الەۋمەتتىك جەلىلەردە الماتىداعى ستۋدەنتتەردىڭ «دالادا تۇنەپ جۇرگەنى» جايلى بەينەروليك تارادى. عىلىم جانە جوعارى ءبىلىم مينيسترلىگى بەينەروليك اۆتورى جانە وقيعا كۋاگەرلەرىنىڭ ۆەدومستۆوعا حابارلاسۋىن سۇرايدى. قاجەت بولعان جاعدايدا ول ستۋدەنتتەرگە كومەك كورسەتىلەدى. بۇل تۋرالى قر عىلىم جانە جوعارى ءبىلىم مينيسترلىگى حابارلادى، دەپ جازادى "ادىرنا" ۇلتتىق پورتالى.
مينيسترلىك باسقا وڭىرلەردە بۇنداي جاعداي تىركەلمەگەنىن حابارلاپ، الماتىداعى ستۋدەنتتەرگە كومەكتەسۋگە دايار ەكەنىن مالىمدەدى.
«الماتىدا قيىن جاعدايعا تاپ بولعان ستۋدەنتتەرگە ارنالعان ارنايى جەدەل شتاب جۇمىس ىستەيدى. باسپانامەن قامتۋ بويىنشا ستۋدەنتتەر تاۋلىك بويى 8 778 655 60 83 بايلانىس تەلەفونىنا حابارلاسا الادى. بۇدان بولەك عىلىم جانە جوعارى ءبىلىم مينيسترلىگىنىڭ 1450 بىرىڭعاي بايلانىس ورتالىعى جۇمىس ىستەيدى»، - دەلىنگەن رەسمي حابارلامادا.
سونىمەن قاتار، ادىلەت مينيسترلىگىنىڭ تۇرعىن ءۇيدى جالعا الۋ ماسەلەلەرى بويىنشا تەگىن زاڭگەرلىك كەڭەس بەرەتىن 119 (قالالىق تەلەفون) نەمەسە 58-00-58 بايلانىس نومەرىنە حابارلاسۋعا بولادى (الماتى، استانا).
ەلىمىزدەگى بارلىق جوعارى وقۋ ورىندارىندا قوعامدىق قابىلداۋ كەڭسەلەرى اشىلعان. ول جەرگە ستۋدەنتتەر، ولاردىڭ اتا-انالارى مەن وقىتۋشىلار جۇگىنە الادى.
"ادىرنا" ۇلتتىق پورتالى
