پرەزيدەنتتىككە كانديدات قاراقات ابدەن سايلاۋشىلارعا ۇندەۋ جولدادى. ول قازاقستاندىقتاردى 20 قاراشا كۇنى وتەتىن سايلاۋعا بەلسەندى قاتىسىپ، وزدەرىنىڭ كونستيتۋتسيالىق قۇقىقتارىن جۇزەگە اسىرۋعا شاقىردى.
«سايلاۋالدى ناسيحات جۇمىستارىمەن ەل وڭىرلەرىن، ۇلكەندى-كىشىلى قالالار مەن اۋىلداردى ارالاپ شىقتىم. وتباسى مەن ۇلتتىق قۇندىلىقتارعا نەگىزدەلگەن باعدارلامامدى كەڭ بايتاق ەلىمىزدىڭ ازاماتتارىنا تانىستىردىم. جاستاردان ىزەت كوردىم، قاريالاردان باتا الدىم. وسىلايشا، مەن ءوزىمنىڭ باعىتىمنىڭ دۇرىس ەكەنىنە سەنىمىم تەك ارتا ءتۇستى. «وتباسى» الدەقاشان حالقىمىزدىڭ باستى قۇندىلىعىنا اينالعان. شاڭىراق، ءۇي – بابالارىمىز ءۇشىن دە كيەلى ۇعىم بولعان. ماقساتىم - بابالاردان قالعان سول قاستەرلى ۇعىمدى زاماناۋي كەيىپكە كەلتىرىپ، مەملەكەتتىك ساياساتقا اينالدىرۋ»، - دەدى كانديدات ءوز ۇندەۋىندە.
بۇدان بولەك، كانديداتتىڭ ورتالىق شتابىندا ۇگىت-ناسيحات جۇمىستارى قورىتىندىلاندى. قاراقات ابدەننىڭ سايلاۋالدى كەزدەسۋلەرى ەلىمىزدىڭ مەگاپوليستەرىندە، وبلىس جانە اۋدان ورتالىقتارىندا، مونوقالالار مەن شالعاي اۋىلداردا ءوتتى. ەل وڭىرلەرىندەگى 20 سايلاۋالدى شتابتىڭ، كانديداتتىڭ سەنىمدى وكىلدەرى مەن 2000-عا جۋىق ۆولونتەردىڭ ۇيلەسىمدى جۇمىسى بارلىق الەۋمەتتىك توپتاردى قامتۋعا مۇمكىندىك بەردى. ولاردىڭ قاتارىندا: كوپ بالالى انالار، قاريالار، ستۋدەنتتەر، زيالى قاۋىم وكىلدەرى، مەديتسينا جانە الەۋمەتتىك قىزمەتكەرلەر، مۇعالىمدەر، مەكتەپكە دەيىنگى ءبىلىم بەرۋ ماماندارى، ۇلتتىق كيىم وندىرۋشىلەرى، كاسىپكەرلەر، وتباسىلىق بيزنەس پەن تۋريستىك سالا وكىلدەرى، تىگىن فابريكاسىنىڭ جۇمىسكەرلەرى بار.
جالپى العاندا، 1000 استام كەزدەسۋ وتكىزىلدى.
سايلاۋشىلارمەن كەزدەسۋ بارىسىندا قوعامداعى وزەكتى ماسەلەلەر تالقىلانىپ، كوپ بالالى وتباسىلاردى، قارت كىسىلەردى، ەرەكشە قاجەتتىلىگى بار جانداردى، وسكەلەڭ ۇرپاق پەن جاستاردى قولداۋ شارالارى تۋرالى ءسوز قوزعالدى. كانديدات وتباسىلىق جانە ۇلتتىق قۇندىلىقتاردى نىعايتۋعا ەرەكشە كوڭىل ءبولدى.
ۇگىت-ناسيحات جۇمىستارى ونلاين فورماتتا دا بەلسەندى جۇرگىزىلدى. كانديداتتىڭ رەسمي سايتىندا جاريالانعان سايلاۋالدى باعدارلامانى 150 مىڭنان استام قولدانۋشى جۇكتەپ الدى. الەۋمەتتىك جەلىلەردەگى رەسمي پاراقشالار مەن سايتى ارقىلى سايلاۋشىلاردىڭ 40 مىڭعا جۋىق ۇسىنىسى مەن ساۋالىن قابىلداندى.
