6 قازاندا الماتىداعى ۇلتتىق كىتاپحانادا كورنەكتى تاريحشى، تۇركىتانۋشى ءارى اعارتۋشى قۇربانعالي حاليدۇلىنىڭ 180 جىلدىعىنا ارنالعان قازاقستان قولجازباتانۋشىلار قاۋىمداستىعىنىڭ VIII وتىرىسى ءوتتى، دەپ حابارلايدى «ادىرنا» ءتىلشىسى.
«قۇربانعالي حاليدۇلىنىڭ قولجازبا مۇراسى: ساقتاۋ، زەرتتەۋ جانە عىلىمي اينالىمعا ەنگىزۋ ماسەلەلەرى» تاقىرىبىنداعى عىلىمي جيىندا عالىمنىڭ جازبا مۇراسىن ساقتاۋ، زەرتتەۋ جانە عىلىمي اينالىمعا ەنگىزۋدىڭ وزەكتى ماسەلەلەرى تالقىلاندى.
جيىن بارىسىندا قۇربانعالي حاليدۇلى ەڭبەكتەرىن زەرتتەۋ، اۋدارۋ جانە كوپشىلىككە قولجەتىمدى ەتۋ باعىتىنداعى جۇمىستار سارالاندى. تاريحشىنىڭ شوبەرەسى سافاريا تۇرسىنمۇحامەدقىزى تەڭىزباەۆا ءسوز سويلەپ، عالىم مۇراسىنىڭ بۇگىنگى ۇرپاق ءۇشىن ماڭىزىن اتاپ ءوتتى.
سونداي-اق ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «وتىرار كىتاپحاناسى» عىلىمي ورتالىعىنىڭ باسشىسى، تاريح عىلىمدارىنىڭ دوكتورى، پروفەسسور داناگۇل ماحات «تاۋاريح-ي حامسا-ي شارقي – شىعىستىڭ بەس ەلىنىڭ تاريحى» ەڭبەگىنىڭ قولجازبادان كوپتومدىق باسىلىمعا دەيىنگى دايىندالۋ تاريحىن تانىستىردى. ال شىعىستانۋشى باۋىرجان مۇستافا، تۇركىتانۋشى شىڭعىس بەگىمتاەۆ جانە تاريحشى-دوكتورانت ەركىنجان سىلامحان ەڭبەكتى اۋدارۋ، ترانسكريپتسيالاۋ جانە ونداعى تاريحي اتاۋلاردى عىلىمي تۇرعىدان ءتۇسىندىرۋ ماسەلەلەرىنە توقتالدى.
عىلىمي باسقوسۋدا قۇربانعالي حاليدۇلىنىڭ ايگىلى «تاۋاريح-ي حامسا-ي شارقي» ەڭبەگىنىڭ III–V تومدارى كوپشىلىك نازارىنا ۇسىنىلدى. باسىلىم تۇپنۇسقا قولجازبا مەن 1910 جىلى قازاندا جارىق كورگەن كىتاپ نۇسقاسى نەگىزىندە ازىرلەنگەن. ەڭبەكتە قولجازبانىڭ ترانسكريپتسياسى مەن قازاق تىلىندەگى اۋدارماسى قاتار بەرىلىپ، ءماتىننىڭ تەكستولوگيالىق ەرەكشەلىكتەرى جان-جاقتى كورسەتىلگەن.
سونىمەن بىرگە «قۇربانعالي حاليدۇلى: دەرەك، تاريح، تانىم» اتتى عىلىمي جيناقتىڭ تۇساۋى كەسىلدى. جيناققا عالىمنىڭ ءومىرى مەن شىعارماشىلىعىنا ارنالعان زەرتتەۋلەر، بيبليوگرافيالىق دەرەكتەر، جاس عالىمداردىڭ ىزدەنىستەرى جانە حالىقارالىق عىلىمي كونفەرەنتسيا ماتەريالدارى ەنگىزىلگەن.
ۇيىمداستىرۋشىلاردىڭ ايتۋىنشا، عىلىمي جيىن ۇلتتىق جازبا مۇرانى جان-جاقتى زەردەلەۋگە، قولجازباتانۋ سالاسىنداعى تاجىريبە الماسۋعا جانە قۇربانعالي حاليدۇلى مۇراسىن عىلىمي اينالىمعا كەڭىنەن ەنگىزۋگە مۇمكىندىك بەردى.
