قوردايدا قولعا الىنعان شارۋا كوپ

653
Adyrna.kz Telegram

جامبىل وبلىسىنىڭ اكىمى نۇرجان نۇرجىگىتوۆتىڭ قورداي اۋدانىنا جۇمىس ساپارى سارىبۇلاق اۋىلىنداعى “سامعاۋ” شارۋا قوجالىعىنىڭ جۇمىسىمەن تانىسۋدان باستالدى.

بيىل 350 گەكتار القاپقا جۇگەرى، 100 گەكتارعا كۇزدىك بيداي، 30 گەكتارعا ارپا ەككەن قوجالىق تامشىلاتىپ سۋارۋ تەحنولوگياسىن ءتيىمدى پايدالانۋدا. 6 بىرلىك تەحنيكاسى بار شارۋاشىلىقتا 15 ادام جۇمىسپەن قامتىلعان.

العاشقىلاردىڭ ءبىرى بولىپ ەگىنگە وراق سالعان قوجالىق باسشىسى ەۆگەني ترۋبنيكوۆ ءار گەكتارىنا 30 تسەنتنەردەن ءونىم الۋدى جوسپارلاپ وتىر. جۇگەرى القابىنا تامشىلاتىپ سۋارۋ جۇيەسىن ەنگىزگەن ول سۋدان تاپشىلىق كورىپ وتىرعانىن جەتكىزدى. سۋ ماسەلەسى شەشىلسە، سۋارمالى ەگىستىك القابىن ۇلعايتپاق.

- سۋ مəسەلەسى جىلدان جىلعا قيىنداپ بارادى. كورشى ەلدەن قاجەتتى سۋ كيروۆ سۋ قويماسىنان بوساتىلعانىمەن ول بəرىنە جەتپەيدى. سول ءۇشىن ۇڭعىما قازىپ ەگىس القاپتارىن تامشىلاتىپ، جاڭبىرلاتىپ سۋارۋعا الماستىرۋ قاجەت. سول كەزدە عانا اعىن سۋعا دەگەن تəۋەلدىلىكتەن ارىلىپ، جەردى ءتيىمدى يگەرۋگە بولادى. كوپ شارۋا قوجالىقتارى قازىر ۇڭعىما قازىپ الىپ سۋ مəسەلەسىن ءوز بەتتەرىنشە شەشۋدە،- دەدى وبلىس əكىمى.

شارۋا قوجالىق سۇرانىسىن ەسكەرە وتىرىپ كانالداردى جوندەۋ، بەتونداۋ جۇمىستارى كەزەڭ-كەزەڭمەن جالعاساتىنىن ايتتى.

كەلەسى كەزەكتە ايماق باسشىسى قورداي اۋىلى «باتىس» ىقشام اۋدانىندا سالىنىپ جاتقان №3,4,5,6 60 پاتەرلى 5 قاباتتى تۇرعىن ۇيلەردى كوردى. وتكەن جىلى باستالعان قۇرىلىس جۇمىستارى كەستەگە سايكەس اعىمداعى جىلى تامىز ايىندا اياقتالۋى ءتيىس. دەگەنمەن، ينجينەرلىك-كوممۋنيكاتسيالىق ينفراقۇرىلىم تارتۋعا قوسىمشا قاراجات قاجەت.

نىساندار پايدالانۋعا بەرىلگەندە اۋداندا ءۇي كەزەگىندە تۇرعان 240 ادامنىڭ باسپانا ماسەلەسى شەشىلمەك.

وبلىس اكىمى تۇرعىن القاپتاعى بۇعان دەيىن تاپسىرىلعان كوپقاباتتى تۇرعىن ۇيلەردى تەكسەرىپ، قۇرىلىسىنىڭ ساپاسىزدىعىن سىنعا الدى. اۋدان اكىمدىگىنە مەردىگەردىڭ جاۋاپكەرشىلىگىن قاراۋ، كەمشىلىكتەردى رەتتەۋ بويىنشا ءتيىستى شارالار قابىلداۋدى تاپسىردى.

اۋماقتى اباتتاندىرۋعا قاتىستى دا بىرقاتار ەسكەرتپەلەر ءبىلدىردى.

وسى اۋىلداعى «EKO CHIKEN» كووپەرتيۆى 12 ءمودۋلدى قۇس فەرماسىن ورناتقان دەسەك، جىل سوڭىنا دەيىن تاعى وسىنداي 8 نىساندى ىسكە قوسپاق. ناتيجەسىندە قۇس ەتىن وندىرۋدەگى جالپى قۋاتتىلىق 520 تونناعا جەتەدى دەپ كۇتىلۋدە. بۇل اۋدان تۇرعىندارىن قۇس ەتىن تۇتىنۋ كورسەتكىشىنىڭ 10 پايىزىن قۇرايدى. بۇدان بولەك مۇندا 2025 جىلعا دەيىن قوسىمشا 20 ءمودۋلدى قۇس فەرماسىن سالۋ جوسپارلانۋدا. ول كەزدە 76 ادام تۇراقتى جۇمىسپەن قامتىلماق.

قازىرگى تاڭدا ءاربىر قۇس فەرماسىندا 1,5 مىڭ بالاپان باعىلۋدا. نەگىزىنەن ءونىم الماتى قالاسى مەن قورداي اۋدانىنداعى ساۋدا ورتالىقتارىندا وتكەرىلۋدە.

فەرما باسشىسى ىرگەسىندەگى بوس جەرگە جىلىجاي جəنە 800 باسقا ارنالعان مال بورداقىلاۋ الاڭىن سالۋ، سونىمەن بىرگە بالىق شارۋاشىلىعىن قاتار الىپ ءجۇرۋ جوسپارىنىڭ بارىن ايتتى.

وبلىس اكىمى فەرما جۇمىسىن وڭ باعالاپ، قاجەتتى قولداۋلار كورسەتىلەتىنىن جەتكىزدى.

ايماق باسشىسى «قورداي ءسۇت ونىمدەرى» جشس دە بولىپ زاۋىت جۇمىسىمەن تانىستى. زاۋىت ديرەكتورى يسلام داۆۋزدىڭ ايتۋىنشا، زاۋىتتىڭ جىلدىق قۋاتتىلىعى 800 توننا ەكەن. وندا 40 ادام جۇمىس ىستەيدى. وتكەن جىلى 1215 توننا ءسۇت ونىمدەرىن وندىرگەن.

كەلەسى كەزەكتە ايماق باسشىسى "نۋنۋ" شارۋا قوجالىعىنىڭ جۇمىسىن كوردى. قوجالىق جەتەكشىسى سانششي نۋنۋدىڭ ايتۋىنشا، شارۋاشىلىق 27 گەكتار القاپتى يگەرۋدە. قازىر ءسəبىز قازىپ جاتىر. ونىڭ كيلوگرامىن 100 تەڭگەدەن القاپ باسىنان وتكەرۋدە. سəبىزدەن جالپى 35-40 توننا ءونىم جينايمىن دەپ جوسپارلاۋدا.

وتباسى كəسىبىن جەردەن تاۋىپ وتىرعان شارۋا بالالارىن دا وسى كəسىپكە باۋلۋدا.

- اۋىل شارۋالىعى ونىمىنە دەگەن قازىر سۇرانىس جوعارى. سىزدەر سياقتى ەڭبەك ادامىنىڭ ءونىمى جەردە قالمايدى. حالىقتى ازىق-تۇلىكپەن قامتيتىن وزدەرىڭىزدەي شارۋانىڭ كوپ بولعانى جاقسى. از جەردەن مول ءونىم جيناۋ - ۇلكەن جەتىستىك، - دەدى نۇرجان نۇرجىگىتوۆ.

ءوڭىر باسشىسى اۋقاتتى اۋىلدىق وكرۋگىنە قاراستى بəيتەرەك اۋىلىنداعى №45 نەگىزگى، اۋقاتتى ەلدىمەكەنىندەگى №9 ورتا مەكتەپتە بولدى.
بəيتەرەكتەگى نەگىزگى مەكتەپ عيماراتىنىڭ توزىعى جەتكەنىن ەسكەرگەن وبلىس اكىمى وقۋ ورداسىنىڭ عيماراتىن جاڭادان سالۋ ماسەلەسى الداعى جىلى شەشىلەتىنىن اتاپ ءوتتى.

ال اۋقاتتى اۋىلىندا وبلىس əكىمىن مەكتەپ ۇجىمى مەن اۋىل تۇرعىندارى قۇشاق جايا قارسى الدى. وسىندا ءبىلىم العان نۇرجان نۇرجىگىتوۆ سىنىپ بولمەلەرىن ارالاپ، سىنىپتاستارىمەن كەزدەسىپ، مەكتەپتىڭ ماتەريالدىق جاعدايىمەن تانىستى. LED ەكران ارقىلى شەت ەلدە تۇراتىن ۇستازى گالينا كريۆوشەەۆانىڭ جىلى لەبىزىن تىڭداپ، سىنىپتاستار سۋرەتىن تاماشالادى. اۋلادا اۋىل قاريالارىمەن كەزدەسىپ، بالالىق شاقتاعى قىزىقتى ەستەلىگىمەن ءبولىستى.

پىكىرلەر