2022 jyly 10 myń orynǵa arnalǵan 35 stýdentter jataqhanasy paıdalanýǵa beriledi. Bul týraly Premer-mınıstrdiń orynbasary Eraly Toǵjanovtyń tóraǵalyǵymen ótken keńes barysynda aıtyldy, dep jazady "Adyrna" ulttyq portaly.
Jańa oqý jyly dástúrli formatta ótedi dep josparlanýda. Soǵan baılanysty stýdentter jataqhanasy tapshylyǵy bolýy múmkin. Bul másele ásirese kóptegen iri joǵary oqý oryndary shoǵyrlanǵan megapolısterde ózekti.
"Ǵylym jáne joǵary bilim mınıstrligi oblystardyń basshylarymen jáne Nur-Sultan, Almaty, Shymkent qalalarynyń ákimderimen birlesip, 10 tamyzǵa deıingi merzimde stýdentter jataqhanalarynda oryn berý josparyn ázirlep, bekitýi qajet. Sondaı-aq densaýlyq saqtaý mınıstrligimen birlesip, bilim berý obektilerine qoıylatyn sanıtarlyq-epıdemıologııalyq talaptarǵa ózgerister engizý qajet", - dep atap ótti premer-mınıstrdiń orynbasary Eraly Toǵjanov.
Osyǵan baılanysty ǵylym jáne joǵary bilim mınıstri Saıasat Nurbek JOO rektorlaryna barlyq jataqhanaǵa tekserý júrgizip, tósek-oryn sanyn arttyrý boıynsha usynystar ázirleýdi tapsyrdy. Bul shara qazirgi ahýaldy anyqtap, stýdentterge ýaqytsha turǵyn úı salý josparlaryna túzetýler engizýge múmkindik beredi. Mınıstr ýnıversıtetterge jaqyn ornalasqan jataqhanalar men qonaqúıler (hostelder) arasynda memorandým jasaý tájirıbesin keńinen qoldaný qajettigin de atap ótti. Sondaı-aq jıynda memlekettik-jekemenshik áriptestik aıasynda jataqhana salý jobalaryndaǵy qaǵazbastylyqty joıý máseleleri de talqylandy.
Aıta keteıik, 2022 jyly 10 myń orynǵa arnalǵan 35 jataqhanany paıdalanýǵa berý josparlanǵan. 2018 jyldan bastap 2021 jylǵa deıin barlyǵy 30 630 orynǵa shaqtalǵan 124 nysan iske qosyldy. Onyń ishinde 2021 jyly 10 364 orynǵa eseptelgen 49 ǵımarat paıdalanýǵa berildi.
"Adyrna" ulttyq portaly
