رەداكتسيامىزعا پاۆلودار وبلىسى پاۆلودار اۋدانىنا قاراستى جاڭا قالا اۋىلىنان 200 ادام قول قويعان حات كەلىپ ءتۇستى. ولار جاڭاقالا اۋىلىنداعى گريگورەۆكا ورتا مەكتەبىنىڭ ديرەكتورى كولتاي كالەلحانۇلىنىڭ جۇمىستان شىعارىلعانىنا نارازى.
اۋىل تۇرعىندارىنىڭ ايتۋىنشا، اۋدان اكىمى الەكساندر بابەنكو، كۇزدەن بەرى مەكتەپ ديرەكتورىنىڭ قىر سوڭىنا ءتۇسىپ، قۋدالاۋعا ۇشىراتقان. كولتاي كالەلحانۇلى بۇل اۋىلداعى توعىز جىلدىق مەكتەپتە ديرەكتور بولىپ قىزمەت اتقارعالى بەس جىل بولدى. وسى ارالىقتا ءبىلىم ساپاسىن الدىڭعى قاتارعا قويا ءبىلدى. قازىر گريگورەۆكا ورتا مەكتەبى ءبىلىم بەرۋ ساپاسى جاعىنان پاۆلودار اۋدانىنداعى ەڭ ۇزدىك مەكەمە. بيىلعى وقۋ جىلىنان باستاپ مەكتەپ تولىقتاي مەملەكەتتىك تىلگە كوشتى. البەتتە، بۇل ديرەكتوردىڭ جەكە باستاماسى ەمەس. وبلىس اكىمىنىڭ تاپسىرماسىمەن بولعان. الايدا، اۋدان اكىمى الەكساندر بابەنكوعا ارالاس مەكتەپتىڭ قازاقشا ءبىلىم بەرۋگە كوشكەنى ۇناماعان سەكىلدى. ونىڭ ۇستىنە، مەكتەپتە وتەتىن بارلىق رەسمي شارالاردىڭ تەك مەملەكەتتىك تىلدە جۇرگىزىلەتىنى، ديرەكتوردىڭ تەك قانا قازاق تىلىندە بايانداما جاسايتىنى تىپتەن توبە شاشىن تىك تۇرعىزعانعا ۇقسايدى. اۋىلداعى ءبىر-ەكى وزگە ۇلت وكىلدەرىن الدىعا سالىپ قويىپ، ديرەكتوردىڭ ۇستىنەن وبلىسقا دومالاق ارىزدى قارشا بوراتتى. ايتسە دە، وبلىس اكىمدىگى نەگىزسىز حاتتارعا نازار اۋدارماعان سوڭ توقتاعان ەدى. ەندى، اۋدان اكىمى ديرەكتوردىڭ وزىنە شۇقشيا باستادى. اۋداندىق ءبىلىم ءبولىمى ارقىلى قايتا-قايتا تەكسەرۋ جۇرگىزىپ، قايتا-قايتا بولىمگە شاقىرىپ تۇك جۇمىس ىستەتپەي قويدى، دەيدى اۋىل تۇرعىندارى. مەكتەپتىڭ ءبىلىم بەرۋ جۇيەسىنەن ەش كەمشىلىك تابا الماعان سوڭ باسشىعا اڭدۋ سالعان. سونداعى تاپقانى 9 جانە 23 قاراشا كۇندەرى مەكتەپ ديرەكتورى جۇمىس ورنىندا بولماعان. 9-قاراشادا ەمحاناعا بارعانى جونىندە انىقتاماسى بار، ديرەكتوردىڭ. ال، 23-قاراشا كۇنى ءبىر ساعاتقا كەشىگىڭكىرەپتى. ونىڭ وزىندە جەر تايعاق بولىپ ازەر جەتكەن. ەسكە سالا كەتەرلىگى، جاڭا قالا اۋىلى وبلىس ورتالىعىنان 40 شاقىرىم جەردە. ال، مەكتەپ ديرەكتورى جۇمىسقا پاۆلودار قالاسىنان ءوز كولىگىمەن قاتىناپ جۇمىس ىستەيدى. ول ءۇشىن مەكتەپ ديرەكتورىنا اقشا تولەمەيدى. پاۆلودار اۋداندىق ءبىلىم ءبولىمىنىڭ باسشىسى ساكەن مايديساروۆ، وتكەن 28-قاراشا كۇنىمەن بۇيرىق شىعارادى. بۇيرىقتا ەڭبەك كودەكسىنىڭ 52-بابى، 1-تارماعى، 8 تارماقشاسى، دەپ كورسەتىلگەن. كەيىن بۇل بۇيرىق وزگەرىپ، 4-جەلتوقسانمەن قايتا شىعىپتى. اۋداندىق ءبىلىم ءبولىمىنىڭ ءوزى دە ەكى وتتىڭ ورتاسىندا قالىپ، شاراسىز كۇي كەشىپ وتىرعانىن ايتقانى بار. جالپى، پاۆلودار اۋدانىندا 5-6 مەكتەپتە باسشى جوق. نەگە ەكەنى بەلگىسىز، ديرەكتورلار «ءوز ەرىكتەرىمەن» كەتىپ جاتىر. «ءوز ەرىكتەرىمەن» ءوتىنىش جازباعاندارىنا، كولتاي سەكىلدى قىسپاققا الماعاندارىنا كىم كەپىل. گريگورەۆكا مەكتەبىنىڭ ديرەكتورىن ورنىنان الىپ تاستاۋىنا جاڭا قالا اۋىلىنىڭ جۇرتى قارسى، ءارى نارازىلىق تانىتىپ جاتىر. 200 ادام قول قويىپ وبلىس اكىمى بولات باقاۋوۆقا حات جازعان. وبلىس اكىمدىگىنەن ناتيجە شىقپاسا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنە، ودان قالا بەردى پرەزيدەنت اكىمشىلىگىنە شاعىم جولدايمىز دەيدى، اۋىل تۇرعىندارى.
تاقىرىپقا تۇزدىق.
ايتپاقشى، وتكەندە 22-24 قازان ارالىعىندا قر پرەزيدەنت اكىمشىلىگى، مادەنيەت جانە سپورت مينيسترلىگىمەن بىرلەسىپ پاۆلودار وبلىسىنىڭ جەرگىلىكتى اتقارۋشى ورگاندارىنداعى قر ءتىل تۋرالى زاڭناماسىنىڭ ساقتالۋىنا تەكسەرىس جۇرگىزگەن بولاتىن. تەكسەرۋ ناتيجەسى بويىنشا، پاۆلودار اۋدانى اكىمىنىڭ اپپاراتى شىعىس قۇجاتتارىن راسىمدەۋدە مەملەكەتتىك ءتىلدى قولدانبايتىنى انىقتالعان. پاۆلودار اۋدانى اكىمىنىڭ اپپاراتىندا 19 حاتتىڭ قوسىمشالارى تەك ورىس تىلىندە بەرىلگەن. پاۆلودار اۋدانى اكىمى اپپاراتىنىڭ كونكۋرستىق قۇجاتتامالارى، اپپاراتتىق جينالىستارىنىڭ حاتتامالارى، تارتىپتىك كوميسسيالارىنىڭ حاتتامالارى جانە اتالعان اۋدان اپپاراتىنىڭ ۇيىمداستىرۋ جانە ىشكى ساياسات بولىمدەرىنىڭ بارلىق قۇجاتتارى ورىس تىلىندە جۇرگىزىلەدى ەكەن. وسىلايشا، ءتىل زاڭناماسىنداعى 8-باپتىڭ ءوز دەڭگەيىندە ورىندالماۋىن كورسەتىپ وتىر، دەلىنگەن تەكسەرۋشىلەردىڭ حاتتاماسىندا. بۇل اۋدان باسشىسى ا. بابەنكونىڭ مەملەكەتتىك تىلگە سالقىن قارايتىندىعىنىڭ دالەلى. ورىس ءتىلىن بىلمەيتىن ماماندى قىزمەتتە قۋدالاۋعا ۇشىراتۋ اۋدان اكىمىنە جاقسى اتاق اپەرمەيتىن تىرلىك. ونسىز دا قوعامدا مۇعالىمنىڭ بەدەلى تومەن دەيمىز. اۋىلدى جەردە ءبىلىمدى مامان جوق دەيمىز. بارعان كادردى ايداعانعا كونىپ، ايتقانىنا جۇرمەگەنى ءۇشىن جۇمىستان قىسقارتا بەرسەك، اۋىل ءبىلىمىنىڭ ساپاسىنان نە ناتيجە كۇتەمىز.
وڭعار قابدەن، كەرەكۋ
