قر پرەزيدەنتتىگىنە كانديدات سايلاۋشىلارمەن كەزدەسۋ ءۇشىن جاڭاوزەن قالاسىنا باردى.
ول ۇگىت-ناسيحات جۇمىستارىن جۇرگىزۋ ءۇشىن ارنايى جاڭاوزەن «ءبىلىم-يننوۆاتسيا» ليتسەي-ينتەرناتىنا تابان تىرەدى. ءوزىنىڭ ساياسي باعدارلاماسىن تانىستىردى. سونداي-اق ءسوز بارىسىندا پەداگوگتاردىڭ الدىندا تۇرعان مىندەتتەردى اتاپ ءوتتى.
«الەمنىڭ كەز كەلگەن ەلىندە مۇعالىم – مارتەبەسى بيىك ماماندىق. ويتكەنى ول بالالارعا، ياعني بولاشاققا ءبىلىم بەرەتىن ادام. مەن ءوزىم مۇعالىم، پروفەسسورمىن. سوندىقتان بۇل جۇمىستىڭ قانشالىقتى قيىن دا قىزىقتى بولاتىنىن بىلەمىن»، – دەدى م.قاجىكەن.
مۇعالىمدەر ۇمىتكەرمەن ءبىلىم بەرۋدەگى جالاقىنى كوتەرمەي جۇكتەمەنى ۇلعايتۋ، سىبايلاس جەمقورلىق، تۇرعىن ءۇي الۋ سياقتى وزەكتى ماسەلەلەردى تالقىلادى.
مەيرام قاجىكەن ءوز باعدارلاماسىنىڭ الەۋمەتتىك بولىمىندە مۇقتاج جاس ماماندارعا، تۇرعىن ءۇي ساتىپ الۋعا قاراجاتى جەتكىلىكسىز وتباسىلارعا جانە حالىقتىڭ باسقا دا توپتارىنا تۇرعىن ءۇي بەرۋ جوسپارى جازىلعانىن ايتتى.
«مەنىڭ ۇستانىمىم مىنادا: جەرگىلىكتى ورگاندار كوپپاتەرلى ءۇي سالۋ ءۇشىن مەردىگەر كومپانياعا جەر ۋچاسكەسىن بەرەدى. سوندىقتان قۇرىلىس سالۋشى تۇرعىن ءۇيدىڭ 15%-نا دەيىن مەملەكەتكە ءبولۋى كەرەك. ياعني، اكىمدىكتەر تۇرعىن-ۇيدەن پاتەرلەر الادى. ونى كەزەكتە تۇرعاندارعا بەرەدى»، – دەدى ول.
