جامبىل وبلىسىنىڭ اكىمى نۇرجان نۇرجىگىتوۆ شۋ اۋدانىندا وتكەن “ەگىنجاي كۇنى - 2022” سەمينارىنا قاتىستى. تاجىريبە الماسۋ ماقساتىندا «Qyzylsha» جشس-ءنىڭ ەگىستىك القابىندا ۇيىمداستىرىلعان شاراعا بارلىق اۋداننىڭ اكىمدەرى مەن ولاردىڭ اۋىل شارۋاشىلىعى سالاسىنا جەتەكشىلىك ەتەتىن ورىنباسارلارى، ەلىمىزگە بەلگىلى عالىمدار، ارنايى ماماندار شاقىرىلعان.
قوناقتار الدىمەن اۆانكامەرامەن جانە «كەلەت» كومپانياسىنىڭ ناسوس قوندىرعىلارىمەن، تەحنيكا، تىڭايتقىش، پەستيتسيد پەن تۇقىم كورمەسىمەن، «Qyzylsha» جشس-ءنىڭ قانت قىزىلشاسى، كارتوپ، داندىك جۇگەرى، ماقسارى جانە «شىعىن» شق-نىڭ پياز القابىمەن تانىستى. سونداي-اق، «Volmant» كومپانياسىنىڭ سۋ ۇنەمدەۋگە نەگىزدەلگەن «Valley» قوندىرعىلارىن كوردى.
سەمينار بارىسىندا ەلىمىزدىڭ ءار وڭىرىنەن كەلگەن ون بەس كومپانيا 30-عا جۋىق اۋىل شارۋاشىلىعى تەحنيكاسىن جانە جابدىق تۇرلەرىن كوپشىلىك نازارىنا ۇسىندى.
جيىننىڭ اشىلۋىندا ايماق باسشىسى وبلىس ەكونوميكاسىنداعى وڭ ديناميكانىڭ قالىپتاسۋىنا اۋىل شارۋاشىلىعى سالاسىنىڭ ۇلەسى ۇلكەن ەكەندىگىن، بيىل اۋا-رايىنىڭ قولايلىلىعىنا بايلانىستى استىقتىڭ بىتىك شىققانىڭ جەتكىزدى.
- اعىمداعى جىلى وبلىس اۋماعىندا اۋىل شارۋاشىلىعى داقىلدارىنىڭ ەگىستىك كولەمى 756 مىڭ گەكتاردى قۇرادى. بۇل وتكەن جىلمەن سالىستىرعاندا 5,4 مىڭعا ارتىپ وتىر.
ءوڭىر ديحاندارى ءداندى داقىلداردى جيناۋدى اياقتاپ، ءار گەكتارىنان 19 تسەنتنەردەن ءونىم الىندى.
كارتوپ، باقشا، كوكونىس جانە مايلى داقىلداردى جيناۋ جۇمىستارى جۇرگىزىلۋدە.
دەگەنمەن، بۇل سالادا قوردالانعان ماسەلەلەر دە از ەمەس.
جالپى 2022 جىلعا مەملەكەتتىك قولداۋ شارالارىنا 31,2 ملرد. تەڭگە ءبولىنىپ، وتكەن جىلمەن سالىستىرعاندا 12 ملرد. تەڭگەگە ارتتى. بۇگىنگى كۇنگە 11 ملرد. تەڭگە قارجى يگەرىلىپ، 6,6 مىڭ شارۋاشىلىققا سۋبسيديا تولەندى. ءار شارۋا مەملەكەتتىك قولداۋدى سەزىنۋى ءتيىس.
بۇگىنگى شارادا قانت قىزىلشاسىن ءوسىرۋدىڭ وزىق تەحنولوگياسىمەن تانىستىق.
وبلىس بويىنشا 120 مىڭ توننادان استام ءتاتتى ءتۇبىر جينالادى دەپ كۇتىلۋدە.
ەگىننەن مول ءونىم الۋ ءۇشىن باستى مىندەت – تۇقىم مەن تەحنيكانى جاڭارتۋ، ەگىستىك القابىن تىڭايتۋ.
بۇگىنگى كۇنگە 34,2 مىڭ توننا تىڭايتقىش الۋعا كەلىسىم-شارت جاسالىپ، ونىڭ 32,1 مىڭ تونناسى شارۋالارعا جونەلتىلدى،-دەي كەلە نۇرجان نۇرجىگىتوۆ وڭىردەگى اۋىل شارۋاشىلىعى تەحنيكالارىن جاڭارتۋ، سۋ ۇنەمدەۋ تەحنولوگيالارىن ەنگىزۋ شارالارىنا دا توقتالىپ ءوتتى.
قازىرگى تاڭدا وبلىس بويىنشا 12 316 دانا اۋىل شارۋاشىلىعى تەحنيكاسى تىركەلگەن دەسەك، اعىمداعى جىلى تەحنيكالاردىڭ جاڭارۋىن وبلىس بويىنشا 11 پايىزعا جەتكىزۋ كوزدەلۋدە. سول سەكىلدى وڭىردە سۋ ۇنەمدەۋ تەحنولوگيالارى وسى جىلى 50 مىڭ گەكتار القاپقا ورنالاستىرىلعان.
ايماق باسشىسى ءوز سوزىندە يرريگاتسيالىق جۇيەلەردى قالپىنا كەلتىرۋ، جايىلىم جەرلەردى ءتيىمدى پايدالانۋ بويىنشا قولعا الىنعان جوبالاردى دا باسا ايتتى.
ءوز كەزەگىندە بىرقاتار اگرارلىق ماسەلەلەرگە قاتىستى عىلىمي ينستيتۋتتاردىڭ وكىلدەرى وڭ ناتيجەلى تاجىريبەلىك ۇلگىلەرىمەن ءبولىستى.
«قازاق ۇلتتىق اگرارلىق زەرتتەۋ ۋنيۆەرسيتەتىنىڭ» اۋىل شارۋاشىلىعى عىلىمدارىنىڭ دوكتورى، پروفەسسور مارات قوجاحمەتوۆ، «قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىنىڭ» ءبىلىمدى تاراتۋ جانە ازىرلەمەلەردى وندىرىسكە ەنگىزۋ ورتالىعىنىڭ باسشىسى سەيىتكارىم قالتاەۆ، «قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ» باسقارما ديرەكتورى تەمىرجان ايتباەۆ، «قازاق قايتا وڭدەۋ جانە تاعام ونەركاسىپتەرى عىلىمي زەرتتەۋ ينستيتۋتىنىڭ» باس عىلىمي قىزمەتكەرى اسان بەكەشۇلى وسپانوۆ جانە تاعى باسقالار وزدەرىنىڭ ورامدى ويلارىن ورتاعا سالدى. ولار تۇقىم شارۋاشىلىعىن دامىتۋ، قىزىلشا مەن جۇگەرى سۇرىپتارىن ءجىتى ءبىلۋ، جاڭا تەحنولوگيالاردىڭ مۇمكىندىگىن ءتيىمدى پايدالانۋ، قوي شارۋاشىلىعىن دامىتۋدىڭ ۇتىمدى تۇستارى، سۋ ۇنەمدەۋ قوندىرعىلارىن كەڭىنەن ەنگىزۋ تۋرالى جان-جاقتى بايانداما جاساپ، اتالعان باعىتتاردا بىرلەسىپ جۇمىس ىستەۋگە، تاجىريبە الماسۋعا دايىن ەكەندىكتەرىن جەتكىزدى.
وبلىس اكىمى جاۋاپتى تۇلعالاردى عىلىمي ينستيتۋتتاردىڭ الەۋەتىنە بارىنشا جۇگىنىپ، ءار اۋداندا تۇقىم شارۋاشىلىعىن جەتىلدىرۋ بويىنشا جۇيەلى ءارى ناتيجەلى جۇمىس جۇرگىزۋگە شاقىردى.
شۋ اۋدانىنداعى جۇمىس ساپارى كەزىندە وبلىس اكىمى نۇرجان نۇرجىگىتوۆ بىرقاتار نىسانداردى جانە قۇرىلىس الاڭدارىن ارالادى.
اتاپ ايتقاندا ايماق باسشىسى “بالاساعۇن” كونە قالاشىعىنىڭ جاي-كۇيىمەن، «تاسوتكەل سۋ قويماسىن» سەيسميكالىق كۇشەيتۋ جۇمىستارىمەن، 75 پاتەرلى كوپ قاباتتى تۇرعىن ءۇيدىڭ جاعدايىمەن، ءال-فارابي مەكتەبىنىڭ قۇرىلىسىمەن، «م-كات گرين» جشس كۇن ەلەكتر ستانتسياسىنىڭ قىزمەتىمەن جانە تاعى باسقا نىساندارمەن تانىستى.
نۇرجان نۇرجىگىتوۆ مەردىگەرلەرگە قۇرىلىستاردى ۋاقىتىلى ءارى ساپالى ورىنداۋ ءۇشىن ناقتى مىندەتتەر جۇكتەپ، جاۋاپتىلارعا باقىلاۋ شارالارىن كۇشەيتۋدى تاپسىردى.
