اقتاۋدا تۇراتىن قاسىم مەن جومارت ەسىمدى ەگىزدەر جايىندا جازىلعان ماقالانى وقىعان پرەزيدەنت اتتاستارىنا حات جولدادى. ەگىزدەردىڭ اكەسى قۋانىشىمەن بولىسە وتىرىپ، بۇل وتباسى ءۇشىن كۇتپەگەن توسىن سىي بولعانىن ايتتى. بۇل تۋرالى mangystaumedia.kz حابارلادى، دەپ جازادى "ادىرنا" ۇلتتىق پورتالى.
مەملەكەت باسشىسى قاسىم-جومارت توقاەۆ 13 جاستاعى قوس جەتكىنشەككە ەل ءۇشىن قىزمەت ەتەر ازامات بولىپ، بيىك بەلەستەردى باعىندىرۋدى تىلەگەن.
«اينالايىن قاسىم مەن جومارت، سەندەر تۋرالى جاقىندا حاباردار بولدىم. تەرەڭ ءبىلىم الىپ، ۇلكەن ديپلومات بولام دەپ الدارىڭا بيىك ماقسات قويىپسىڭدار. بۇل – مەملەكەت مۇددەسى ءۇشىن اسا قاجەت ماماندىق.
مەملەكەتىمىز، حالقىمىز ءۇشىن بار كۇشىن سالىپ قىزمەت ەتەتىن ۇلكەن ازامات بولىڭدار. ەلىمىزدىڭ كەلەشەگى – جاستار. سول ءۇشىن العىر، اقىلدى، زەرەك، ءبىلىمدى بولىپ وسىڭدەر. ويتكەنى بۇل – زور جاۋاپكەرشىلىك. بۇگىنگى ءجاسوسپىرىم – ەرتەڭگى ەل يەسى. سەندەر قانشالىقتى ءبىلىمدى، بىلىكتى بولساڭدار، ەلىمىزدىڭ كەلەشەگى سونشالىقتى كەمەل بولادى.
زۋلفيا اجەلەرىڭنىڭ، اتا-انالارىڭنىڭ، ەلدىڭ ءۇمىتىن اقتايتىندارىڭا كامىل سەنەمىن. وزدەرىڭدەي كوپ ءتىل ءبىلۋدى ماقسات ەتكەن، وتانىن شەكسىز سۇيەتىن جاستاردىڭ ءوسىپ كەلە جاتقانىنا قۋانىشتىمىن. ءاردايىم وسىنداي بەلسەندى، تالاپتى بولىڭدار. ومىردە بيىك بەلەستەردى باعىندىرۋلارىڭا تىلەكتەسپىن!» - دەلىنگەن حاتتا.
مەملەكەت باسشىسىنان ارنايى حات العان قاسىم مەن جومارتتىڭ قۋانىشىندا شەك جوق.
«ولار حاتتى قايتا-قايتا وقىپ، العان اسەرىن دوستارىنا ايتىپ تاۋىسا الماي جاتىر. پرەزيدەنتىمىزدىڭ بەرگەن باتاسى قابىل بولسىن!» - دەدى ەگىزدەردىڭ اكەسى ەرلان ماۋلەنوۆ.
№11 مامانداندىرىلعان فيزيكا-ماتەماتيكا ليتسەيىنىڭ 8-سىنىبىندا وقيتىن قاسىم مەن جومارتتى سىنىپتاستارى ءۇش جىلدان بەرى «پرەزيدەنت» دەپ اتايدى ەكەن. مەملەكەت باسشىسىنىڭ اتتاستارى دا مامىر ايىندا تۋعان. ەكەۋى دە بولاشاقتا ديپلومات بولۋدى ماقسات ەتىپ، بۇگىندە بىرنەشە شەت ءتىلىن مەڭگەرىپ ءجۇر.
"ادىرنا" ۇلتتىق پورتالى
