جاس ۇرپاققا ساپالى بىلىممەن بىرگە پاتريوتتىق تاربيە بەرۋ قاي كەزدە دە وزەكتى. «قازاقستاندىق ءپاتريوتيزمدى قالىپتاستىرۋ مەن دامىتۋ: مىندەتتەرى مەن بولاشاعى» تاقىرىبىمەن ۇيىمداستىرىلعان وبلىستىق جاستار فورۋمىندا ايماق باسشىسى نۇرجان نۇرجىگىتوۆ وسىلاي دەدى.
«جاستار سارايىندا» ۇيىمداستىرىلعان اۋقىمدى شاراعا جەرگىلىكتى اتقارۋشى، قۇزىرلى جانە قۇقىق قورعاۋ ورگان باسشىلارى، زيالى قاۋىم، ارداگەرلەر، اسكەريلەر جانە جاستار، ەرىكتىلەر، پەداگوگتار قاتىستى.
فورۋم باستالماس بۇرىن قوناقتار «وڭتۇستىك» وڭىرلىك قولباسشىلىعى ازىرلەگەن قارۋ-جاراقتار جانە اسكەري كيىم-بۇيىمداردىڭ كورمەسىمەن تانىستى. ساربازداردىڭ قارۋدى شاشى-جيناۋ بويىنشا دايىندىق بارىسى دا كورسەتىلدى. ەكران ارقىلى «جاس سارباز» جاستار مەن جاسوسپىرىمدەر قوزعالىسىنىڭ اتقارعان جۇمىستارى تۋرالى باياندالدى.
بۇدان سوڭ زالعا جينالعاندار نازارىنا قر قارۋلى كۇشتەرىنىڭ 30 جىلدىعىنا وراي ارنايى ازىرلەنگەن ۆيدەوروليك ۇسىنىلدى.
ايماق باسشىسى ءوز سوزىندە ەلىمىزدىڭ ەرتەڭى نۇرلى، بولاشاعى جارقىن بولۋى ءۇشىن بۇگىنگى بۋىن – جاس ۇرپاقتىڭ ءبىلىمدى، تاربيەلى ءارى جاڭاشىل تۇلعا رەتىندە قالىپتاسۋى ماڭىزدى ەكەنىن اتاپ ءوتتى.
- مەملەكەت تاراپىنان ءپاتريوتيزمدى دامىتۋ باعىتىندا كەلەلى شارالار اتقارىلىپ، اۋقىمدى باعدارلامالار جۇزەگە اسۋدا.
جالپى قازىرگى تاڭدا وڭىرىمىزدەگى جاستار سانى 258 مىڭ ادامدى قۇرايدى.
اسكەري-پاتريوتتىق تاربيە باعىتىنداعى جۇمىستار كۇن تارتىبىنەن تۇسپەۋى ءتيىس. بۇل تۇرعىدا بارلىق جاۋاپتى ورىنداردىڭ بىرلەسكەن، كۇشەيتىلگەن جۇمىسقا نەگىزدەلگەن جۇيەلى جوسپارىنىڭ بولۋى ماڭىزدى.
ءبىز جاس ۇرپاقتىڭ بويىنا وتانشىل ءپاتريوتيزمدى، مەملەكەتشىلدىك سانانى قالىپتاستىرۋعا جاپپاي اتسالىسۋىمىز كەرەك.
ءال-فارابي بابامىز «تاربيەسىز بەرىلگەن ءبىلىم – ادامزاتتىڭ قاس جاۋى» دەيدى. ۇلتىم، ەلىم دەگەن، ءبىلىمدى، كوزى اشىق، كوكىرەگى وياۋ ادامدى قالىپتاستىرۋدىڭ جالعىز جولى – ساپالى ءبىلىم مەن سانالى تاربيە. وسى ورايدا، جاستار اراسىنداعى قۇقىق بۇزۋشىلىقتاردى ازايتۋ، ولاردىڭ سالدارىمەن ەمەس، سەبەبىمەن كۇرەسۋ – باستى تالاپ،-دەدى نۇرجان نۇرجىگىتوۆ.
وبلىس اكىمى بالا تاربيەسىندە ەڭ الدىمەن اتا-انانىڭ، وتباسىنىڭ ءرولى جوعارى ەكەنىن باسا ايتىپ، وسى باعىتتاعى جۇمىستاردى كۇشەيتۋ قاجەتتىگىنە نازار اۋدارتتى.
سونداي-اق، مەملەكەت تاراپىنان بالالاردىڭ، جاستاردىڭ بوس ۋاقىتىن ءتيىمدى وتكىزۋ، ءوز-وزدەرىن جان-جاقتى دامىتۋعا بارلىق جاعداي جاسالىپ جاتقانىن جەتكىزىپ، ولار «ەلىم ماعان نە بەردى دەپ ەمەس، مەن ەلىمە نە بەرەمىن» دەگەن ۇستانىممەن، العا ۇمتىلۋى، ءوز ەلىنىڭ پاتريوتى بولۋى تيىستىگىن اتاپ ءوتتى.
وبلىس پروكۋرورى نۇرعالىم ءابدىروۆ جامبىلدىق جاستاردىڭ ءتۇرلى سالاداعى جەتىستىكتەرىن تىلگە تيەك ەتىپ، قۇقىقتىق مادەنيەت پەن ساۋاتتىلىقتى ارتتىرىپ، بۇزۋشىلىقتاردىڭ الدىن-الۋ باعىتىندا قولعا الىنىپ جاتقان شارالارعا توقتالدى.
قازىرگى تاڭدا وبلىس پروكۋراتۋراسىنىڭ ۇسىنىسىمەن
2022 - 2025 جىلدارعا ارنالعان جاستار مەن كامەلەتكە تولماعانداردى وتانسۇيگىشتىك رۋحتا تاربيەلەۋ، قۇقىقتىق مادەنيەتىن كوتەرۋ، رۋحاني-ىزگىلىك جانە پاتريوتتىق قۇندىلىقتارعا باۋلۋ، جۇمىسسىزدىق دەڭگەيىن تومەندەتۋ، وتباسى-تۇرمىستىق سالاداعى قۇقىقبۇزۋشىلىقتىڭ الدىن الۋعا باعىتتالعان بىرلەسكەن كەشەندى جوسپار ازىرلەنۋدە.
سونداي-اق، باسقوسۋ بارىسىندا «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى مەرەكە كۋچەكباەۆ، جامبىل وبلىسى قورعانىس ىستەرى جونىندەگى دەپارتامەنتىنىڭ باستىعى عالىمجان تاسجانوۆ، «تاراز قالالىق اۋعان سوعىسى ارداگەرلەرى مەن مۇگەدەكتەر وداعى» قوعامدىق بىرلەستىگىنىڭ توراعاسى دۇكەنباي ەرمەكوۆ، «وڭتۇستىك» وڭىرلىك اسكەردىڭ جاس ساربازى اباي ابىشەۆ تە ءوز ويلارىن ورتاعا سالىپ، ماڭىزدى ۇسىنىستارىن ءبىلدىردى. ولار قازاقستاندىق ءپاتريوتيزمدى دامىتا وتىرىپ، جاستاردى ەلجاندى، سانالى، ءبىلىمدى ازامات بولىپ قالىپتاسۋعا شاقىردى.
جيىندا جاستار اراسىنداعى قىلمىس جانە جۇمىسسىزدىق دەڭگەيىن تومەندەتۋ، «قاڭتار وقيعاسىنىڭ» قاتىسۋشىلارىنىڭ باسىم بولىگى جاستاردان قۇرالۋى، اسكەرگە بارۋ سەكىلدى ماسەلەلەر سارالاندى.
نۇرجان نۇرجىگىتوۆ ايتىلعان بارلىق ۇسىنىستار ەسكەرىلەتىنىن جەتكىزدى.
جينالعاندارعا گۆاردەيسك گارنيزونى ساربازدارىنىڭ اسكەردەگى قىزمەت بارىسى تۋرالى بەينەروليك كورسەتىلدى.
فورۋم جۇمىسى ءتۇرلى سەكتسيالار بولىنىسىندە جالعاستى.
