Nurlybek Nálibaev 2 jasar sábıdi qutqarǵan Arman Amanjolovqa páter kiltin tabystady. Bul týraly Aikyn.kz jarııalady, dep habarlaıdy “Adyrna” ulttyq portaly.
Eske salaıyq, ótken aptada qala ortalyǵyndaǵy «Ýnıversam» shaǵyn aýdanynda oqys oqıǵa oryn alyp, eki jarym jastaǵy sábı ashyq turǵan káriz qudyǵyna túsip ketken. Araldan arman qýyp, oqýǵa kelgen 15 jastaǵy Arman Amanjolov oqıǵa sátinde kózsiz erlikke baryp, balany qudyqtan alyp shyqty.
Bozbalanyń batyrlyǵyna tek jerlesteri ǵana emes, tutas el bolyp qýanyp, erligine tánti boldy. Búgin oblys ákimi Nurlybek Nálibaev pedagogtardyń tamyz keńesinde muqalmas erik-jigerimen, tabandy táýekelge barǵan araldyq Armanǵa demeýshiler kómegimen páter kiltin tabys etti.
“Memleket basshysy tarapynan azamattarymyzdyń mundaı erekshe batyl qımyldaryn eleýsiz qaldyrmaı, ózgelerge úlgi etý týraly ustanymy aıasynda búgin Arman batyrǵa, onyń ata-anasyna barsha Syr eliniń atynan zor rızashylyǵymyzdy bildiremin. Búginde aımaǵymyzda jomart júrekti janashyr azamattar jeterlik. Sol demeýshilerdiń atynan búgingi beıbit kúnniń batyry bolǵan bozbalaǵa baspana kiltin tabys etemiz.
Qarapaıym ǵana aýyl balasynyń bul erligi ózi sııaqty qatar júrgen balalarǵa úlgi bolsyn, eldiń ishinde osyndaı azamattar kóp bolsyn”, – dedi N.Nálibaev.
Aıta keteıik, Arman Amanjolov Aral aýdany, Bógen aýylynda 2007 jyly dúnıege kelgen. 5 aǵaıyndy, 2 tátesi, 2 aǵasy bar. Ákesi Jańalyq jumyssyz, anasy Maıra mektep ashanasynda jumys isteıdi.
”Adyrna” ulttyq portaly
