2022 جىلى 10 مىڭ ورىنعا ارنالعان 35 ستۋدەنتتەر جاتاقحاناسى پايدالانۋعا بەرىلەدى. بۇل تۋرالى پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن وتكەن كەڭەس بارىسىندا ايتىلدى، دەپ جازادى "ادىرنا" ۇلتتىق پورتالى.
جاڭا وقۋ جىلى ءداستۇرلى فورماتتا وتەدى دەپ جوسپارلانۋدا. سوعان بايلانىستى ستۋدەنتتەر جاتاقحاناسى تاپشىلىعى بولۋى مۇمكىن. بۇل ماسەلە اسىرەسە كوپتەگەن ءىرى جوعارى وقۋ ورىندارى شوعىرلانعان مەگاپوليستەردە وزەكتى.
"عىلىم جانە جوعارى ءبىلىم مينيسترلىگى وبلىستاردىڭ باسشىلارىمەن جانە نۇر-سۇلتان، الماتى، شىمكەنت قالالارىنىڭ اكىمدەرىمەن بىرلەسىپ، 10 تامىزعا دەيىنگى مەرزىمدە ستۋدەنتتەر جاتاقحانالارىندا ورىن بەرۋ جوسپارىن ازىرلەپ، بەكىتۋى قاجەت. سونداي-اق دەنساۋلىق ساقتاۋ مينيسترلىگىمەن بىرلەسىپ، ءبىلىم بەرۋ وبەكتىلەرىنە قويىلاتىن سانيتارلىق-ەپيدەميولوگيالىق تالاپتارعا وزگەرىستەر ەنگىزۋ قاجەت", - دەپ اتاپ ءوتتى پرەمەر-ءمينيستردىڭ ورىنباسارى ەرالى توعجانوۆ.
وسىعان بايلانىستى عىلىم جانە جوعارى ءبىلىم ءمينيسترى ساياسات نۇربەك جوو رەكتورلارىنا بارلىق جاتاقحاناعا تەكسەرۋ جۇرگىزىپ، توسەك-ورىن سانىن ارتتىرۋ بويىنشا ۇسىنىستار ازىرلەۋدى تاپسىردى. بۇل شارا قازىرگى احۋالدى انىقتاپ، ستۋدەنتتەرگە ۋاقىتشا تۇرعىن ءۇي سالۋ جوسپارلارىنا تۇزەتۋلەر ەنگىزۋگە مۇمكىندىك بەرەدى. مينيستر ۋنيۆەرسيتەتتەرگە جاقىن ورنالاسقان جاتاقحانالار مەن قوناقۇيلەر (حوستەلدەر) اراسىندا مەموراندۋم جاساۋ تاجىريبەسىن كەڭىنەن قولدانۋ قاجەتتىگىن دە اتاپ ءوتتى. سونداي-اق جيىندا مەملەكەتتىك-جەكەمەنشىك ارىپتەستىك اياسىندا جاتاقحانا سالۋ جوبالارىنداعى قاعازباستىلىقتى جويۋ ماسەلەلەرى دە تالقىلاندى.
ايتا كەتەيىك، 2022 جىلى 10 مىڭ ورىنعا ارنالعان 35 جاتاقحانانى پايدالانۋعا بەرۋ جوسپارلانعان. 2018 جىلدان باستاپ 2021 جىلعا دەيىن بارلىعى 30 630 ورىنعا شاقتالعان 124 نىسان ىسكە قوسىلدى. ونىڭ ىشىندە 2021 جىلى 10 364 ورىنعا ەسەپتەلگەن 49 عيمارات پايدالانۋعا بەرىلدى.
"ادىرنا" ۇلتتىق پورتالى
