ماعزۇم مىرزاعاليەۆ: «ءبىزدىڭ باستى بايلىعىمىز مۇناي ەمەس – ادامدارىمىز»

2033
Adyrna.kz Telegram

«ادامدار وزەننىڭ جاڭا مۇنايى». جاڭاوزەن قالاسىنىڭ كاسىپوداق وكىلدەرى 7-8 قازان كۇندەرى اقمولا وبلىسى زەرەندى دەمالىس ايماعىندا ءدال وسى تاقىرىپتا وتكەن جيىندا باس قوستى. كەلەلى كەزدەسۋدە مۇنايشىلار  «قازمۇنايگاز» ۇلتتىق كومپانياسىنىڭ باسشىلىعىمەن جولىعىپ، تۇيتكىلدى ماسەلەلەردىڭ ءتۇيىنىن تارقاتتى.

«قازمۇنايگاز» باستاماسىمەن كاسىبي بىلىكتىلىكتى ارتتىرۋ ترەنينگى رەتىندە وتكەن ەكىكۇندىك جيىندا كاسىپوداق ۇيىمدارىنىڭ بەلسەندىلەرى قمگ باسشىلىعىنا «وزەنمۇنايگاز» كومپانياسىنداعى وزەكتى ماسەلەلەر جايلى بايانداپ، ونى شەشۋ جولدارى مەن جەرگىلىكتى تۇرعىنداردىڭ الەۋمەتتىك جاعدايىن جاقسارتۋ بويىنشا ۇسىنىستارىن ورتاعا سالدى. اڭگىمە بارىسىندا وندىرىسپەن قاتار، جۇمىسشىلاردىڭ كاسىبي بىلىكتىلىگىن، ەڭبەك پەن ءتارتىپ ونىمدىلىگىن ارتتىرۋ سەكىلدى تاقىرىپتار دا قوزعالدى.

«ءبىزدىڭ باستى بايلىعىمىز مۇناي ەمەس – ادامدارىمىز. جۇمىسشىلاردىڭ الەۋمەتتىك جاعدايىن جاقسارتۋ، كاسىبي بىلىكتىلىگىن ارتتىرۋ، ءبىلىمىن تەرەڭدەتۋ، باسىن بىرىكتىرىپ، اۋىزبىرشىلىگىن نىعايتۋ – كومپانيانىڭ باستى مىندەتتەرىنىڭ ءبىرى. ءبىز بەتپە-بەت جۇزدەسىپ، وزەكتى ماسەلەلەردى اشىق تالقىلاپ، سەنىمدى ديالوگ ورناتا بىلدىك. مۇنداي ەركىن، بەيرەسمي كەزدەسۋلەردى تۇراقتى تۇردە وتكىزەتىن بولامىز»، - دەپ اتاپ ءوتتى قمگ باسقارما توراعاسى ماعزۇم مىرزاعاليەۆ.

تۇمسا تابيعاتىمەن ماقتاناتىن زەرەندىدە وتكەن ەكىكۇندىك جيىن ۇلتتىق كومپانيا باسشىلىعى مەن جۇمىسشىلار اراسىنداعى ديالوگتى ودان ءارى نىعايتۋعا، سەنىم مەن اشىقتىققا نەگىزدەلگەن بايلانىستىڭ بەكي تۇسۋىنە مۇمكىندىك بەردى. بۇل تۋرالى كەزدەسۋدەن كەيىن «وزەنمۇنايگاز» جۇمىسشىلارىنىڭ جەرگىلىكتى كاسىپوداعى» قوعامدىق بىرلەستىگىنىڭ №1 مۇناي-گاز ءوندىرۋ باسقارماسىنىڭ كاسىپوداق وكىلى الىبەك سارسەنوۆ بايانداپ بەردى.

«ءدال وسىنداي بەيرەسمي جولداستىق كەزدەسۋلەر ادامداردى شىنىمەن جاقىنداستىرادى. بۇگىنگى جيىننىڭ ناتيجەسىندە «قازمۇنايگاز» باسشىلىعى مەن جاڭاوزەن قالاسىنىڭ كاسىپوداق وكىلدەرى تۇيتكىلدى ماسەلەلەردە ورتاق كەلىسىمگە كەلىپ، ءوزارا سەنىمدى قارىم-قاتىناس ورناتتى. ال ترەنينگكە كەلەر بولساق، ەڭبەك جانجالدارىن ءتيىمدى شەشۋدىڭ جاڭا داعدىلارىن يگەرۋ تۇرعىسىنان قۇندى اقپارات الدىق»، - دەدى جاڭاوزەندىك مامان.

سەمينار سوڭىندا كاسىپوداق وكىلدەرى جاڭاوزەن قالاسىنان 50 وقۋشى ءبىلىم الىپ جاتقان High School of Burabay مەكتەپ-ينتەرناتىنا باردى. وقۋشىلار جەرلەستەرىن ۇلكەن ىقىلاسپەن قارسى الىپ، بۋراباي كۋرورتىندا ورنالاسقان ەلىمىزدەگى ەڭ تاڭداۋلى مەكتەپتەردىڭ بىرىندە وقۋ تۋرالى اسەرلەرىمەن ءبولىستى.

ەسكە سالساق، بيىل «جارقىن بولاشاق» جوباسىمەن جاڭاوزەندىك  ونىنشى سىنىپتىڭ 50 وقۋشىسى مەكتەپ-ينتەرناتىنا وقۋعا تۇسكەن بولاتىن. «وزەنمۇنايگاز» اق باستاماسى «قازمۇنايگاز» ۇك اق جانە «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن جۇزەگە استى. جوبا بويىنشا جاڭاوزەن قالاسىنىڭ دارىندى بالالارى ەلىمىزدىڭ ۇزدىك ارناۋلى ورتا ءبىلىم بەرۋ مەكەمەلەرىندە تەگىن ءبىلىم الۋ مۇمكىندىگىنە يە بولدى.

ەكى كۇندىك كەزدەسۋگە ومگ باس ديرەكتورى ماقسات يباعاروۆ، ومگ قۇرىلىم باسشىلارى، كاسىپوداق توراعاسى مەن ومگ كاسىپوداق ۇيىمدارىنىڭ (10 مىڭ مۇشە) كوشباسشىلارى، سونداي-اق «قازگوز» جشس كاسىپوداق توراعاسى قاتىستى.

پىكىرلەر