مەملەكەت باسشىسى قاسىم-جومارت توقاەۆ بەلگيالىقتار كورولى فيليپپ پەن پاتشايىم ماتيلدانى ەلوردا اۋەجايىنان قارسى الدى. بۇل تۋرالى 11 قازاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مارتەبەلى مەيمانداردى سالتاناتتى تۇردە قارسى الۋ ءۇشىن ۇشۋ الاڭىندا قۇرمەت قاراۋىلى روتاسى مەن پرەزيدەنتتىك وركەستر ساپ تۇزەدى.
بەينەجازبالاردان بەلگيا كورولىنىڭ استاناعا Air Astana ۇشاعىمەن كەلگەنىن بايقاۋعا بولادى. الەۋمەتتىك جەلىدە تاراعان بەينەجازبالاردا ونىڭ ادەتتەگى رەيسكە وتىرعانى تۇسىرىلگەن.
اۋەجاي زالىندا قازاقستان پرەزيدەنتى قۇرمەتتى قوناقتارمەن از-كەم اڭگىمەلەستى. مەملەكەت باسشىسى كورول مەن پاتشايىمنىڭ ەلىمىزگە ساپارى قازاقستان-بەلگيا قارىم-قاتىناسىن ودان ءارى نىعايتۋ تۇرعىسىنان تاريحي مانگە يە ەكەنىنە نازار اۋداردى.
«قازاقستانعا قوش كەلدىڭىزدەر! ساپارلارىڭىز مەملەكەتىمىزدىڭ دامۋىنداعى وتە ماڭىزدى كەزەڭمەن تۇسپا-تۇس كەلىپ وتىر. جالپى ەلىمىز وركەندەپ، ەكونوميكاسى ىلگەرىلەپ كەلەدى. سىزدەردىڭ ساپارلارىڭىز ەكىجاقتى قارىم-قاتىناسقا تىڭ سەرپىن بەرەدى دەپ ايتۋعا بولادى»،– دەدى پرەزيدەنت.
كورول فيليپپ قوناقجايلىق كورسەتكەنى ءۇشىن پرەزيدەنت قاسىم-جومارت توقاەۆقا العىس ايتىپ، ەرتەڭگى جوعارى دەڭگەيدە وتەتىن كەلىسسوزدەر تابىستى بولاتىنىنا سەنىم ءبىلدىردى. سونداي-اق ەكى ەلدىڭ سان قىرلى سەرىكتەستىگىن تەرەڭدەتۋدىڭ ماڭىزىن اتاپ ءوتتى.
«ۇشاق تراپىنان قازاق جەرىنە قادام باسقان ساتتەن باستاپ كورسەتىلگەن سىي-قۇرمەت ءۇشىن سىزگە العىس ايتامىن. ءۇش كۇندىك ساپارمەن كەلگەنىمىزگە قۋانىشتىمىز ءارى ەلىڭىزبەن جاقىنىراق تانىسامىز دەپ سەنەمىن»،– دەدى ول.
