Prezıdenttikke kandıdat Qaraqat Ábden saılaýshylarǵa úndeý joldady. Ol qazaqstandyqtardy 20 qarasha kúni ótetin saılaýǵa belsendi qatysyp, ózderiniń konstıtýııalyq quqyqtaryn júzege asyrýǵa shaqyrdy.
«Saılaýaldy nasıhat jumystarymen el óńirlerin, úlkendi-kishili qalalar men aýyldardy aralap shyqtym. Otbasy men ulttyq qundylyqtarǵa negizdelgen baǵdarlamamdy keń baıtaq elimizdiń azamattaryna tanystyrdym. Jastardan izet kórdim, qarııalardan bata aldym. Osylaısha, men ózimniń baǵytymnyń durys ekenine senimim tek arta tústi. «Otbasy» áldeqashan halqymyzdyń basty qundylyǵyna aınalǵan. Shańyraq, úı – babalarymyz úshin de kıeli uǵym bolǵan. Maqsatym - babalardan qalǵan sol qasterli uǵymdy zamanaýı keıipke keltirip, memlekettik saıasatqa aınaldyrý», - dedi kandıdat óz úndeýinde.
Budan bólek, kandıdattyń ortalyq shtabynda úgit-nasıhat jumystary qorytyndylandy. Qaraqat Ábdenniń saılaýaldy kezdesýleri elimizdiń megapolısterinde, oblys jáne aýdan ortalyqtarynda, monoqalalar men shalǵaı aýyldarda ótti. El óńirlerindegi 20 saılaýaldy shtabtyń, kandıdattyń senimdi ókilderi men 2000-ǵa jýyq volonterdiń úılesimdi jumysy barlyq áleýmettik toptardy qamtýǵa múmkindik berdi. Olardyń qatarynda: kóp balaly analar, qarııalar, stýdentter, zııaly qaýym ókilderi, medıına jáne áleýmettik qyzmetkerler, muǵalimder, mektepke deıingi bilim berý mamandary, ulttyq kıim óndirýshileri, kásipkerler, otbasylyq bıznes pen týrıstik sala ókilderi, tigin fabrıkasynyń jumyskerleri bar.
Jalpy alǵanda, 1000 astam kezdesý ótkizildi.
Saılaýshylarmen kezdesý barysynda qoǵamdaǵy ózekti máseleler talqylanyp, kóp balaly otbasylardy, qart kisilerdi, erekshe qajettiligi bar jandardy, óskeleń urpaq pen jastardy qoldaý sharalary týraly sóz qozǵaldy. Kandıdat otbasylyq jáne ulttyq qundylyqtardy nyǵaıtýǵa erekshe kóńil bóldi.
Úgit-nasıhat jumystary onlaın formatta da belsendi júrgizildi. Kandıdattyń resmı saıtynda jarııalanǵan saılaýaldy baǵdarlamany 150 myńnan astam qoldanýshy júktep aldy. Áleýmettik jelilerdegi resmı paraqshalar men saıty arqyly saılaýshylardyń 40 myńǵa jýyq usynysy men saýalyn qabyldandy.
