9 قىركۇيەك كۇنى قاراعاندى قالاسىنىڭ اكىمدىگى عيماراتىندا ۇلت قۇندىلىقتارىن ساقتاۋ مەن ناسيحاتتاۋعا باعىتتالعان قازاق كۇنتىزبەسىندەگى 9 قىركۇيەك – الاش ۇرانى كۇنىنە وراي الاش قوزعالىسىنىڭ كورنەكتى وكىلدەرىنىڭ ءبىرى ءالىمحان ەرمەكتىڭ ەسىمىن ۇلىقتاۋعا باعىتتالعان ساۋلەت جوباسىنىڭ تانىستىرىلىمى ءوتتى.
قولعا الىنعان بۇل جۇمىستار اياسىندا الاش ارداقتىسى ماڭگىلىك مەكەنىن تاپقان زيراتتىڭ باسى اباتتاندىرىلىپ، اينالاسى جونگە كەلتىرىلەدى. سونىمەن قاتار گۇلزار، جۇرگىنشىلەر جولى سالىنىپ، جارىقتاندىرۋ جۇرگىزىلىپ، جولعا تاس پەن اسفالت توسەلىپ، ورىندىقتار قويىلادى.
ءتيىستى قاۋىپسىزدىك شارالارىن قامتاماسىز ەتۋ ماقساتىندا باقىلاۋ كامەرالارىن ورناتۋ كوزدەلۋدە.
جوسپار بويىنشا اللەيانىڭ ۇزىندىعى 350 مەتر، ال ەنى 10 مەتر بولماقشى. شارانىڭ ۇيىمداستىرىلۋىنا ۇيىتقى بولعان قالالىق ءماسليحاتتىڭ حاتشىسى قۇدايبەرگەن بەكسۇلتانوۆ قازىردىڭ وزىندە بۇل جۇمىستاردىڭ باستالىپ كەتكەنىن ءسوز ەتتى.
سونداي-اق ءالىمحان ەرمەك زيراتىنىڭ باسى ءمارمار تاسپەن قاپتالىپ، قازاقى ناقىشتا شاڭىراق ورناتىلادى. بۇل رەتتە ساۋلەتشىلەر زيراتتىڭ باستاپقى سالىنعان ۇلگىسىن تولىقتاي ساقتاپ قالۋدى ماقسات تۇتىپ وتىر.
شاراعا جينالعان قاۋىم بۇل يگى باستامانى جىلى قابىلداپ، ءوز ۇسىنىستارىن ورتاعا سالدى. ال الاش ارداقتىسى ءالىمحان ەرمەك ەڭبەك ەتكەن قاراعاندى پوليتەحنيكالىق ۋنيۆەرسيتەتىنىڭ ەرىكتى ستۋدەنت جاستارى بۇل جۇمىستارعا قاتىسۋعا ءازىر ەكەندىكتەرىن ءبىلدىردى.
قولعا الىنعان بۇل يگى ءىس بارشا قازاق حالقى ءۇشىن قۋانىشتى جاڭالىق بولارى ءسوزسىز. ءوز تاراپىمىزدان ۇلت مۇددەسىن تۇگەندەپ، وسى جوبانى قولعا العان ازاماتتارعا ساتتىلىك تىلەيمىز!
ن.سۇرشاۇلى،
"ادىرنا" ۇلتتىق پورتالى
