بۇگىن ورال قالالىق مامانداندىرىلعان تەرگەۋ سوتىندا كاسىپكەردى ولتىرگەن 31 جاستاعى رۋسلان قوجانتاەۆ پەن 21 جاستاعى تۇرلان امانگەلدىگە قاتىستى بۇلتارتپاۋ شاراسىن تاڭداۋ تۋرالى ءوتىنىش قارالدى. بۇل تۋرالى «موي گورود» پورتالى جازدى، دەپ حابارلايدى «ادىرنا» ءتىلشىسى.
ءىس ماتەريالدارىنان بەلگىلى بولعانداي، كۇدىكتىلەر 6 تامىز كۇنى «راحات لۋكۋم» كاراوكە مەيرامحاناسىنىڭ عيماراتىندا بولىپ، مەكەمە يەسى ەركىن مۇحانعاليەۆپەن كەزدەسكەن. ولاردىڭ اراسىندا جانجال تۋىنداپ، قوجانتاەۆ جينالمالى پىشاعىمەن ونىڭ مويىن جانە كەۋدە تۇسىنان كەم دەگەندە ءۇش رەت سوققى بەرگەن. وسى كەزدە جاقىن جەردع تۇرعان ت. امانگەلدى دە پىشاق شىعارىپ، مەكەمە اكىمشىلىگىنە باراتىن جولدى جاۋىپ، قىزمەتكەرلەردى قورقىتقان.
«مارقۇم امان قالۋ ءۇشىن اشىق تەرەزەدەن سەكىرۋگە تىرىسقان. وسى ۋاقىتتا قوجانتاەۆ ونىڭ بەل ايماعىنا تاعى بىرنەشە رەت سوققى جاسادى. ودان كەيىن جارالانعان مۇحانعاليەۆ ورتالىق ستاديونعا قاراما-قارسى تۇرعان تۇراققا جۇگىردى. كۇدىكتىلەر ەر ادامدى قۋىپ جەتىپ، دەنەسىنىڭ ءار جەرىنەن بىرنەشە رەت تەپكىلەگەن. ر. قوجانتاەۆ كاسىپكەرگە تاعى التى رەت پىشاق سۇعىپ الادى.
مۇحانعاليەۆ العان جاراقاتتارىنان وقيعا ورنىندا كوز جۇمدى. كۇدىكتىلەر وقيعا ورنىنان قاشىپ كەتكەن»،— دەدى پروكۋرور.
كاسىپكەردىڭ ولىمىنە مويىن، كەۋدە، بەل ايماعىنىڭ پىشاق جاراقاتتارى، سول جاق ۇيقى ارتەرياسىنىڭ، وڭ بۇيرەكتىڭ زاقىمدانۋى، ماڭداي سۇيەكتەرىنىڭ سىنۋى سەبەپ بولعان.
مەملەكەتتىك ايىپتاۋشى سوتتان پد تەرگەۋشىسىنىڭ ءوتىنىشىن قاناعاتتاندىرىپ، قوجانتاەۆ پەن امانگەلدىنى ەكى ايعا قاماۋعا الۋدى سانكتسيالاۋدى سۇرادى.
رۋسلان قوجانتاەۆ تەرگەۋ دالەلدەرىمەن كەلىسپەيتىنىن جەتكىزىپ، ەكى ايەلى (بىرەۋى جۇكتىلىكتىڭ سوڭعى ايىندا), بالالارى جانە ءۇيى بار ەكەنىن ايتتى. ەر ادام سوتتان ءوزىن ەكى ايعا قاماۋعا الماۋدى سۇرادى.
ال تۇرلان امانگەلدى سوتتا رۋسلان قوجانتاەۆتىڭ قىسىم كورسەتكەنىن، سول كۇنى وزىمەن بىرگە بارۋعا ماجبۇرلەگەنىن مالىمدەدى.
سۋديا رۋسلان قوجانتاەۆ پەن تۇرلان امانگەلدى ەكى ايعا قاماۋعا الىندى.
ايتا كەتەيىك، ەكى كۇدىكتى بۇرىن سوتتالماعان.
