تاراز كينوتەاترىندا مەكتەپ وقۋشىلارى مەن كوللەدج ستۋدەنتتەرى ەسىرتكى زاتتارىنىڭ قاۋىپتىلىگى تۋرالى “تۇزدار مەن سپايستار”، “ەشقايدا جول جوق” فيلمدەرىن تاماشالادى.
اتالمىش كينوكورسەتىلىمدى جامبىل وبلىسى اكىمدىگىنىڭ مادەنيەت، مۇراعاتتار جانە قۇجاتتاما باسقارماسىنىڭ وبلىستىق كينو ورتالىعى جانە ءبىلىم باسقارماسىنىڭ قولداۋىمەن جامبىل وبلىسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ۇيىمداستىردى.
فيلمدە ناشاقورلارمەن جۇمىس ىستەيتىن ماماندار سينتەتيكالىق ەسىرتكىگە تاۋەلدىلىكتىڭ قانداي زياندىلىقتار اكەلەتىنى تۋرالى ومىردەن ناقتى مىسالدار كەلتىرە وتىرىپ باياندايدى.
– بىزگە جاستاردىڭ نازارىن ناشاقورلىق ماسەلەسىنە اۋدارۋ ماڭىزدى. ءاربىر ءجاسوسپىرىم، شىن مانىندە، قاۋىپ-قاتەرگە ۇشىراۋى مۇمكىن. بۇگىنگى تاڭدا سينتەتيكالىق ەسىرتكى ۇنەمى ءار تۇرگە وزگەرىپ وتىرادى. جاستار وزدەرىن جانە باسقالاردى تەك قىزىعۋشىلىق دەپ الدايدى. الايدا ناركولوگتار ءبىر جىلدان بەرى سينتەتيكاعا تاۋەلدىلىكتىڭ بىردەن پايدا بولاتىنى تۋرالى دابىل قاعۋدا. سوندىقتان اۋەستەنبەس بۇرىن ونىڭ سالدارى تۋرالى ءجۇز رەت ويلانۋ كەرەك. ەسىرتكى “اۋىر” نەمەسە “جەڭىل” بولمايدى. وعان تاۋەلدى ادامعا ء“بىر جاقتى عانا بيلەت” كەپىلدەندىرىلگەن. وسىعان بايلانىستى، اتا-انالاردى بالالارىنىڭ باراتىن، كورەتىن ينتەرنەت-رەسۋرستار مەن الەۋمەتتىك جەلىلەردى نازارعا الىپ، ءجىتى باقىلاۋعا شاقىرامىز، – دەيدى جامبىل وبلىسى پد ەقىقب باستىعى پوليتسيا پولكوۆنيگى اسقار جۇمابەكوۆ.
