الماتى پوليتسياسى كاسىپكەر راميل مۋحورياپوۆتىڭ ۇستىنەن قىلمىستىق ءىس قوزعادى. بۇل تۋرالى جۋرناليست كۇلتەگىن اسپانۇلى Facebook پاراقشاسىندا جازدى، دەپ حابارلايدى «ادىرنا» ءتىلشىسى.
«دوستار، راميل مۋحورياپوۆتىڭ مالىمدەمەسىنە قاتىستى ارىز بويىنشا قىلمىستىق ءىس قوزعالدى. الماتى قالاسىنىڭ ەكسترەميزمگە قارسى ءىس-قيمىل باسقارماسى 20 قازاندا قر باس پروكۋراتۋراسى مەن الماتى قالاسىنىڭ پروكۋراتۋراسىنا تۇسىرگەن ارىزىما قىلمىستىق ءىس اشقانى جايلى جاۋاپ بەرىپتى»،—دەدى ول.
ايتۋىنشا، قۇزىرلى ورگان قر قىلمىستىق كودەكسىنىڭ 174-بابىنىڭ (الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ) 1-بولىگىمەن سوتقا دەيىنگى تەرگەپ-تەكسەرۋدى باستاعان.
«بۇل ايىپتىڭ جازاسى زاڭدا ءۇش نۇسقادا كوزدەلگەن: 2 مىڭ – 7 مىڭ اەك ايىپپۇل، 2 – 7 جىل ارالىعىندا باس بوستاندىعىن شەكتەۋ نەمەسە ايىرۋ. ايىپتى دەپ تانىلسا، سوت ءمان-جايدى ەسكەرە وتىرىپ وسى ۇشەۋىنىڭ بىرەۋىن تاڭدايدى»، – دەپ ءسوزىن تولىقتىردى جۋرناليست.
