بۇگىنگە دەيىن قىزىلوردالىقتار ەلەكتر ەنەرگياسى ماسەلەسىنە الاڭداپ كەلدى. سەبەبى قالاداعى ەلەكتر جىلۋ ورتالىعى 50-60 جىلدان بەرى ۇزدىكسىز جۇمىس جاساعاندىقتان، ەلەكتر جەلىلەرىنىڭ دە ابدەن توزىعى جەتكەن. بۇل ءسوزسىز ەلەكتر جۇكتەمەسىنە سالماق سالادى. وزەكتى ماسەلەلەردى ءوز ۋاقىتىندا نازارعا العان ايماق باسشىسى نۇرلىبەك نالىباەۆ ەنەرگەتيكا مينيسترلىگىمەن ءتيىستى جۇمىستاردى اتقارىپ، بىرلەسكەن تۇردە وڭتايلى شەشىم قابىلدادى.
ناتيجەسىندە سىر ەلىندە بۇرىن-سوڭدى بولماعان زاماناۋي ۇلگىدەگى قۋاتتىلىعى 240 مەگاۆاتقا جەتەتىن ەلەكتر ورتالىعى سالىنباق.
مامىر ايىنداعى سىر ەلىنە ساپارى بارىسىندا مينيستر بولات اقشولاقوۆ مۇنداي مۇمكىندىك العاش بولىپ قىزىلوردا وڭىرىندە باستاۋ العانىن تىلگە تيەك ەتكەن ەدى. تاياۋدا عانا نىسان قۇرىلىسىن جۇرگىزەتىن ينۆەستور كومپانيا انىقتالىپ، العاشقى جۇمىستار باستالسا، بۇگىن ارنايى جيىندا نۇرلىبەك نالىباەۆ ينۆەستور تۇرىك كومپانياسىنىڭ وكىلدەرىمەن كەزدەسىپ، جوبانىڭ جۇزەگە اسىرۋ ماسەلەلەرىن قارادى.
وتىرىسقا جاڭا جىلۋ ورتالىعىنىڭ ينۆەستورى «اكسا ەنەردجي» تۇرىك كومپانياسىنىڭ قازاقستانداعى باسشىسى مۋستافا كەمال مەن قر ەنەرگەتيكا مينيسترلىگىنىڭ جاڭارتىلاتىن ەنەرگيا كوزدەرىن قولداۋ جونىندەگى قارجى-ەسەپ ايىرىسۋ ورتالىعىنىڭ ديرەكتورى گۇلجان قاليجانقىزى قاتىسىپ، تاراپتار اراسىندا ەكىجاقتى كەلىسىم-شارت جاسالدى.
- مەملەكەت باسشىسى قاسىم-جومارت كەمەلۇلى توقاەۆ ۇكىمەتتىڭ كەڭەيتىلگەن وتىرىسىندا وڭتۇستىك وڭىرلەردى ۇزدىكسىز ەلەكتر ەنەرگياسىمەن قامتاماسىز ەتۋ ماقساتىندا 3 جىلدا قۋاتتىلىعى 1000 مەگاۆاتت مانەرۆلىك ستانتسيالار سالۋدى تاپسىرعان بولاتىن.
جاڭا نىساندى سالۋ جەرلەستەرىم ءۇشىن ايتۋلى جاڭالىق دەسە دە بولادى. يگىلىكتى ىسكە قولداۋ بىلدىرگەن مينيستر بولات اقشولاقوۆقا جانە شەتەلدىك “اكسا ەنەردجي” كومپانياسىنىڭ باسشىلىعىنا سىر جۇرتىنىڭ اتىنان العىسىمدى بىلدىرەمىن.
ايماق تاريحىنداعى ماڭىزدى جوبانىڭ ساپالى جانە ۋاقىتىندا جۇزەگە اسىرىلۋى ءۇشىن بار كۇش-جىگەرىمىز بەن مۇمكىندىكتەرىمىزدى جۇمسايتىن بولامىز،-دەدى ن.نالىباەۆ.
جيىندا تۇرىك كومپانياسىنىڭ قازاقستانداعى باسشىسى مۋستافا كەمال جاڭا نىسان 2025 جىلى ەل يگىلىگىنە بەرىلەتىنىن جەتكىزدى.
“بۇل جوبانىڭ قىزىلوردا ءۇشىن عانا ەمەس، قازاقستانعا دا بەرەرى مول بولادى دەپ سەنەمىن. كەلەشەكتە وسى نىسان ەنەرگيكالىق قاۋىپسىزدىكتى ساقتاۋعا ايرىقشا مۇمكىندىك بەرەدى” دەدى مۋستافا كەمال.
باسقوسۋدا ەل اعالارى مەن ەنەرگەتيكا سالاسىنىڭ ارداگەرلەرى يگىلىكتى ءىستىڭ العاشقى قادامىنا كۋا بولىپ، عاسىردا ءبىر سالىناتىن نىساندى ەلدىڭ نەسىبەسىنە بالادى.
«اكسا ەنەردجي» تۇرىك كومپانياسى مازۋت، تابيعي گاز، جەل گەنەراتورلارى مەن سۋ ەلەكتر ستانتسيالارىندا ەلەكتر ەنەرگياسىن ءوندىرۋ سالاسىنداعى الەمدىك تاجىريبەسى مول، جەتەكشى كومپانيالاردىڭ ءبىرى.
ايتۋ كەرەك، جالپى قۇنى 215 ملرد.تەڭگەدەن اساتىن جاڭا نىسان ەنەرگيا جەتىسپەۋشىلىگىن ەداۋىر تومەندەتەدى. بۇل تاۋەلسىزدىك العان جىلدارى ەلىمىزدە بيۋدجەتتەن تىس قارجى كوزدەرىنەن، ياعني شەتەلدىك ينۆەستورلاردىڭ قارجىسىنا ىسكە اسىرىلاتىن ەڭ اۋقىمدى تەڭدەسسىز جوبا!
ەسكە سالايىق، بيىل وبلىس بويىنشا 23 الەۋمەتتىك نىساننىڭ جىلۋ قازاندىعى قايتا جاڭعىرتىلادى. وسى جۇمىستارعا رەسپۋبليكالىق جانە وبلىستىق بيۋدجەتتەن 676 ملن.تەڭگە ءبولىندى.
