قازاقستاننىڭ ەكس-پرەزيدەنتى نۇرسۇلتان نازارباەۆتىڭ نەمەرە ءىنىسى قايرات ساتىبالدىعا قاتىستى سوت ۇكىمى شىقتى. سوت ساتىبالدىنى 6 جىلعا باس بوستاندىعىنان ايىردى، دەپ جازادى "ادىرنا" ۇلتتىق پورتالى.
قايرات ساتىبالدى ءوز كىناسىن تولىق مويىنداپ، ىستەگەن ىسىنە وكىنەتىنىن جەتكىزدى.
"قايرات ساتىبالدىۇلىنىڭ مۇلكى تاركىلەنىپ، 10 جىل مەرزىمگە بەلگىلى ءبىر لاۋازىمداردى اتقارۋ قۇقىعىنان ايىرۋمەن التى جىلعا باس بوستاندىعىنان ايىرىلسىن، – دەدى استانا قالاسى بايقوڭىر اۋدانىنىڭ №2 سوتىنىڭ سۋدياسى نۇرلان باياحمەتوۆ.
ساتىبالدى 28-باپتىڭ 3-بولىگى، 189-باپتىڭ 4-بولىگىنىڭ 2-تارماعى; 195-باپتىڭ 4-بولىگىنىڭ 2-تارماعىمەن كىنالى دەپ تانىلىپ، جازاسىن ورتاشا قاۋىپسىزدىكتەگى مەكەمەدە وتەيتىن بولدى. سونداي-اق ونى ۇلتتىق قاۋىپسىزدىك ورگاندارىنىڭ گەنەرال-مايورى اتاعىنان، "قۇرمەت" جانە "پاراسات" وردەندەرىنەن ايىرۋ تۋرالى ۇسىنىس ەنگىزىلەدى.
ەستەرىڭىزگە سالا كەتەيىك، قايرات ساتىبالدىۇلى 13 ناۋرىزدا ۇستالىپ، وعان اسا ءىرى كولەمدە «قازاقتەلەكوم» اق مەن «كولىككە قىزمەت كورسەتۋ ورتالىعى» اق قارجىسىن جىمقىردى دەگەن ايىپ تاعىلعان بولاتىن.
"ادىرنا" ۇلتتىق پورتالى
