Qazaqstannyń eks-prezıdenti Nursultan Nazarbaevtyń nemere inisi Qaırat Satybaldyǵa qatysty sot úkimi shyqty. Sot Satybaldyny 6 jylǵa bas bostandyǵynan aıyrdy, dep jazady "Adyrna" ulttyq portaly.
Qaırat Satybaldy óz kinásin tolyq moıyndap, istegen isine ókinetinin jetkizdi.
"Qaırat Satybaldyulynyń múlki tárkilenip, 10 jyl merzimge belgili bir laýazymdardy atqarý quqyǵynan aıyrýmen alty jylǵa bas bostandyǵynan aıyrylsyn, – dedi Astana qalasy Baıqońyr aýdanynyń №2 sotynyń sýdıasy Nurlan Baıahmetov.
Satybaldy 28-baptyń 3-bóligi, 189-baptyń 4-bóliginiń 2-tarmaǵy; 195-baptyń 4-bóliginiń 2-tarmaǵymen kináli dep tanylyp, jazasyn ortasha qaýipsizdiktegi mekemede óteıtin boldy. Sondaı-aq ony ulttyq qaýipsizdik organdarynyń general-maıory ataǵynan, "Qurmet" jáne "Parasat" ordenderinen aıyrý týraly usynys engiziledi.
Esterińizge sala keteıik, Qaırat Satybaldyuly 13 naýryzda ustalyp, oǵan asa iri kólemde «Qazaqtelekom» AQ men «Kólikke qyzmet kórsetý ortalyǵy» AQ qarjysyn jymqyrdy degen aıyp taǵylǵan bolatyn.
"Adyrna" ulttyq portaly
