جامبىل وبلىسىنىڭ اكىمى نۇرجان نۇرجىگىتوۆ جۋرناليستەردى كاسىبي مەرەكەلەرىمەن قۇتتىقتادى. سالتاناتتى شاراعا جۋرناليستيكا ارداگەرلەرى، جەرگىلىكتى باق باسشىلارى، رەسپۋبليكالىق، وبلىستىق، اۋداندىق گازەتتەر مەن تەلەارنالاردىڭ قىزمەتكەرلەرى شاقىرىلدى.
ايماق باسشىسى مەملەكەتتىڭ اقپاراتتىق ساياساتىن جۇزەگە اسىرۋدا بۇقارالىق اقپارات قۇرالدارىنىڭ ءرولى زور ەكەنىن اتاپ ءوتىپ، جۋرناليستەر حالىق پەن بيلىك اراسىنداعى دانەكەر ەكەنىن ايتتى.
- حالىق جازۋشىسى، جەرلەسىمىز، قابىرعالى قالامگەر شەرحان مۇرتازا اعامىز: «ءجۋرناليستىڭ جەگەنى – جانتاق، ارقالاعانى – التىن»، - دەپ باعا بەرگەندەي، راسىندا، سىزدەردىڭ كاسىپتەرىڭىزدىڭ مارتەبەسى بيىك، جاۋاپكەرشىلىگى زور!
قازىرگى تاڭدا قوعام ءومىرى مەن دامۋىن باق وكىلدەرىنسىز ەلەستەتۋ قيىن. جۋرناليستەر حالىقتى تولعاندىرىپ جۇرگەن ماسەلەلەر تۋرالى ايتىپ، ولاردىڭ شەشىلۋىنە تىكەلەي اتسالىسادى. جەرگىلىكتى اتقارۋشى بيلىك وكىلدەرى سىزدەردىڭ ۇسىنىستارىڭىز بەن باستامالارىڭىزعا ارقاشان اشىق، تىعىز بايلانىستا جۇمىس ىستەۋگە دايىن، - دەدى نۇرجان نۇرجىگىتوۆ.
وبلىس اكىمىنىڭ ايتۋىنشا، بۇگىنگىدەي الەۋمەتتىك جەلىدە نەگىزسىز، ءجون-جوسىقسىز جازعىشتار كوبەيگەن تۇستا، حالىققا جەدەل ءارى سەنىمدى اقپارات تاراتاتىن كاسىبي جۋرناليستەردىڭ ورنى قاشان دا جوعارى.
ايماق باسشىسى ءتورتىنشى بيلىكتىڭ جاڭا قازاقستاندى قۇرۋدا، ەل پرەزيدەنتى قاسىم-جومارت توقاەۆ ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدا ماڭىزدى ءرول اتقاراتىنىن اتاپ ءوتتى.
سونداي-اق، حالىق جازۋشىسى، ءبىرتۋار تۇلعا شەرحان مۇرتازانىڭ 90 جىلدىعى، اقىن، جازۋشى-پۋبليتسيست، جۋرناليست ارعىنباي بەكبوسىننىڭ 85, وبلىستىق «Aq jol» گازەتىنىڭ 100 جىلدىعىنا وراي جوسپارلانعان ءىس-شارالارعا دا توقتالدى.
جيىندا قازاقستان جازۋشىلار وداعىنىڭ مۇشەسى، دراماتۋرگ ەلەن ءالىمجان، قۇرمەتتى جۋرناليست، قازاقستان جازۋشىلار وداعىنىڭ مۇشەسى بەكەت مومىنقۇل ءسوز سويلەپ، ىزگى-لەبىزىن ءبىلدىردى.
بۇل كۇنى بىرقاتار باق قىزمەتكەرلەرىنە ءتۇرلى ماراپاتتار تابىس ەتىلدى. «Aq jol» گازەتىنىڭ ءبولىم مەڭگەرۋشىسى امانگەلدى ءابىل «قازاقستاننىڭ قۇرمەتتى ءجۋرناليسى» توسبەلگىسىمەن، «اۋليەاتا-مەديا» جشس باس ديرەكتورىنىڭ ورىنباسارى الپامىس قازىباەۆ «اقپارات سالاسىنىڭ ۇزدىگى» توسبەلگىسىمەن ماراپاتتالدى.
سونداي-اق، جەرگىلىكتى جانە رەسپۋبليكالىق باق وكىلدەرى قازاقستان رەسپۋبليكاسى اقپارات جانە الەۋمەتتىك دامۋ ءمينيسترىنىڭ، وبلىس اكىمىنىڭ، وبلىستىق ءماسليحاتتىڭ قۇرمەت گراموتالارىمەن جانە العىس حاتتارىنا يە بولدى.
