تاۋەلسىزدىك الاڭىندا اتىس قۇربانى بولعان ءسابيدىڭ ولىمىنە قاتىستى ءىس الماتى پوليتسيا دەپارتامەنتىنەن اسكەري تەرگەۋ باسقارماسىنا قايتا جىبەرىلدى، ونىڭ تەرگەۋ بارىسىندا انىقتالعان ماڭىزدى سەبەبى بار بولىپ شىقتى. بۇل تۋرالى Orda.kz حابارلادى، دەپ جازادى "ادىرنا" ۇلتتىق پورتالى.
قازا بولعان 4 جاسار ايكوركەمنىڭ اكەسى ايدوس مەلدەحان Orda.kz تىلشىسىمەن سۇحباتىندا قىزىنىڭ ىسىنە قاتىستى جاڭا مالىمەتتەرمەن ءبولىستى. سەگىز ايدان كەيىن تەرگەۋ اتىلعان وقتى زەرتتەۋ بارىسىندا وقتىڭ قاي قارۋدان اتىلعانىن انىقتادى. وق اتقان ادامنىڭ اسكەري ەكەنى انىقتالدى.
— ءىس پوليتسيا بولىمىنەن قر قارۋلى كۇشتەرىنە (ىشكى تەرگەۋ باسقارماسى – رەد.) بەرىلدى، ويتكەنى ءبىز «بولشەك» دەگەن ءسوزدى الىپ تاستادىق. وزدەرى اتقان پۋلەمەت پەن سول پوستا بولعانداردى تاۋىپ العاندىقتان، شولاق مىلتىق جوققا شىعارىلدى. بىراق ناقتى اتى-ءجونى بويىنشا ونىڭ كىم ەكەنىن (تەرگەۋشى – رەد.) ايتپايدى، ويتكەنى ونىڭ مۇنداي اقپاراتتى جاريا ەتۋگە قۇقىعى جوق. بۇل اسكەري قىزمەتكەر، – دەدى مەلدەحان.
ايدوس مەلدەحان نەگىزگى ايعاق – قاي پۋلەمەتتىڭ كىمگە بەرىلگەنى تۋرالى مالىمەت جازىلعان جۋرنال جوعالعاندىقتان، ءىستىڭ تەرگەلۋى كەيىنگە قالدىرىلۋى مۇمكىن دەپ قاۋىپتەنەدى.
Orda.kz رەداكتسياسى ىشكى ىستەر مينيسترلىگىنە رەسمي ساۋال جولدادى. ۆەدومستۆو تەرگەۋ قۇپياسىن العا تارتىپ، سۇراقتارعا جاۋاپ بەرمەدى، بىراق تەرگەۋ ءجۇرىپ جاتقانىن راستادى: بىرقاتار ساراپتامالار تاعايىندالعان.
«قازىرگى ۋاقىتتا اتالعان فاكتى بويىنشا سوتقا دەيىنگى تەرگەۋ جالعاسۋدا، قاجەتتى ساراپتامالار تاعايىندالدى. قىلمىستىق-پروتسەستىك كودەكستىڭ 201-بابىنىڭ تالاپتارىنا سايكەس ءىس بويىنشا تەرگەپ-تەكسەرۋدىڭ بارىسى تۋرالى وزگە مالىمەتتەر جاريا ەتۋگە جاتپايدى» Orda.kz رەسمي ساۋالىنا وسىنداي جاۋاپ الدى.
7 قاڭتاردا الماتىداعى تاۋەلسىزدىك الاڭىندا كولىككە وق جاۋىپ، 4 جاسار ايكوركەم مەلدەحان اكەسىنىڭ كولىگىندە قازا تاپتى. قاڭعىعان وق ءبۇلدىرشىننىڭ باسىنا ءتيدى. بۇل كەزدە كولىكتە ونىڭ اعاسى مەن اپكەسى بولعان، ولار دا جاراقات العان.
بۇل جان تۇرشىگەرلىك وقيعانى Orda.kz سايتىنىڭ باس رەداكتورى 8 قاڭتار كۇنى الماتىداعى ءمايىتحانانىڭ قاقپاسىندا قىزدىڭ اكەسى ايدوس مەلدەحانمەن كەزدەيسوق جولىققاندا ەستىدى. سودان بەرى ايكوركەمنىڭ وقيعاسى قازاقستاندىقتاردىڭ جۇرەگىنەن كەتپەي، ءبۇلدىرشىننىڭ بەينەسى ەلدەگى ميتينگىلەر مەن الداعى رەفورمالاردىڭ سيمۆولىنا اينالدى.
قاندى قاڭتار وقيعاسىنان كەيىن مەلدەحان وتباسىنىڭ جاعدايى قيىنداپ، ءبىراز ۋاقىتقا ەلدەن كەتۋگە ءماجبۇر بولعان.
"ادىرنا" ۇلتتىق پورتالى
