ءانشى. قانشاما ۇرپاق نۇرعالي ءنۇسىپجانوۆ سالعان اندەردىڭ ءالديى مەن رۋحىنا بولەنىپ ءوستى دەسەڭىزشى! سونداي تۇلعا وسى كۇنى كوزدەن تاسا، كوڭىلسىزدەۋ عۇمىر كەشۋدە.جاقسىڭدى جابىرقاتپا، اعايىن! نۇراعاڭا لايىقتى قۇرمەت جاسايىق! - دەپ ءسوزىن تۇيىندەدى اۆتور.
"ادىرنا" ۇلتتىق پورتالى
