ىشىمدىك ىشكەن 17 جاسار جامبىلدىق بىرەۋدىڭ كولىگىن ايداپ اكەتكەندىگى انىقتالدى. سارىسۋ اۋدانى پوليتسيا ءبولىمىنىڭ قىزمەتكەرلەرى تۇنگى پاترۋلدەۋ كەزىندە جاڭاتاس قالاسىنىڭ ورتالىق كوشەلەرىنىڭ بىرىندە قوزعالىسى كۇدىك تۋدىرعان اۆتوكولىكتى بايقاعان. اتالعان كولىك جۇرگىزۋشىسى پوليتسيا قىزمەتكەرلەرىنىڭ توقتاۋ تۋرالى ەسكەرتۋىن ەلەمەي، باعىتىن وزگەرتىپ قاشپاقشى بولعاندا جول شەتىندەگى تسەمەنت قاپتالعا سوعىسقان.
قۇقىقبۇزۋشى كامەلەتكە تولماعان 17 جاستاعى تاراز قالاسىنىڭ تۇرعىنى بولىپ شىقتى. سونداي-اق ونىڭ بىرەۋدىڭ كولىگىن ۇرلاپ ايداپ كەتكەندىگى جانە ماساڭ كۇيدە بولعانى انىقتالدى. الايدا يەسى كولىگىنىڭ ۇرلانعاندىعىنان حابارسىز بولعان.
اتالعان دەرەككە قاتىستى قر قك-ءنىڭ 200-بابى 1-بولىگىمەن ء(اۆتوموبيلدى جىمقىرۋ ماقساتىنسىز قۇقىققا سيىمسىز يەلەنىپ الۋ) سوتقا دەيىنگى تەرگەۋ امالدارى جۇرگىزىلۋدە. سونىمەن قاتار وعان قر اقبتك 608-بابى 8-بولىگىمەن حاتتاما تولتىرىلدى.
قازىرگى تاڭدا ول جامبىل وبلىستىق ءبىلىم باسقارماسىنىڭ قىزمەتكەرلەرىمەن تاراز قالاسىنداعى جاسوسپىرىمدەر ۇيىنە جەتكىزىلدى.
