اعىمداعى جىلدىڭ التى ايىندا جامبىل وبلىسىندا ەكونوميكانىڭ بارلىق سالالارىندا وڭ ديناميكا قالىپتاسقان. وعان مەملەكەت باسشىسىنىڭ قازاقستان حالقىنا ارنالعان جولداۋىنداعى تاپسىرمالاردى وڭىرىمىزدە ءتيىمدى ىسكە اسىرۋدىڭ ناتيجەسىندە قول جەتىپ وتىر. بۇل تۋرالى وبلىس اكىمى نۇرجان نۇرجىگىتوۆتىڭ توراعالىعىمەن وتكەن اكىمدىكتىڭ كەڭەيتىلگەن ماجىلىسىندە جان-جاقتى ايتىلدى.
العاشقى بولىپ ءسوز العان ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا وسى جىلدىڭ قاڭتار-ماۋسىم ايلارىنداعى وبلىستىڭ الەۋمەتتىك-ەكونوميكالىق دامۋ قورىتىندىلارىن باياندادى. ونىڭ ايتۋىنشا، بيىل ءبىرىنشى توقساندا جالپى وڭىرلىك ءونىم 463,1 ملرد.تەڭگەنى قۇراپ، 5 پايىزعا ارتقان. ال، العاشقى جارتى جىلدىقتا ەكونوميكالىق ءوسىم 104,1 پايىزدى قۇراعان.
سول سەكىلدى ونەركاسىپ - 108,1 پايىز، اۋىل شارۋاشىلىعى - 102, قۇرىلىس - 105,7, تۇرعىن ءۇي كولەمى 103,7, ساۋدا – 105,3, بايلانىس - 101,9 پايىز دەڭگەيىندە قالىپتاستى. 155,8 ملرد. تەڭگە ينۆەستيتسيا تارتىلىپ، 255 ملرد. تەڭگەگە كولىك قىزمەتى كورسەتىلگەن.
وزىندىك كىرىستەر 58,9 ملرد. تەڭگەگە ورىندالىپ، 25,7 پايىزعا ارتسا، بيۋدجەت قاراجاتى 99,9 پايىزعا يگەرىلگەن. بۇل كورسەتكىشتەردىڭ بارلىعى رەسپۋبليكالىق ورتاشا كورسەتكىشتەن جوعارى قالىپتاسقان.
دەگەنمەن، باسقارما باسشىسى تاراز قالاسى مەن اۋداندار بولىنىسىندە بىرقاتار كورسەتكىشتەردە جوسپاردى ورىنداۋدا سىلبىرلىق تانىتىپ، ارتتا قالعانداردى دا اشىپ كورسەتتى. سونداي-اق، وبلىس اكىمىنىڭ تاپسىرماسىنا سايكەس ۇلتتىق جوبالاردىڭ ورىندالۋ بارىسىنا جۇرگىزىلگەن تالداۋ قورىتىندىسىنا دا نازار اۋدارتتى. 10 باعىت بويىنشا جەكەلەي توقتالىپ، ورىندالماي قالۋ قاۋپى بار ينديكاتورلارعا كوڭىل ءبولدى.
وبلىس اكىمى كورسەتكىشى تومەن سالالىق باسقارمالاردىڭ باسشىلارىنان جاۋاپتار الىپ، جۇمىستى شيراتۋدى تاپسىردى.
- اۋداندار مەن باسقارمالار ءوزارا تىعىز قارىم-قاتىناستا جۇمىس ىستەۋى كەرەك. ازىرگە ول بايقالمايدى. ورتالىق اتقارۋشى ورگاندارمەن دە جۇيەلى بايلانىس ورناتۋ ماڭىزدى.
جىلدىڭ قورىتىندىسىمەن بارلىق ينديكاتورلار ورىندالۋى ءتيىس. ەشقانداي سىلتاۋ قابىلدانبايدى!
قايتا وڭدەۋ كاسىپورىندارىن قۇرۋ بويىنشا جۇمىستار كوڭىل كونشىتپەيدى. جەكە ينۆەستيتسيا ەسەبىنەن جوبالاردى جۇزەگە اسىرۋعا دەن قويۋ قاجەت. بۇل باعىتتا ءار اۋداننىڭ الەۋەتى ەسكەرىلە وتىرىپ، باسقارمالارمەن بىرلەسىپ ازىرلەنگەن جوسپارلى جوبالار بار. ەندى سول جوسپاردىڭ ورىندالۋى قاتاڭ باقىلاۋدا بولادى. وسى تۇرعىدا جۇمىستاردى كۇشەيتۋگە ەشقانداي كەدەرگى جوق دەپ ويلايمىن،-دەدى نۇرجان نۇرجىگىتوۆ.
باسقارمالاردىڭ وزدەرىنە تيەسىلى كورسەتكىشتەرگە قاتىستى جاۋاپتارىنا قاناعاتتانباعان وبلىس اكىمى ءوزىنىڭ ورىنباسارى نۇرجان كالەندەروۆكە ينديكاتورلار ءبولىنىسىن قايتا قاراۋدى جۇكتەدى.
باسقوسۋدا وبلىس اكىمىنىڭ ورىنباسارلارى نۇرجان كالەندەروۆ پەن ەركىن ۇيسىمباەۆ بايانداما جاساپ، ءار سالاداعى اتقارىلعان جۇمىستار مەن وزەكتى ماسەلەلەرگە ايرىقشا توقتالدى.
جيىندا باعانى تۇراقتاندىرۋ، جۇمىسسىزدىقپەن كۇرەس، مەكتەپتەردىڭ اسحانالارىندا اس ساپاسى، جاستار ساياساتى، اۋىلدىق كلۋبتاردىڭ شتاتتىق بىرلىگىن ارتتىرۋ سەكىلدى بىرقاتار وزەكتى ماسەلەلەر تالقىلاندى.
- جاڭا وقۋ جىلىندا مەكتەپتەردەگى اس ساپاسى بارىنشا باقىلاۋدا بولۋى ءتيىس. بالالار قاجەتتى دارۋمەندەرمەن، تازا بال، ءسۇت سەكىلدى ونىمدەرمەن قامتىلۋى قاجەت.
ۇرپاق تاربيەسى، جاستار ساياساتى – باستى نازاردان تۇسپەيدى. وقۋشىلار ساباقتان سوڭ بوس ۋاقىتىندا سپورتپەن، قوسىمشا ۇيىرمەلەرمەن شۇعىلدانۋى ءۇشىن بارلىق جاعداي جاسالۋدا. كوپتەگەن سپورت كەشەندەرى مەن الاڭشالار، مادەني مەكەمەلەر بوي كوتەرۋدە. وسى ماقساتتا اۋىلدىق كلۋبتاردىڭ شتاتتىق بىرلىگىن ارتتىرۋ ءىسىن دە قولعا الىپ جاتىرمىز.
سول سەكىلدى جاستار ساياساتىنا بەي-جاي قاراۋعا بولمايدى. جاستار ورتالىقتارىنا ارنايى عيمارات قاراستىرىپ، قاجەتىنشە جابدىقتاۋعا دەن قويىڭىزدار. NET ساناتىنداعى جاستارمەن جان-جاقتى جۇمىس جۇرگىزۋ ماڭىزدى،-دەگەن نۇرجان نۇرجىگىتوۆ اۋدان اكىمدەرى مەن باسقارما باسشىلارىنا ناقتى تاپسىرمالار جۇكتەدى.
جيىندا وبلىس اكىمى اپپاراتىنىڭ باسشىسى ءمادي ماتەن جەرگىلىكتى اتقارۋشى ورگانداردىڭ ورىنداۋشىلىق ءتارتىبى تۋرالى بايانداما جاسادى.
وبلىس اكىمى بارلىق تاپسىرمالاردىڭ ۋاقىتىلى ورىندالۋ كەرەكتىگىن ەسكەرتىپ، كەرى بايلانىستى نىعايتۋ، اتقارىلعان جۇمىستاردى كورسەتە ءبىلۋ، تۇرعىنداردىڭ وتىنىشتەرىنە دەر كەزىندە، ساپالى جاۋاپ بەرۋ سەكىلدى ماسەلەلەردىڭ ماڭىزدىلىعىن باسا ايتتى.
ايماق باسشىسى مۇنداي اكىمدىك ءماجىلىسىن ەندى مۇمكىندىگىنشە ايىنا ءبىر رەت وتەتىنىن جەتكىزدى.
