بەلگىلى قازاقستاندىق ءانشى ديماش قۇدايبەرگەن مەن ونىڭ جانكۇيەرلەرىنە ارنالعان La Era Dimash راديوستانتسياسى انتاركتيدادا حابار تاراتا باستادى. بۇل تۋرالى «ەسپەرانزا» عىلىمي-زەرتتەۋ ستانتسياسىنىڭ قىزمەتكەرلەرى حابارلادى، دەپ جازادى "ادىرنا" ۇلتتىق پورتالى.
La Era Dimash راديوستانتسياسىنىڭ نەگىزىن قالاۋشىلار ارگەنتينادا ءوز راديوسىن ەندى عانا ىسكە قوسقان كەزدە قازاقستاندىق ءارتىستىڭ داۋىسى جەر شارىنىڭ ءار تۇكپىرىندە ەستىلۋىن قالادى.
«راديوستانتسيا العاش رەت ەفيرگە شىققاندا ءبىز ءوزىمىزدى وتە باقىتتى سەزىندىك. كۇن سايىن La Era Dimash راديوسىن تىڭدايتىن ەلدەردىڭ ءتىزىمى كوبەيۋدە. ولاردىڭ اراسىندا بۇرىن ەستىمەگەندەرى دە بار. ەندى ەكى جىلدان كەيىن ءبىزدىڭ راديو 96 ەلدە حابار تاراتادى»، – دەدى راديوستانتسيانىڭ باسشىسى پاولا پروفەتا.
2022 جىلدىڭ 11 قازانىندا «ەسپەرانزا» زەرتتەۋ ستانتسياسىنان حابار تاراتاتىن LRA36 راديوسىنىڭ قىزمەتكەرلەرى (شامامەن انتاركتيكا تۇبەگىنىڭ قيىر سولتۇستىگىندە ورنالاسقان ارگەنتينالىق زەرتتەۋ ستانتسياسى) La Era Dimash-قا قىزىقتى سۇحبات بەردى.
اڭگىمە بارىسىندا كلاۋديا البارراسين، ماريا ەۆگەنيا رودريگەس، رومينا زابالزا جانە ماريەلا چۋركينا الىس جانە سۋىق كونتينەنتتەگى وزدەرىنىڭ قيىن، بىراق وتە قىزىقتى جۇمىستارى تۋرالى ايتىپ، La Era Dimash حابار تاراتۋى انتاركتيداعا جەتكەنىن جانە قىزدار قازاقستاندىق ءارتىستىڭ اندەرىن تىڭداۋعا مۇمكىندىك العانىن راستادى.
«ديماشتىڭ داۋىسىن العاش ەستىگەندە، ءبىز شىنىمەن تاڭعالدىق. ونىڭ ادەمى اندەرى بار، وتە ۇلكەن تالانت!»، – دەپ ءبولىستى ولار.
"ادىرنا" ۇلتتىق پورتالى
