ەلىمىزدە ۇلتتىق سپورت ۋنيۆەرسيتەتىنىڭ قۇرىلىسىن 127 ميلليارد تەڭگەگە قۇجات بويىنشا، قۇرىلىس-مونتاج جۇمىستارىنا «Saranda Building» جشس-نە تاپسىرىس بەرمەكشى. بۇل كومپانيا قازاقستانعا بۇرىننان تاڭسىق ەمەس سەكىلدى. «ادىرنا» ۇلتتىق پورتالى كومپانيا تۋرالى، اتقارىلعان جۇمىستارى مەن استارىنا ءۇڭىلىپ، زەرتتەۋ جۇرگىزىپ كوردى.
«نۇر-سۇلتان قالاسىنداعى وليمپيادالىق دايارلاۋ ورتالىعى» كوپسالالى سپورت كەشەنى «قازاقستان رەسپۋبليكاسىنىڭ ۇلتتىق سپورت ۋنيۆەرسيتەتى» نىسانىنىڭ قۇرىلىسى بويىنشا جۇمىستار مەن كورسەتىلەتىن قىزمەتتەر كىمنەن ساتىپ الىناتىنى انىقتالسىن،»، - دەلىنگەن ۇكىمەت قاۋلىسىنىڭ جوباسىندا.
قۇجات بويىنشا ولار قۇرىلىس-مونتاج جۇمىستارىنا «Saranda Building» جشس-نە تاپسىرىس بەرمەكشى ەكەنى انىقتالدى.
«جوبانى ىسكە اسىرۋ 2022-2024 جىلدارعا ارنالعان. رەسپۋبليكالىق بيۋدجەتتەن 127 311 535 758 تەڭگە شىعىن شىقپاق»، - دەلىنگەن قاۋلى جوباسىنىڭ تۇسىندىرمە جازباسىندا.
Mabetex Project Engineering (Mabetex group) – بۇل ونەركاسىپتىك جوسپارلاۋدىڭ كوپتەگەن سالالارىندا مامانداندىرىلعان، 1991 جىلى قۇرىلعان جاھاندىق ينجەنەرلىك-قۇرىلىس كومپانياسى. Behgjet Pacolli ونەركاسىپتىك قۇرىلىستى جوسپارلاۋ جانە ساتۋ سالاسىندا تاجىريبەسى بار باسشى. بۇگىنگى تاڭدا Mabetex - الەم بويىنشا 18 ەنشىلەس كومپانياعا دەيىن وسكەن عالامدىق كومپانيا. كومپانيانىڭ شتاب توبى شۆەيتساريانىڭ لۋگانو قالاسىندا ورنالاسقان.
وسىدان 24 جىل بۇرىن «مابەتەكس ءىسى» دەگەن اتىشۋلى سىبايلاس جەمقورلىق داۋى بولعان ەدى. الاياقتىق ىسىنە شۆەيتساريالىق قۇرىلىس كومپانياسى Mabetex Engineering, ونىڭ ەنشىلەس كاسىپورنى Mercata Trading & Engineering SA جانە رەسەي فەدەراتسياسىنىڭ ءبىرىنشى پرەزيدەنتى بوريس ەلتسيننىڭ جاقىن ادامدارى قاتىستى. ءىس ماتەريالدارىنان بۇل كومپانيالار ماسكەۋ كرەملىندە رەستاۆراتسيا جۇمىستارىن جۇرگىزۋ بارىسىندا مەملەكەتتىك قىزمەتكەرلەرگە پارا بەرۋ ءۇشىن ءتيىمدى كەلىسىم-شارت جاسالىنعانى بەلگىلى بولدى. تەرگەۋ جۇمىستارىمەن رەسەي، شۆەيتساريا جانە يتاليانىڭ پروكۋرورلارى مەن تەرگەۋشىلەرى اينالىستى.
بارلىعى 1998 جىلدىڭ كوكتەمىندە شۆەيتساريالىق Banco del Gottardo بانكىنىڭ كەڭەسشىسى فيليپپ تۋروۆ كرەملدى قالپىنا كەلتىرۋ جۇمىستارىن قابىلداۋ كوميسسياسىن باسقارعان رەسەي پرەزيدەنتىنىڭ ىستەرى جونىندەگى باسقارۋشى ديرەكتورى پاۆەل بورودينگە قارسى كۋالىك ەتكەن كەزدە باستالدى. اتاپ ايتقاندا، شۆەيتساريانىڭ باس پروكۋرورى كارلا دەل پونتەمەن سۇحباتىندا ول رەسەي فەدەراتسياسى پرەزيدەنتى اكىمشىلىگىنىڭ رەسەيلىك شەنەۋنىكتەرىنىڭ Mabetex-پەن كەلىسىم جاساۋ كەزىندەگى تەرىس ارەكەتتەرى تۋرالى حابارلادى. وسىدان كەيىن كارلا دەل پونتە ماسكەۋگە بارىپ، رەسەيدىڭ سول كەزدەگى باس پروكۋرورى يۋري سكۋراتوۆپەن كەزدەسىپ، وعان تۋروۆەردىڭ دالەل-ايعاقتارى تۋرالى مالىمدەمە جاساعان بولاتىن.
1998 جىلدىڭ قازان ايىندا تۋروۆەر ماسكەۋدە سكۋراتوۆپەن كەزدەسكەننەن كەيىن، ءوزىنىڭ كەڭەسشىسىنە بيلىگىن اسىرا پايدالاندى دەگەن كۇدىكپەن قىلمىستىق ءىس اشۋدى تاپسىردى. ءىستى تەرگەۋ بارىسىندا كرەمل عيماراتتارىن قالپىنا كەلتىرۋ جۇمىستارىنىڭ سمەتاسى 30-60 پايىزعا اسىرا كورسەتىلگەنى بەلگىلى بولدى. بورودين مەن ونىڭ ورىنباسارلارى ءبىرىنشى تەكسەرىلەتىن كۇدىكتىلەر قاتارىنان بولدى. مابەتەكستىڭ كەڭسەسىندە دە، كەيىنىرەك رەسەي پرەزيدەنتىنىڭ اكىمشىلىگىندە دە تىنتۋلەر جۇرگىزىلدى. Mabetex باسشىسى بەحجەت پاكولليدەن كارلا دەل پونتە جەكە جاۋاپ الدى.
2011 جىلدارى پاكوللي پرەزيدەنتتىككە ۇمىتكەر رەتىندە قاتىسقان بولاتىن. كوسوۆونىڭ كونستيتۋتسيالىق سوتى بەكجەت پاكولليدى ەل پرەزيدەنتى ەتىپ سايلاۋ پروتسەدۋراسىن زاڭسىز دەپ تانىدى. ونىڭ «مابەتەكس» كومپانياسى استانادا كوپتەگەن نىساندار سالعان. ودان قالسا، كرەملدى قالپىنا كەلتىرۋگە قاتىستى جانجالدىڭ باستى سەبەپكەرى دە بولدى.
Mabetex وزبەكستان مەن قازاقستاندا دا بەلسەندىلىك تانىتىپ، استاناداعى پرەزيدەنت سارايىنىڭ قۇرىلىسىن دا وزدەرى جاسادى. Mabetex سايتىندا استانا حالىقارالىق اۋەجايى، كونتسەرت زالى، «ارمان» كەشەنى، Radisson SAS قوناق ءۇيى، استاناداعى پرەزيدەنت سارايىنىڭ ءزاۋلىم عيماراتى، سونداي-اق كوپتەگەن ۇكىمەتتىك عيماراتتارى تۇرعىزىلعانى تۋرالى اقپارات بەرىلگەن.
2020 جىلى ەكس-پرەزيدەنت نۇرسۇلتان نازارباەۆ Mabetex Group كومپانياسىنىڭ نەگىزىن قالاۋشى پاككوليدى مەملەكەتتىك سىياقىمەن ماراپاتتاعان بولاتىن.
بيىل دا پاككوليدىڭ قاتىسۋىمەن ءىرى ساۋدا دۇكەنىنىڭ ساتىلىمى ورىن الدى. تولىعىراق ايتاتىن بولساق، «Sine Tempore» ساۋدا ءۇيىن پاكوللي وتباسىنان نۇر-سۇلتان اكىمدىگىنە قاراستى مەكەمە «استانا ەكونوميكا باسقارماسى» جشس 9,5 ملرد تەڭگەگە ساتىپ العان.
«ول كەزدە اكىمدىك اپپاراتى باسشىسىنىڭ ورىنباسارى ءجۇسىپ جۇماعۇلوۆ قول قويعان مەموراندۋمعا سايكەس، بارلىق 9,529 ملرد تەڭگە «Sine Tempore» ساۋدا ءۇيىن ساتىپ الۋعا ارنالعان. ادەمى، انىق ەۋروپالىق اتاۋ ءسىزدى الداماسىن. Sine Tempore - تسەلينوگراد قالاسىنداعى ەسكى كەڭەستىك ورتالىق امبەباپ دۇكەن»، - دەدى الەۋمەتتىك جەلىدەگى پاراقشاسىندا بەلگىلى قازاقستاندىق جۋرناليست ميحايل كوزاچكوۆ.
«Mabetex قۇرىلىس كومپانياسىنىڭ يەسى پاكوللي ەلوردادا ءبىراز دۇنيە سالدى، مىسالى، اۋەجايدىڭ جاڭا تەرمينالى 92 ميلليارد تەڭگەگە، ەكسپو پاۆيلوندارى 93 ميلليارد تەڭگەگە، بارىس مۇز سارايى 48 ميلليارد تەڭگەگە، وپەرا جانە بالەت تەاترى دا وسىنداي سوماعا...
سونداي-اق «قازاقستان» كونتسەرت زالى، رەسپۋبليكالىق دياگنوستيكالىق ورتالىق جانە انا مەن بالا ورتالىعى. Forbes جۋرنالىنىڭ مالىمەتىنشە، پاكوللي قازاقستاندا بارلىعى 1,7 ميلليارد دوللاردان استام قارجىنى يگەرگەن»،- دەپ جازدى جۋرناليست.
قورىتا كەلە، شۆەيتساريالىق Mabetex كومپانياسىنىڭ قازاققا سىڭىرگەن «ەڭبەگى» كوپ ەكەنى ءمالىم. نۇر-سۇلتان قالاسىنىڭ بارلىق دەرلىك ءىرى عيماراتىن قۇرعان. ەندىگى سالىنعالى جاتقان ۇلتتىق سپورت ۋنيۆەرسيتەتىنىڭ قۇرىلىس جۇمىسى دا شۆەيتساريالىق اتاۋى باسقا، اتاسى ءبىر Saranda building كومپانياسى جۇزەگە اسىرماق. بۇل كومپانيانىڭ دا پاككوليمەن تىكەلەي قاتىسى بار.
Saranda building كومپانياسىنىڭ قازىرگى باسشىسى - دۇيسەنوۆ قۋانىش تاۋكەنۇلى.
قىزىعى، دۇيسەنوۆ قۋانىش 2008 جىلى استانا (قازىرگى نۇر-سۇلتان قالاسى) ءدىني ەكسترەميزم مەن تەرروريزمگە قارسى دەپارتامەنتتىڭ باسشىسى قىزمەتىن اتقارعان.
«ادىرنا» ۇلتتىق پورتالى
