قر پرەزيدەنتتىگىنە كانديدات مەيرام قاجىكەننىڭ ۇلىتاۋ وبلىسىنداعى شتاب قىزمەتكەرلەرى ۇگىت-ناسيحات ناۋقانىنىڭ سوڭىنا دەيىن وڭىردەگى بارلىق جۇمىس ۇجىمدارىمەن كەزدەسۋدى جوسپارلاپ وتىر. قازىرگى تاڭدا بۇل باعىتتاعى جۇمىستار قارقىندى جۇرگىزىلۋدە. شتاب قىزمەتكەرلەرى مەن ەرىكتىلەر كانديداتتىڭ ۇگىت پاراقشالارىن تاراتىپ، سايلاۋالدى تۇعىرنامانى ءتۇسىندىرۋ شارالارىن جالعاستىرۋدا. تيىسىنشە شتاب باسشىلىعى دا كۇن سايىن كاسىپورىندار مەن قوسا باسقا دا ۇيىمداردىڭ كاسىپوداقتارىمەن كەزدەسۋلەر وتكىزىپ جاتىر.
بۇگىنگى تاڭدا شتابتا 10-عا جۋىق ادام جۇمىس ىستەيدى. وبلىستىڭ بارلىق قالالارىنداعى ورتالىق كوشەلەردە بيلبوردتار مەن پلاكاتتار ىلىنگەن.
"قازىر ءبىز ۇگىت-ناسيحات جۇمىستارىن جۇرگىزىپ جاتىرمىز. بىزدە ۇلكەن ونەركاسىپتىك كاسىپورىندار شوعىرلانعاندىقتان، ءبىز نەگىزىنەن سول كومپانيا جۇمىسشىلارىمەن كەزدەسۋلەر وتكىزەمىز. ءبىزدىڭ مىندەتىمىز – ۇگىت-ناسيحات ۋاقىتىنىڭ سوڭىنا دەيىن بارلىق ۇجىمدارعا بارۋ"- دەپ اتاپ ءوتتى، وبلىستىق شتاب باسشىسى بەرىك جاعىپاروۆ.
بۇگىنگى تاڭدا رەسپۋبليكا بويىنشا 14 وبلىستا م.قاجىكەننىڭ سايلاۋالدى شتابى اشىلعان. باسقا وڭىرلەردە كانديداتتىڭ سەنىمدى وكىلدەرى جۇمىس ىستەيدى. ايتا كەتەيىك ەل بويىنشا بارلىعى 130-دان استام ازامات سەنىمدى وكىل ەكەنىن راستايتىن كۋالىكتەرىن العان.
