«AMANAT» پارتياسىنىڭ ورتالىق اپپاراتىندا مۇناي-گاز سالاسى كوميتەتىنىڭ العاشقى وتىرىسى ءوتتى. سونىڭ بارىسىندا كوميتەتتىڭ قۇرامى مەن ەرەجەسى بەكىتىلدى.
كوميتەت توراعاسى بولىپ ماجىلىستەگى «AMANAT» پارتياسىنىڭ دەپۋتاتى عالىم امىرەەۆ, ال كوميتەت حاتشىسى بولىپ استانا قالاسىنداعى «Petrocouncil» وكىلى عيبرات سارسەنوۆسايلاندى.
كوميتەت قۇرامىنا ەنەرگەتيكا، يندۋستريا جانە ينفراقۇرىلىمدىق دامۋ، ەكولوگيا، گەولوگيا جانە تابيعي رەسۋرستار مينيسترلىكتەرىنىڭ، «قازمۇنايگاز»، «QazaqGaz» ۇلتتىق كومپانيالارىنىڭ، «PSA» جشس، مۇناي جانە گاز اقپاراتتىق-تالداۋ ورتالىعىنىڭ، «KazEnergy» قاۋىمداستىعىنىڭ، قازاقستان ماشينا جاساۋشىلار وداعىنىڭ، «KasService»، «Argus Media»، «Energy Monitor»، «Energy Analytics» وكىلدەرى، سونداي-اق بيزنەس-قاۋىمداستىقتار، تاۋەلسىز ساراپشىلار مەن تالداۋشىلار كىردى.
«AMANAT» پارتياسىنىڭ حاتشىسى ەلدار جۇماعازيەۆ اتاپ وتكەندەي، كوميتەتتىڭ نەگىزگى مىندەتى مۇناي-گاز سالاسىنداعى تۇيتكىلدى ماسەلەلەردى انىقتاۋ جانە ونى شەشۋ جولىن ازىرلەۋ، زاڭنامالىق بازانى جەتىلدىرۋگە باستاماشىلىق ەتۋ جانە ۇسىنىستار ەنگىزۋ، سونداي-اق سالا وكىلدەرى مەن ولاردىڭ قىزمەتكەرلەرىنىڭ قۇقىعىن، زاڭدى مۇددەلەرىن قورعاۋدى قامتاماسىز ەتۋ بولماق.
«كوميتەت الدىندا مۇناي-گاز سالاسىن دامىتۋ، سونىڭ ىشىندە تۇيتكىلدى ماسەلەلەردى شەشۋ جونىندە اۋقىمدى مىندەت تۇر. سالاداعى كەيبىر كومپانيالاردىڭ جاسىرىن مونوپوليالىق جاعدايى، كەيبىر ءىرى مۇناي-گاز جوبالارىنداعى جەرگىلىكتى قامتۋدىڭ از ۇلەسى، ديزەل وتىنىنىڭ جىل سايىنعى تاپشىلىعى جانە ماۋسىمدىق باعا ءوسىمى تۋرالى ءبارىمىز بىلەمىز. «AMANAT» پارتياسىنىڭ الاڭىندا مەملەكەتتىك ورگاندارمەن، ۇلتتىق كومپانيالارمەن، بەيىندى قاۋىمداستىقتارمەن جانە نارىق وكىلدەرىمەن بىرلەسىپ، وسى ماسەلەلەردى شەشۋ جولىن قاراستىرامىز», – دەدى كوميتەت توراعاسى عالىم امىرەەۆ.
ءوز كەزەگىندە، قازاقستان مۇناي-سەرۆيس كومپانيالارى وداعىنىڭ تورالقا توراعاسى راشيد جاقسىلىقوۆ شەشىمىن كۇتىپ تۇرعان بىرقاتار وزەكتى ماسەلەلەردى اتاپ ءوتتى.
«كوميتەتتىڭ سالالىق جانە كاسىبي قۇرامىن ەسكەرە وتىرىپ، بىرىنشىدەن مۇناي-گاز سالاسىن دامىتۋ، سونىڭ ىشىندە ءىرى مۇناي-گاز جوبالارى بويىنشا كەلىسىمشارتتاردى قايتا قاراۋ جونىندە ناقتى ۇسىنىستار ازىرلەۋگە كىرىسۋىمىز كەرەك. ەكىنشىدەن، وتاندىق جابدىق ءوندىرىسىنىڭ، سالاداعى جەرگىلىكتى IT-مامانداردىڭ تاپشىلىعىن نازارعا الۋعا ءتيىسپىز. سونداي-اق، حالىقارالىق كومپانيالار ەلىمىزدە سەرۆيستىك ورتالىقتار اشپايدى. سەرتيفيكاتتاۋ ورتالىقتارى جوق», – دەدى ول.
سونداي-اق، وتىرىس بارىسىندا كوميتەت مۇشەلەرى تاۋارلار مەن قىزمەتتەردى ساتىپ الۋ، سالىق جەڭىلدىگىن ۇسىنۋ، مۇناي-گاز سالاسىنداعى وتاندىق تاۋارلار كاتالوگىنىڭ بولماۋى سىندى بىرقاتار ماسەلەلەردى كوتەردى.
وتىرىس قورىتىندىسى بويىنشا، كوميتەت جۇمىسىن زاڭ جوبالاۋ قىزمەتىنە، فيسكالدىق پرەفەرەنتسيالاردى ازىرلەۋگە، قولدانىستاعى جانە بولاشاق مۇناي-گاز جوبالارىندا تاۋارلاردىڭ، جۇمىس مەن كورسەتىلەتىن قىزمەتتەردىڭ قازاقستاندىق ۇلەسىن ۇلعايتۋ جونىندەگى شارالاردى ۇسىنۋعا شوعىرلاندىرۋ تۋرالى شەشىم قابىلداندى.
