قازاقستاننىڭ دەنساۋلىق ساقتاۋ مينيسترلىگى الەۋمەتتىك جەلىلەردە تاراعان اقپاراتتان كەيىن الماتىداعى «اياجان» جەكە كلينيكاسىنا جوسپاردان تىس تەكسەرۋ جۇرگىزۋدى باستاماق، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
ۆەدومستۆو مەديتسينالىق انىقتامالار مەن جەكە مەديتسينالىق كىتاپشالاردى زاڭسىز بەرۋ دەرەكتەرىن تەكسەرەدى.
مينيسترلىكتىڭ ءباسپاسوز قىزمەتىنىڭ مالىمەتىنشە، ەگەر تەكسەرۋ بارىسىندا زاڭبۇزۋشىلىقتار راستالسا، ۋاكىلەتتى ورگاندار ءوز قۇزىرەتى شەگىندە ءتيىستى شارالار قابىلدايدى.
ۆەدومستۆو قازاقستان رەسپۋبليكاسى قىلمىستىق كودەكسىنىڭ 385-بابىنا سايكەس، جالعان رەسمي قۇجاتتاردى قولدان جاساۋ، دايىنداۋ نەمەسە وتكىزۋ، سونداي-اق ولاردىڭ جالعان ەكەنىن بىلە تۇرا پايدالانۋ قىلمىستىق جاۋاپكەرشىلىككە اكەلەتىنىن ەسكە سالدى.
مينيسترلىك مەديتسينالىق قۇجاتتار تەك ناقتى جۇرگىزىلگەن تەكسەرۋلەر مەن مەديتسينالىق قاراپ-تەكسەرۋ ناتيجەلەرى بويىنشا بەلگىلەنگەن تالاپتارعا ساي بەرىلۋى كەرەكتىگىن اتاپ ءوتتى. زاڭسىز انىقتاما راسىمدەگەندەرمەن قاتار، جالعان قۇجاتتى ادەيى ساتىپ العان نەمەسە پايدالانعان ازاماتتار دا جاۋاپقا تارتىلۋى مۇمكىن.
وسىعان بايلانىستى ۆەدومستۆو ازاماتتاردى مەديتسينالىق نەگىزسىز انىقتاما نەمەسە ەڭبەككە ۋاقىتشا جارامسىزدىق پاراعىن الۋعا كەلىسپەۋگە، كلينيكالاردىڭ زاڭدى قىزمەتىن تەكسەرۋگە جانە زاڭبۇزۋشىلىقتار تۋرالى قۇزىرلى ورگاندارعا حابارلاۋعا شاقىردى.
مينيسترلىك مەديتسينالىق قۇجاتتاردى راسىمدەۋ ۇدەرىسىنىڭ اشىقتىعىن ارتتىرۋ جانە دەرەكتەردى باقىلاۋدى كۇشەيتۋ ءۇشىن تسيفرلىق قۇرالدار ەنگىزىلىپ جاتقانىن حابارلادى.
ۆەدومستۆونىڭ مالىمەتىنشە، 2026 جىلدىڭ باسىنان بەرى مينيسترلىكتىڭ اقپاراتتىق جۇيەلەرى ارقىلى 13,7 ميلليوننان استام ەلەكتروندىق مەديتسينالىق قۇجات بەرىلگەن. ونىڭ ىشىندە ۋاقىتشا ەڭبەككە جارامسىزدىق پاراقتارى مەن مەديتسينالىق انىقتامالار، سونداي-اق ديسپانسەرلىك ەسەپتە تۇرۋعا قاتىستى قۇجاتتار بار.
اۋرۋحانا پاراعىن اشۋ نەمەسە ۇزارتۋ تۋرالى اقپارات جۇمىس بەرۋشىلەرگە hr.enbek.kz پورتالى ارقىلى قىزمەتكەردىڭ كەلىسىمىمەن عانا جولدانادى. ال ازاماتتار وزدەرىنىڭ ەڭبەككە ۋاقىتشا جارامسىزدىق پاراعىنا قاتىستى مالىمەتتەردى Enbek HR ءموبيلدى قوسىمشاسىنان كورە الادى.
مينيسترلىك ەلەكتروندىق مەديتسينالىق قۇجاتتار مەديتسينالىق تەكسەرۋلەردەن ءوتۋ، ۋاقىتشا ەڭبەككە جارامسىزدىقتى راسىمدەۋ، مۇگەدەكتىكتى بەلگىلەۋ، جۇمىسقا ورنالاسۋ جانە باسقا دا مەديتسينالىق-اكىمشىلىك راسىمدەر كەزىندە قولدانىلاتىنىن اتاپ ءوتتى.
