ءبىر قولىمەن كولىكتى تىزگىندەپ، ءبىر قولىمەن بەسىكتى تەربەتكەن قازاق ايەلىن حالقى باقىتقا بولەدى. وتكەندە عانا اقپارات ايدىنىن ءدۇر سىلكىندىرگەن ەڭبەكقور اناعا جۇرت بولىپ جيىلىپ، اقشالاي اسارلاتىپ، قازاقستاندىقتار قوماقتى قارجى جيناپ بەردى. انانىڭ كوزىنەن قۋانىشتىڭ ىستىق جاسى ىرشىپ، كوپشىلىككە شەكسىز ريزاشىلىعىن ءبىلدىردى. بۇل جايلى "ادىرنا" ۇلتتىق پورتالى جازدى.
قازنەتتە كۇنكورىس قامىمان كولىك پەن بەسىكتى قاتار تىزگىندەگەن انانىڭ ۆيدەوسى تاراعان ەدى. بالاسىن جول ۇستىندە الديلەگەن كەيىپكەردىڭ ارەكەتىنە ءبىرى سۇيسىنسە، ءبىرى تاڭىرقادى. ناتيجەسىندە، جومارت جاندار كەيىپكەرگە قول ۇشىن بەرىپ، قارجىلاي قولداۋ كورسەتتى. حالىقتىڭ ءبىرى جانسەبىل جاننىڭ قۇرمەتى ءۇشىن 100 مىڭ اۋدارسا، ءبىرى سوڭعى 100 تەڭگەسىن جولداعان.
قۋانىشتان جانارىنا جاس العان جاننىڭ ەسىمى - اسەل. ەكى پەرزەنتى بار. تۇڭعىشى 12 جاستا، قۇنداقتاۋلى ءسابيىنىڭ ەسىمى - مەدينا. بەس ايلىق. اسەل قازىر استانا قالاسىنداعى جاتاقحانالاردىڭ بىرىندە تۇرىپ جاتىر. ناپاقاسى ءۇشىن كولىك تىزگىندەيدى، كوپشىلىكپەن قاتار قوڭىر تىرلىك كەشەدى. ەشكىمدى ايىپتامايدى، ەشكىمگە شاعىمدانبايدى.
"الىپ تا انادان تۋادى", "وسىنداي قايسار قازاق ايەلدەرىنە تاڭ قالامىن", "انا دەگەن - ۇلىلىق. ءبىزدىڭ قوعامدا كەيدە بالاcىن وقىتۋ، توقىتۋ، جەتكىزۋ جالعىز اناعا عانا جۇكتەلەتىن سەكىلدى. ەگەر اكەسى بالاسىن قولىنا الىپ، وسىلاي كولىك جۇرگىزسە، ءبارى ورە تۇرەگەلەر ەدى. انالارعا شەكسىز العىس", "بالالارىن اسىراۋ ءۇشىن تاۋەكەلگە بەل بۋىپ وتىر. جول ۇستىندە ءجۇرۋ - وڭاي ەمەس. وتە قاۋىپتى" دەپ جازدى وقىرماندار.
"ادىرنا" ۇلتتىق پورتالى
