نۇرلىبەك نالىباەۆ 2 جاسار ءسابيدى قۇتقارعان ارمان امانجولوۆقا پاتەر كىلتىن تابىستادى. بۇل تۋرالى Aikyn.kz جاريالادى، دەپ حابارلايدى “ادىرنا” ۇلتتىق پورتالى.
ەسكە سالايىق، وتكەن اپتادا قالا ورتالىعىنداعى «ۋنيۆەرسام» شاعىن اۋدانىندا وقىس وقيعا ورىن الىپ، ەكى جارىم جاستاعى ءسابي اشىق تۇرعان كارىز قۇدىعىنا ءتۇسىپ كەتكەن. ارالدان ارمان قۋىپ، وقۋعا كەلگەن 15 جاستاعى ارمان امانجولوۆ وقيعا ساتىندە كوزسىز ەرلىككە بارىپ، بالانى قۇدىقتان الىپ شىقتى.
بوزبالانىڭ باتىرلىعىنا تەك جەرلەستەرى عانا ەمەس، تۇتاس ەل بولىپ قۋانىپ، ەرلىگىنە ءتانتى بولدى. بۇگىن وبلىس اكىمى نۇرلىبەك نالىباەۆ پەداگوگتاردىڭ تامىز كەڭەسىندە مۇقالماس ەرىك-جىگەرىمەن، تاباندى تاۋەكەلگە بارعان ارالدىق ارمانعا دەمەۋشىلەر كومەگىمەن پاتەر كىلتىن تابىس ەتتى.
“مەملەكەت باسشىسى تاراپىنان ازاماتتارىمىزدىڭ مۇنداي ەرەكشە باتىل قيمىلدارىن ەلەۋسىز قالدىرماي، وزگەلەرگە ۇلگى ەتۋ تۋرالى ۇستانىمى اياسىندا بۇگىن ارمان باتىرعا، ونىڭ اتا-اناسىنا بارشا سىر ەلىنىڭ اتىنان زور ريزاشىلىعىمىزدى بىلدىرەمىن. بۇگىندە ايماعىمىزدا جومارت جۇرەكتى جاناشىر ازاماتتار جەتەرلىك. سول دەمەۋشىلەردىڭ اتىنان بۇگىنگى بەيبىت كۇننىڭ باتىرى بولعان بوزبالاعا باسپانا كىلتىن تابىس ەتەمىز.
قاراپايىم عانا اۋىل بالاسىنىڭ بۇل ەرلىگى ءوزى سياقتى قاتار جۇرگەن بالالارعا ۇلگى بولسىن، ەلدىڭ ىشىندە وسىنداي ازاماتتار كوپ بولسىن”، – دەدى ن.نالىباەۆ.
ايتا كەتەيىك، ارمان امانجولوۆ ارال اۋدانى، بوگەن اۋىلىندا 2007 جىلى دۇنيەگە كەلگەن. 5 اعايىندى، 2 تاتەسى، 2 اعاسى بار. اكەسى جاڭالىق جۇمىسسىز، اناسى مايرا مەكتەپ اسحاناسىندا جۇمىس ىستەيدى.
”ادىرنا” ۇلتتىق پورتالى
