قاسىم-جومارت توقاەۆتى قولداۋ جونىندەگى رەسپۋبليكالىق قوعامدىق شتابتا «AMANAT» پارتياسىنىڭ «جاستار رۋحى» جاستار قاناتى ۇيىمداستىرعان «Bir Tolqynda» ديالوگ الاڭىنىڭ وتىرىسى ءوتتى. جاستار ۇيىمدارىنىڭ كوشباسشىلارى، قوعام قايراتكەرلەرى جانە حالىقتىق كواليتسياعا كىرگەن سپورتشىلار قاۋىمداستىعىنىڭ وكىلدەرى پرەزيدەنت سايلاۋىنىڭ قورىتىندىسى جونىندە ءوز پىكىرلەرىن ءبىلدىردى.
سايلاۋالدى شتابتا باق وكىلدەرىنە ارنالعان ءباسپاسوز تۋرى ۇيىمداستىرىلدى. ولار ۇگىت-ناسيحات جانە تالداۋ ورتالىقتارىنىڭ، كانديداتتىڭ قوعامدىق قابىلداۋ بولمەسىنىڭ، مەديا-شتابتىڭ، سەنىمدى وكىلدەردىڭ جۇمىسىن ۇيلەستىرۋ ورتالىعىنىڭ، بايقاۋشىلار شتابى مەن جاستار سەكتورىنىڭ قىزمەتىمەن تانىستى.
«جاستار رۋحى» جاستار قاناتىنىڭ توراعاسى نۇرجان جەتپىسباەۆ حالىقتىق كواليتسياداعى جاستار بلوگىنىڭ قىزمەتىن ەگجەي-تەگجەيلى ءتۇسىندىردى.
«7,5 مىڭنان استام بەلسەندى 3 ملن-نان استام ۇگىت-ناسيحات ماتەريالىن تاراتتى. ولار تەك ۇنپاراق تاراتىپ قانا قويماي، «ەسىكتەن ەسىككە» اكتسياسىنا، سايلاۋشىلارمەن وتكەن ەكسپرومت-كەزدەسۋلەرگە، ازاماتتاردىڭ ۇسىنىستارى مەن تىلەكتەرىن قابىلداۋ ىسىنە اتسالىستى. بۇل سايلاۋدىڭ ءبىر ەرەكشەلىگى سول، كانديداتتىڭ سايلاۋالدى باعدارلاماسىن ءار سايلاۋشىعا ەگجەي-تەگجەيلى ءتۇسىندىرىپ بەرۋ ماقساتىندا ءبىز تەك ءىرى قالالارعا عانا ەمەس، سونىمەن قاتار شالعاي ورنالاسقان اۋىلدارعا دا باردىق»، - دەدى ول.
ۇلتتىق ۆولونتەرلەر جەلىسىنىڭ توراعاسى، ماجىلىستەگى «AMANAT» پارتياسىنىڭ دەپۋتاتى ۆەرا كيمنىڭ پىكىرىنشە، سايلاۋ ناتيجەسى قاسىم-جومارت توقاەۆتىڭ رەفورمالار باعىتىنا جالپىحالىقتىق قولداۋ بار ەكەنىن دالەلدەيدى.
«كانديداتتىڭ سايلاۋالدى باعدارلاماسىنىڭ نەگىزگى ماقساتى – حالىقتىڭ ءومىر ساپاسىن جاقسارتۋ. ادىلەتتىلىك قاعيداتىنا سايكەس، مارتەبەسىنە، جىنىسىنا نەمەسە جاسىنا قاراماستان، قازاقستاندىقتار تەڭ مۇمكىندىكتەر مەن قۇقىقتارعا يە بولۋى ءتيىس. سايلاۋ قورىتىندىسى حالىق پرەزيدەنتتى قولدايتىنىن كورسەتتى. ەلىمىزدىڭ، سونىمەن قاتار حالىقارالىق بايقاۋشىلاردىڭ وڭ پىكىرى سايلاۋدىڭ اشىق ءارى ادال وتكەنىن ايقىندايدى»، – دەدى حالىق قالاۋلىسى.
ءوز كەزەگىندە، وليمپيادا چەمپيونى، قر ۇلتتىق وليمپيادالىق كوميتەتى باس حاتشىسىنىڭ ورىنباسارى سەرىك ساپيەۆ سپورتشىلار قاۋىمداستىعىنىڭ ۇستانىمىن جەتكىزدى.
«ءبىز قۋاتتى ءارى ادىلەتتى قازاقستان ءۇشىن داۋىس بەردىك. سايلاۋ ۋچاسكەسىنە كەلگەن ءاربىر ادام ءوزىنىڭ ازاماتتىق پارىزىن وتەپ قانا قويماي، ەل بولاشاعى ءۇشىن تاڭداۋ جاسادى دەپ ويلايمىن. ءبىز ەل يگىلىگىنە قىزمەت ەتۋگە بارىمىزدى سالامىز جانە بارشا قاتىسۋشىلاردى وسىعان شاقىرامىن»، – دەدى ول.
پرەزيدەنتتىك جاستار كادرلىق رەزەرۆىنىڭ مۇشەسى ءابۋتالىپ ءمۇتالى الداعى 7 جىلدا جاستار مەملەكەت قۇرۋ ىسىنە ەلەۋلى ۇلەس قوسادى دەپ وتىر.
«AMANAT» پارتياسى قوعامدىق ساياسات ينستيتۋتى ديرەكتورىنىڭ ورىنباسارى دينارا سادۋاقاسوۆا سايلاۋشىلاردىڭ ۇسىنىسى مەن تىلەگىنە نازار اۋداردى. ۇگىت-ناسيحات ناۋقانى بارىسىندا 40 مىڭنان استام وسىنداي ۇسىنىس-تىلەك كەلىپ ءتۇستى. بۇل ازاماتتاردىڭ ساياسي پروتسەستەرگە دەگەن قىزىعۋشىلىعى ارتقانىن اڭعارتادى.
