قر توتەنشە جاعدايلار مينيسترلىگى قوستاناي وبلىسىنداعى قازىرگى احۋالعا قاتىستى سوڭعى مالىمەتتەردى جاريالادى، دەپ جازادى "ادىرنا" ۇلتتىق پورتالى
6 قىركۇيەكتەگى ساعات 08.00 بويىنشا جەدەل اقپاراتقا ءساي ەلدى-مەكەندەرگە قاۋىپ ءتونىپ تۇرعان جوق.
«جالىنداپ جانىپ جاتقان ۋچاسكەلەر جوق، قالدىق وت وشاقتارىن ءسوندىرۋ جۇمىستارى جۇرگىزىلىپ جاتىر. ءاربىر ەلدىمەكەندە (امانقاراعاي، لەسنوە، وزەرنوە، باعانالى جانە كالينينو اۋىلدارى اۋدانىندا) قاراۋىلداۋ ۇيىمداستىرىلدى. جەڭىل جاۋىننىڭ ارقاسىندا اۋا ىلعالدىعى كۇشەيدى. ساعات 7:30 باستاپ ءورت اۋماعىنا ۇشۋ جۇمىستارى جۇرگىزىلىپ جاتىر»، - دەلىنگەن تجم حابارلاماسىندا.
ورتتەن بارلىعى 91 تۇرعىن ءۇي زارداپ شەكتى: 85 امانقاراعاي اۋىلىندا جانە 6 وزەرنىي اۋىلىندا ورنالاسقان.
ءورتتى سوندىرۋگە قۇرامىندا 224 بىرلىك تەحنيكا، 6 اۋە كەمەسى، 5 ءورت ءسوندىرۋ پويىزى، جەكە قۇرامنىڭ 2193 ادامى بار تجم، ءىىم، ۇۇ، قورعانىسمينى، جاو جانە وبلىستىڭ كوممۋنالدىق قىزمەتتەرىنىڭ كۇشتەرى مەن قۇرالدارى جۇمىلدىرىلدى.
«11 ادام (حالىقتىڭ 6 ادامى، ونىڭ ىشىندە ءبىر كامەلەتكە تولماعان ادام، ورمان شارۋاشىلىعىنىڭ 1 قىزمەتكەرى، اكىمدىكتىڭ 1 قىزمەتكەرى، تجم 3 قىزمەتكەرى) جەڭىل جانە ورتاشا اۋىرلىقتاعى جاراقات الىپ، كۇيىك شالدى، سونداي-اق ۋلانىپ قالعاندار بار، 1935 جىلى تۋعان ءبىر ادام قازا تاپتى»، - دەلىنگەن حابارلامادا.
ايتا كەتەيىك، 4 قىركۇيەكتە ءورت اۋماعى 43 مىڭ گەكتاردان استى، ورمان شارۋاشىلىعىنىڭ جالپى اۋدانى - 107 257 گا. تجم جەدەل جەلىسى جۇمىس ىستەيدى، تجم مەن قوستاناي وبلىسىنىڭ تجد پسيحولوگتارىنىڭ جۇمىسى ۇيىمداستىرىلدى. تجم جەدەل جەلىسىنە اقپاراتتىق سيپاتتاعى 37 قوڭىراۋ كەلىپ تۇسكەن. اۋليەكول اۋدانىنىڭ ەۆاكوپۋنكتىندە جەتى پسيحولوگ شۇعىل پسيحولوگيالىق كومەك كورسەتەدى. 57 ادامعا كونسۋلتاتيۆتىك كومەك كورسەتىلدى جانە توپتىق جۇمىس فورماتىمەن 45 بالا قامتىلدى. ءورت ءسوندىرۋ جۇمىستارى جالعاسىپ جاتىر.
"ادىرنا" ۇلتتىق پورتالى
