31 قازاندا قر پرەزيدەنتتىگىنە كانديدات سالتانات تۇرسىنبەكوۆا ەلدىڭ وڭتۇستىگىنە ساپارلادى. كانديدات شىمكەنت قالاسىندا تىگىن فابريكاسىنىڭ جۇمىسشىلارىمەن كەزدەستى. قۇقىق قورعاۋشىنى تىڭداۋعا 250-دەن استام قىزمەتكەر جينالدى.
ۇمىتكەر ءبىر مەزگىلدە اقشا تاۋىپ، بالا ءوسىرىپ، سالت-ءداستۇردى ساقتاپ، ءىرى كاسىپورىننىڭ جۇگىن كوتەرىپ جۇرگەن ايەلدەردى ماقتان تۇتاتىنىن اتاپ ءوتتى.
«گاۋھار» – وڭتۇستىكتەگى جەڭىل ونەركاسىپتىڭ فلاگمانى. مۇندا جۇمىس كيىمى، مەكتەپ فورماسى مەن توقىما بۇيىمدارى ادەمى، ءتيىمدى جانە ىڭعايلى تىگىلەدى. «قازاقستاندا جاسالعان» دەپ ماقتانىشپەن ايتا الاتىن ءونىمنىڭ قالاي جاسالىپ جاتقانىن كورۋ قۋانتادى. وسىنداي ءىرى ءارى تانىمال كاسىپورىندى ايەل ادام باسقارىپ وتىرعانى، ءتىپتى ۇلكەن قۋانىش. كوپشىلىك ايەلدىڭ تابىستى كوشباسشى بولا الاتىنىنا سەنبەيدى. بىراق مەن سەنەمىن جانە بىلەمىن: ايەلدىڭ قولىنان ءبارى كەلەدى: زاۋىتتى دا، ۇلكەن ۇجىمداردى دا، ءتىپتى بۇكىل ەلدى دە باسقارا الادى. ءايەل-انا ءبىر قولىمەن بالا تەربەتسە، ءبىر قولىمەن الەمدى تەربەتەدى», - دەپ اتاپ ءوتتى ول.
سونداي-اق، فابريكا باسشىسى كاسىپورىننىڭ سالىقتىڭ كوپتىگى، بىلىكتى كادرلاردىڭ تاپشىلىعى، تۇراقسىز سالا جانە ارنايى وقۋ ورىندارىنىڭ جەتىسپەۋشىلىگى سياقتى ماسەلەلەرگە توقتالدى.
كەيىن اشىق اڭگىمە ايتىلا باستاعاندا تىگىنشىلەر ءوز ۇسىنىستارى مەن ساۋالدارىن ورتاعا سالدى. ايەلدەر قازاقستاندىقتاردىڭ تابىس تەڭسىزدىگىنە قالاي الاڭدايتىنى تۋرالى ايتتى.
سالتانات تۇرسىنبەكوۆا جۇمىس ىستەيتىن ايەلدەردىڭ ءومىرىن جاقسى جاققا وزگەرتكىسى كەلەتىنىن جەتكىزدى.
بايانداماشى ءوزىنىڭ سايلاۋالدى باعدارلاماسىنان ۇزىندىلەرمەن ءبولىستى، وندا ايەلدەردىڭ زەينەت جاسىن 58 جاسقا دەيىن قىسقارتۋدى، سونداي-اق 1-2 توپتاعى مۇگەدەكتەر مەن مۇگەدەك بالالارعا كۇتىم جاساۋدى، ەڭ تومەنگى جالاقى مەن ءومىر ءسۇرۋ دەڭگەيىن ارتتىرۋدى ۇسىنىپ وتىر(زەينەتاقى جيناقتارى، جاردەماقىلار مەن شاكىرتاقىلار). كوپ بالالى جانە قيىن ومىرلىك جاعدايداعى وتباسىلاردىڭ قارىزدارىن ەسەپتەن شىعارۋ، تولىق ەمەس وتباسىلاردىڭ مارتەبەسىن زاڭنامالىق تۇرعىدان بەكىتۋ، جاس وتباسىلارعا يپوتەكا الۋ كەزىندەگى جاردەماقىلار مەن سۋبسيديالاردى ەنگىزۋ جانە ت.ب. ۇسىنىستارىن ايتتى.
سونداي-اق ول ءوزىنىڭ ەڭ اۋقىمدى – «تۇرمىستىق زورلىق-زومبىلىقسىز قازاقستان» جوباسىن وڭتۇستىكتىڭ ورتالىعى – شىمكەنتتە باستاعانىن اتاپ ءوتتى. ونىڭ كۇش-جىگەرىنىڭ ارقاسىندا قالادا ءبىرىنشى مەملەكەتتىك داعدارىس ورتالىعى، سونداي-اق وبلىستىڭ 17 اۋىلىندا وتباسىن قولداۋ قىزمەتى اشىلدى.
ۇمىتكەر وتباسىنداعى زورلىق-زومبىلىق تولىعىمەن جويىلمايىنشا - وتباسىنداعى ۇرىپ-سوعۋ سياقتى جانجالدار ۇيات نارسەگە اينالعانعا دەيىن ونىمەن كۇرەسۋدى جالعاستىرۋعا ۋادە بەردى.
كەيىن قۇقىق قورعاۋشى شىمكەنت قالالىق ادۆوكاتتار القاسىمەن كەزدەسۋ وتكىزدى. ايتا كەتۋ كەرەك، سالتانات تۇرسىنبەكوۆا قۇقىق قورعاۋ قىزمەتى اياسىندا ءوزىن-ءوزى قورعاۋ باپتارى بويىنشا باس بوستاندىعىنان ايىرىلعان ايەلدەردىڭ قۇقىقتارىن قورعاۋعا كوپ كۇش جۇمسادى.
ەسكە سالايىق، 26 قازاندا ۇمىتكەر سايلاۋ ناۋقانى اياسىندا ايماقتاردى ارالاي باستادى. ول قاراعاندى وبلىسىنا ءبىرىنشى بولىپ بارىپ، قۇقىق قورعاۋشىلارمەن، زاڭگەرلەرمەن، ماگيسترانتتارمەن، ساراپشىلارمەن، قۇقىق قورعاۋ جانە سوت جۇيەسىن رەفورمالاۋعا، مۇمكىندىگى شەكتەۋلى جانداردىڭ قۇقىقتارىن قورعاۋعا اتسالىسقان ءتۇرلى ۇكىمەتتىك ەمەس ۇيىمداردىڭ وكىلدەرىمەن، سوتتالعاندارمەن كەزدەستى. كەيىنىرەك ول تۇرمىستىق زورلىق-زومبىلىق قۇرباندارىنا كومەكتەسەتىن داعدارىس ورتالىعىنداعى ايەلدەرمەن سويلەسۋگە دە باردى.
27 قازاندا قۇقىق قورعاۋشى اقمولا وبلىسىندا بولىپ، دارىگەرلەر مەن مەديتسينا قىزمەتكەرلەرىنىڭ ماسەلەلەرىن تىڭدادى, سونىمەن قاتار جەرگىلىكتى داعدارىس ورتالىعىندا بولدى.
