ساياساتتانۋشى ايدوس سارىم «AMANAT» پارتياسىنىڭ كەزەكتەن تىس سەزىندە قانداي جاڭالىقتار بولاتىنىن ايتتى، دەپ حابارلايدى «ادىرنا» ءتىلشىسى.
«ەڭ اۋەلى، سەزد قاراۋىنا پارتيا ترانسفورماتسياسىنىڭ ناقتى جەمىسى رەتىندە جاڭا ساياسي تۇعىرنامانى بەكىتۋ ۇسىنىلادى. بۇل – شيرەك عاسىرعا جۋىق تاريحى بار پارتيا تاريحىندا تۇپنۇسقاسى مەملەكەتتىك تىلدە جازىلعان بىردەن-ءبىر قۇجات دەسەك، اسا قاتەلەسە قويماسپىز. «ءبىز اسان قايعىنىڭ جەرۇيىعى مەن ءال-ءفارابيدىڭ ىزگى قوعام يدەياسىن، ابايدىڭ تولىق ادام كونتسەپتسياسىن، شوقان ءۋاليحانوۆ پەن ىبىراي التىنساريننىڭ اعارتۋشىلىق ميسسياسىن، ءاليحان بوكەيحان باستاعان الاش ارىستارىنىڭ ۇلى مۇراتتارىن ۇلگى-ونەگە تۇتامىز» دەپ باستالاتىن تۇعىرنامىسىنىڭ رۋحاني وزەگى نەدەن باستاۋ الاتىنىن ءوزىڭىز شامالاي بەرىڭىز. قۇجاتتىڭ كىرىسپەسىندە «ءبىز قازاق ءتىلىن دامىتۋعا، ونىڭ كەڭىنەن قولدانىلۋىنا بار كۇش-جىگەرىمىزدى سالامىز» دەپ تايعا تاڭبا باسقانداي انىق جازىلعان. بۇل – اتى ايتىپ تۇرعانداي، پارتيانىڭ الدىڭعى ۇرپاقتاردان امانات ەتىپ قابىلداپ، كەلەشەك ۇرپاق الدىندا مويىنا العان ابىرويلى مىندەتى.
ەكىنشىدەن، جاڭا تۇعىرناما – ەل اۋماعىنداعى بارلىق پارتيالاستىڭ وي ەلەگىنەن وتكەن، جان-جاقتى تالقىلانعان قۇجات. سوڭعى التى ايدا ايماقتاردا وتكەن كەزدەسۋلەردە، پارتيا باستاۋىش ۇيىمدارىنداعى جيىنداردا ونىڭ ءاربىر تۇجىرىمى تالقىعا سالىندى. ودان بولەك، ەلدەگى كوزى قاراقتى، اۋزى دۋالى ساراپشى مامانداردىڭ، ساياساتتانۋشىلار مەن قوعام بەلسەندىلەرىنىڭ سۇزگىسىنەن وتكىزىپ، ولاردىڭ دا پىكىرىن تىڭدادىق. وسىلايشا، كوپشىلىكتىڭ ەلەگىنەن وتكەن، قوعامدىق پىكىردى ەسكەرگەن قۇجات دايىن بولدى.
ۇشىنشىدەن، ساياسي تۇعىرناما – پارتيانىڭ قازىرگى كەزدەگى قوعامدىق-ساياسي جانە الەۋمەتتىك-ەكونوميكالىق جاعدايعا قاتىستى ۇستانىمىن بىلدىرەتىن، پارتيالاستاردى ورتاق ۇيعارىمعا بىرىكتىرەتىن باستى يدەولوگيالىق قۇجات. «AMANAT» پارتياسىنىڭ بۇدان كەيىنگى ۇزاق مەرزىمدى ستراتەگياسى وسى تۇعىرناماعا نەگىزدەلىپ قۇرىلادى.
تورتىنشىدەن، پارتيا ەلدەگى جەتەكشى ساياسي كۇش رەتىندە ەلدەگى بارلىق وزگەرىستەرگە جاۋاپتى. وسى ۋاقىتقا دەيىن پارتيانى سىناۋشىلارعا جاۋاپ – قۇرىلعان كۇننەن بەرى مەملەكەتتىلىكتىڭ ىرگەسىن بەكىتىپ، بويتۇمار تاۋەلسىزدىگىمىزدى ساقتاۋعا كۇش سالىپ كەلە جاتقان پارتيا ەلدىڭ بارلىق جەتىستىكتەرىن دە، جىبەرىلگەن قاتەلىكتەردى دە ءوز موينىنا الادى. ارينە، بۇعان قوسا ەرىكتىلەر قوزعالىسى مەن قايىرىمدىلىق مادەنيەتىن دامىتۋ ارقىلى قوعام مەن ازاماتتاردىڭ جاۋاپكەرشىلىگىن دە ارتتىرۋ كەرەك.بەسىنشىدەن، ساياسي تۇعىرنامانىڭ قۇرىلىمى ادام، ازاماتتىق قوعام جانە مەمەلەكەت ۇعىمدارىنا نەگىزدەلگەن. بۇعان دەيىنگى سۇرلەۋ – كوشباسشىلىق مودەلىنەن سانالى تۇردە باس تارتىپ، ەلدىڭ تۇكپىر-تۇكپىرىندەگى قاراپايىم تۇرعىنداردان قۇرالعان، ءار ءتۇرلى توپتاردان شىققان، ءار قيلى پىكىر-كوزقاراستاعى ازاماتتاردى ورتاق ۇستانىمعا بىرىكتىرگەن شىن مانىندەگى حالىقتىق پارتياعا اينالۋدى كوزدەيدى. حالىققا بەرىلگەن ۋادە، سايلاۋشىلاردىڭ اماناتى – پارتيا ءۇشىن ورىندالۋى بۇلجىماس زاڭمەن پارا-پار.
قورىتا كەلگەندە، «تىرەگىمىز – تاۋەلسىزدىك، تىلەگىمىز – ادىلەت، باعدارىمىز – بىرلىك!» دەيتىن پارتيا ادىلەتتى قازاقستان مۇددەسىنە جۇمىس ىستەيدى.
ساياسي تۇعىرنامانىڭ بۇدان باسقا جاڭالىقتارىن ەرتەڭگى جيىندا ايتامىز»،—دەدى ول.
