پرەزيدەنتتىككە كانديدات سالتانات تۇرسىنبەكوۆا سايلاۋالدى ۇگىت-ناسيحات ناۋقانىن ماڭعىستاۋ وبلىسىندا جالعاستىرۋدا، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
بۇگىن ول اقتاۋعا ات باسىن بۇرىپ، انا ۇيىنە باردى. كانديدات ورتالىقتا كومەك الىپ جاتقان ايەلدەرمەن كەزدەسىپ، سايلاۋالدى باعدارلاماسىن ءتۇسىندىردى. انالاردىڭ سۇراقتارىنا جاۋاپ بەرىپ، قوردالانعان ماسەلەلەرىن تالقىلادى. اقتاۋداعى بۇل ورتالىق 2015 جىلدان بەرى جۇمىس ىستەپ كەلەدى. 7 جىلدىڭ ىشىندە انا ۇيىنەن 100-دەن استام ايەل مەن 300-گە جۋىق بالا كومەك العان.
«جىل وتكەن سايىن اليمەنتكە قارىزدار كوبەيىپ بارادى. ەلىمىز بويىنشا سوت ورىنداۋشىلارىندا جۇزدەگەن مىڭ ىستەر بار، قارىزدار ميللياردتاعان تەڭگەنى قۇرايدى. وتكەن جىلى 150-دەن استام ادام باس بوستاندىعىنان ايىرىلدى. سونىمەن قاتار، اليمەنت تولەمەيتىن ادامعا قاتىستى قىلمىستىق ءىس قوزعالعان كەزدە، ول ازداعان سومانى، ايتالىق، بەس مىڭ تەڭگەنى تولەپ، جاۋاپكەرشىلىكتەن جالتارىپ قالۋى ءجيى كەزدەسەدى»،—دەدى قر پرەزيدەنتتىگىنە كانديدات.
