شىمكەنتتىك تۇلەك، «التىن بەلگى» يەگەرى ايبەك بەردىحان الەمنىڭ 28 ۋنيۆەرسيتەتىنەن شاقىرتۋ الدى، دەپ حابارلايدى «ادىرنا» ءتىلشىسى.
بيىل 125 High School مەكتەبىن اياقتاعان جاس دارىنعا الەمنىڭ 7 ەلىنىڭ جوو-سى تەگىن وقۋ مۇمكىندىگىن سىيلاعان.
«اتاپ ايتسام، اقش، ۇلىبريتانيا، تۇركيا، پولشا، ۆەنگريا، ءباا جانە كيپردە ورنالاسقان 28 ۋنيۆەرسيتەتتەن شاقىرتۋ الدىم. 4 مەملەكەت بىردەن وقۋعا قابىلدايتىنىن مالىمدەدى. جەڭگەن گرانتتار قۇنى 700,000 اقش دوللارىن قۇرايدى. سونداي-اق اقش-تاعى Wabash جانە North Central ۋنيۆەرسيتەتتەرى پرەزيدەنتتىك گرانتتارىن ۇسىندى»،– دەدى بىلىمگەر «ادىرنا» تىلشىسىنە بەرگەن سۇقباتىندا.
ايبەك بەردىحان ەكونوميكا سالاسىنىڭ بىلىكتى مامانى بولۋدى ارماندايدى. ول ارتىنان ەرگەن جاس تۇلەكتەرگە ءوز اقىل-كەڭەسىن دە ايتتى.
«قازىرگى زاماننىڭ تالابى – جان-جاقتى بولۋ. سوندىقتان سوعان ىلەسۋ قاجەت. ەرتە جاستان اعىلشىن ءتىلىن ۇيرەنگەندەرىڭىز ابزال»،— دەدى جاس تۇلەك.
