9 qyrkúıek kúni Qaraǵandy qalasynyń ákimdigi ǵımaratynda ult qundylyqtaryn saqtaý men nasıhattaýǵa baǵyttalǵan Qazaq kúntizbesindegi 9 qyrkúıek – Alash urany kúnine oraı Alash qozǵalysynyń kórnekti ókilderiniń biri Álimhan Ermektiń esimin ulyqtaýǵa baǵyttalǵan sáýlet jobasynyń tanystyrylymy ótti.
Qolǵa alynǵan bul jumystar aıasynda Alash ardaqtysy máńgilik mekenin tapqan zırattyń basy abattandyrylyp, aınalasy jónge keltiriledi. Sonymen qatar gúlzar, júrginshiler joly salynyp, jaryqtandyrý júrgizilip, jolǵa tas pen asfalt tóselip, oryndyqtar qoıylady.
Tıisti qaýipsizdik sharalaryn qamtamasyz etý maqsatynda baqylaý kameralaryn ornatý kózdelýde.
Jospar boıynsha alleıanyń uzyndyǵy 350 metr, al eni 10 metr bolmaqshy. Sharanyń uıymdastyrylýyna uıytqy bolǵan qalalyq máslıhattyń hatshysy Qudaıbergen Beksultanov qazirdiń ózinde bul jumystardyń bastalyp ketkenin sóz etti.
Sondaı-aq Álimhan Ermek zıratynyń basy mármár taspen qaptalyp, qazaqy naqyshta shańyraq ornatylady. Bul rette sáýletshiler zırattyń bastapqy salynǵan úlgisin tolyqtaı saqtap qalýdy maqsat tutyp otyr.
Sharaǵa jınalǵan qaýym bul ıgi bastamany jyly qabyldap, óz usynystaryn ortaǵa saldy. Al Alash ardaqtysy Álimhan Ermek eńbek etken Qaraǵandy polıtehnıkalyq ýnıversıtetiniń erikti stýdent jastary bul jumystarǵa qatysýǵa ázir ekendikterin bildirdi.
Qolǵa alynǵan bul ıgi is barsha qazaq halqy úshin qýanyshty jańalyq bolary sózsiz. Óz tarapymyzdan ult múddesin túgendep, osy jobany qolǵa alǵan azamattarǵa sáttilik tileımiz!
N.SURShAULY,
"Adyrna" ulttyq portaly
