«AMANAT» پارتياسى قر پرەزيدەنتى قاسىم-جومارت توقاەۆتىڭ رەفورماسىن قولداۋعا ارنالعان «بەرەكە – بىرلىكتە!» اتتى اشىق اسپان استىنداعى كونتسەرت ۇيىمداستىردى. كونتسەرت ەلورداداعى ەكسپو اۋماعىندا ءوتىپ، ونى 25 مىڭنان استام قالا تۇرعىندارى مەن قوناقتارى تاماشالادى، دەپ جازادى "ادىرنا" ۇلتتىق پورتالى.
ءوز كەزەگىندە، پارلامەنت ماجىلىسىندەگى «AMANAT» پارتياسىنىڭ دەپۋتاتى ەلنۇر بەيسەنباەۆ پرەزيدەنتتىك مانداتتى ۇزاقتىعى 7 جىل ءبىر مەرزىمگە شەكتەۋ جونىندەگى رەفورمانىڭ ماڭىزدىلىعىن اتاپ ءوتتى.
«بۇدان بىلاي مەملەكەت باسشىسى تەك ءبىر رەت قانا پرەزيدەنت بولۋ مۇمكىندىگىنە يە بولادى. ول قايتا سايلانا المايدى. پرەزيدەنت ءبىر مەرزىمگە، ءبىر-اق رەت 7 جىلعا سايلاناتىن بولادى. زاڭناماداعى قۇقىقتىق كولليزيانى جويۋ ءۇشىن، بۇل وزگەرىستى، جاڭاشىل ساياسي رەفورمانى بيىلدان باستاۋمىز قاجەت. ياعني، الداعى 20 جىلدىقتا ءسىز بەن ءبىز، جاڭادان سايلانعان ەڭ كەمى 3 پرەزيدەنتتى كورەتىن بولامىز», – دەدى حالىق قالاۋلىسى.
پارلامەنت ماجىلىسىندەگى «AMANAT» پارتياسىنىڭ تاعى ءبىر دەپۋتاتى گەننادي شيپوۆسكيح مەملەكەت باسشىسىنىڭ ۇلتتىق قوردىڭ ينۆەستيتسيالىق تابىسىنىڭ 50%-ىن 18 جاسقا تولعانعا دەيىن بالالاردىڭ شوتىنا اۋدارۋ باستاماسىنا باسا نازار اۋداردى.
«ەستەرىڭىزدە بولسا، ءبىز باياعىدان ارمانداپ كەلگەن دۇنيەمىز ىسكە استى. بۇل اراب ەلدەرىندەگىدەي ءار بالا ومىرگە كەلگەن كەزدە، ارنايى شوت اشىلىپ، كامەلەت جاسقا تولعانشا اقشا اۋدارىلادى. بولاشاقتا ونى ءاربىر جاس باسپانالى بولۋى مەن ءبىلىم الۋىنا قولدانا الادى. بۇل ءۇشىن ۇلتتىق قوردىڭ ينۆەستيتسيالىق تابىسىنىڭ تەڭ جارتىسى جۇمسالادى. مەملەكەت باسشىسىنىڭ بۇل باستاماسى ءاربىر وتباسىعا جاسالعان تىكەلەي قامقورلىق»، – دەپ اتاپ ءوتتى گەننادي شيپوۆسكيح.
«AMANAT» پارتياسىنىڭ «جاستار رۋحى» جاستار قاناتىنىڭ توراعاسى نۇرجان جەتپىسباەۆتىڭ ايتۋىنشا، ەلىمىزدە بولىپ جاتقان وقيعالارعا بەي-جاي قارامايتىن بەلسەندى جاستار جەتىپ ارتىلادى.
«ەلىمىزدە وتانشىل ءارى بەلسەندى، مىقتى جاستارىمىز جەتەرلىك. سوڭعى 3 جىلدا بولعان ارىس، ماقتارال وقيعاسى جانە پاندەميا كەزىندە ەلىمىز بويىنشا «جاستار رۋحى» ۇيىمى 10 مىڭنان استام ۆولونتەردى توپتاستىردى. قوستاناي وڭىرىندەگى ءورت كەزىندە دە ءبىزدىڭ جاستارىمىز بىرىگە ءبىلدى. «اMANAT» پارتياسى بارلىق وڭىردە گۋمانيتارلىق كومەك قابىلداۋ پۋنكتتەرىنە 1 200 توننادان استام تۇرمىستىق جانە قۇرىلىس زاتتارىن جينادى. بۇل ىسكە ءاربىر ايماقتىڭ جاناشىر تۇرعىنى ءوز ۇلەسىن قوستى. ەلدىڭ تاپسىرعان اماناتىن، مەنىڭ جاس رۋحتاستارىم توبىل-تورعاي جۇرتىنا ۋاقىتىلى تابىستادى. مەملەكەت باسشىسى ۆولونتەرلەرىمىزدىڭ اتقارعان ەڭبەگىن جوعارى باعالاپ، العىس ايتتى»، – دەدى نۇرجان جەتپىسباەۆ.
ءسويتىپ، قالا تۇرعىندارى مەن قوناقتارىنىڭ الدىندا قازاقستاندىق ەسترادا جۇلدىزدارى ونەر كورسەتتى. ولاردىڭ اراسىندا ميراس جۇگىنىسوۆ، نازيما، Ninety One, ايقىن تولەپبەرگەن، ەرنار ايدار، ديلناز احماديەۆا، Yenlik, 2 RAR, De Lacure, ۇلىقپان جولداسوۆ، التىناي جوراباەۆا، بەيبىت قورعان، قانات جانە سۆەتلانا ايتباەۆتار، ايدىن جۇماباەۆ، زارينا وماروۆا، ەستاي مۇقاشەۆ، مايرا ءىلياسوۆا، حايرولدا مۇراتبەك، ارايلىم راحىم، سونداي-اق مەملەكەتتىك اكادەميالىق فيلارمونيانىڭ ارتىستەرى ءان شىرقادى.
"ادىرنا" ۇلتتىق پورتالى
