«AMANAT» partııasynyń Ortalyq apparatynda Munaı-gaz salasy komıtetiniń alǵashqy otyrysy ótti. Sonyń barysynda Komıtettiń quramy men erejesi bekitildi.
Komıtet tóraǵasy bolyp Májilistegi «AMANAT» partııasynyń depýtaty Ǵalym Ámireev, al Komıtet hatshysy bolyp Astana qalasyndaǵy «Petrocouncil» ókili Ǵıbrat Sársenovsaılandy.
Komıtet quramyna Energetıka, ındýstrııa jáne ınfraqurylymdyq damý, Ekologııa, geologııa jáne tabıǵı resýrstar mınıstrlikteriniń, «QazMunaıGaz», «QazaqGaz» ulttyq kompanııalarynyń, «PSA» JShS, Munaı jáne gaz aqparattyq-taldaý ortalyǵynyń, «KazEnergy» qaýymdastyǵynyń, Qazaqstan mashına jasaýshylar odaǵynyń, «KasService», «Argus Media», «Energy Monitor», «Energy Analytics» ókilderi, sondaı-aq bıznes-qaýymdastyqtar, táýelsiz sarapshylar men taldaýshylar kirdi.
«AMANAT» partııasynyń Hatshysy Eldar Jumaǵazıev atap ótkendeı, Komıtettiń negizgi mindeti munaı-gaz salasyndaǵy túıtkildi máselelerdi anyqtaý jáne ony sheshý jolyn ázirleý, zańnamalyq bazany jetildirýge bastamashylyq etý jáne usynystar engizý, sondaı-aq sala ókilderi men olardyń qyzmetkerleriniń quqyǵyn, zańdy múddelerin qorǵaýdy qamtamasyz etý bolmaq.
«Komıtet aldynda munaı-gaz salasyn damytý, sonyń ishinde túıtkildi máselelerdi sheshý jóninde aýqymdy mindet tur. Saladaǵy keıbir kompanııalardyń jasyryn monopolııalyq jaǵdaıy, keıbir iri munaı-gaz jobalaryndaǵy jergilikti qamtýdyń az úlesi, dızel otynynyń jyl saıynǵy tapshylyǵy jáne maýsymdyq baǵa ósimi týraly bárimiz bilemiz. «AMANAT» partııasynyń alańynda memlekettik organdarmen, ulttyq kompanııalarmen, beıindi qaýymdastyqtarmen jáne naryq ókilderimen birlesip, osy máselelerdi sheshý jolyn qarastyramyz», – dedi komıtet tóraǵasy Ǵalym Ámireev.
Óz kezeginde, Qazaqstan munaı-servıs kompanııalary odaǵynyń tóralqa tóraǵasy Rashıd Jaqsylyqov sheshimin kútip turǵan birqatar ózekti máselelerdi atap ótti.
«Komıtettiń salalyq jáne kásibı quramyn eskere otyryp, birinshiden munaı-gaz salasyn damytý, sonyń ishinde iri munaı-gaz jobalary boıynsha kelisimsharttardy qaıta qaraý jóninde naqty usynystar ázirleýge kirisýimiz kerek. Ekinshiden, otandyq jabdyq óndirisiniń, saladaǵy jergilikti IT-mamandardyń tapshylyǵyn nazarǵa alýǵa tıispiz. Sondaı-aq, halyqaralyq kompanııalar elimizde servıstik ortalyqtar ashpaıdy. Sertıfıkattaý ortalyqtary joq», – dedi ol.
Sondaı-aq, otyrys barysynda Komıtet músheleri taýarlar men qyzmetterdi satyp alý, salyq jeńildigin usyný, munaı-gaz salasyndaǵy otandyq taýarlar katalogynyń bolmaýy syndy birqatar máselelerdi kóterdi.
Otyrys qorytyndysy boıynsha, Komıtet jumysyn zań jobalaý qyzmetine, fıskaldyq preferenııalardy ázirleýge, qoldanystaǵy jáne bolashaq munaı-gaz jobalarynda taýarlardyń, jumys men kórsetiletin qyzmetterdiń qazaqstandyq úlesin ulǵaıtý jónindegi sharalardy usynýǵa shoǵyrlandyrý týraly sheshim qabyldandy.
