جامبىل اۋدانىندا جان جادىراتار جۇمىس كوپ

1032
Adyrna.kz Telegram

جامبىل وبلىسىنىڭ اكىمى نۇرجان نۇرجىگىتوۆتىڭ جامبىل اۋدانىنداعى جۇمىس ساپارى بايتەرەك اۋىلىنداعى «ەگىزباي» شارۋا قوجالىعىنىڭ ەگىس القابىنان باستالدى. ايماق باسشىسى شارۋاشىلىقتىڭ جايقالعان كارتوبىن كوردى.

قوجالىق جەتەكشىسى نۇرلان ەگىزباەۆتىڭ ايتۋىنشا، شارۋاشىلىق پيازدى - 45, كارتوپتى - 75, ءسəبىزدى - 6 گەكتار القاپقا ورنالاستىرعان. بۇدان بولەك، شارۋاشىلىقتىڭ 30 گەكتار بيدايى، 10 گەكتار القاپقا ورنالاستىرىلعان جوڭىشقاسى بار، مال ازىعىن دا وسى القاپتاردان دايىنداۋدا. بۇل داقىلداردى سەۋىپ جينايتىن تەحنيكاسىن قوجالىق سايلاپ تا قويعان.

- كارتوپ قازۋ جۇمىستارىن جاڭا باستادىق. كۇنىنە 2-3 گەكتار القاپتىڭ ءونىمىن جينايمىز. ونىڭ əر گەكتارىنان ورتا ەسەپپەن 300-350 تسەنتنەردەن ءونىم جيناۋ جوسپارلانۋدا. القاپقا 240 توننا كارتوپتى قاراعاندى وبلىسىنان الىپ، وتىرعىزدىق. بۇگىندە القاپتا كارتوپتىڭ گالانديالىق "بۋررەن" جəنە "پيكاسسو" سۇرىپتارى وسىرىلۋدە. جيىن-تەرىنگە 40-50 ماۋسىمدىق جۇمىشى تارتىلعان،- دەيدى ول.

شارۋاشىلىق كارتوپتى 15-20 كۇندە جيناپ الۋدى كوزدەۋدە. ءونىمىن تاراز قالاسى مەن الماتى، تۇركىستان وبلىستارىنا وتكەرۋدە.

- وبلىستا əلەۋمەتتىك دۇكەندەر جۇمىس ىستەيدى. ءوز ونىمىمىزبەن الدىمەن سول دۇكەندەردى قامتۋ كەرەك. سودان كەيىن وسى ءونىمدى بارلىق دۇكەندەرگە قويىپ، وبلىستاعى باعانى تۇراقتاندىرۋ جاعىنا مəن بەرگەن ءجون. وڭىردە كارتوپ تۇقىمىن قايتا جولعا قويۋدى جوسپارلاۋدامىز. بۇل مəلەلەنى جۋالى اۋىلىنداعى ءبىر شارۋاشىلىققا ەنگىزدىك. ەندى تۇقىممەن قامتۋ مəسەلەسىن شەشسەك، ونى شارۋا قوجالىقتارى وزگە وبلىستاردان تاسىپ əۋرە بولمايتىن بولادى، - دەدى نۇرجان نۇرجىگىتوۆ.

اۋدان əكىمى ەرلان قىدىرالىۇلى اۋداندا بيىل سۋدان تاپشىلىق بولماعانىن ايتىپ، بارلىق شارۋاشىلىقتار اعىن سۋمەن تولىق قامتىلعانىن جەتكىزدى.

ايماق باسشىسى ايشا ءبيبى اۋىلىنداعى «Super Pharm» جشس-دە بولدى. ءبىر رەتتىك مەديتسينالىق بۇيىمدار شىعارۋمەن اينالىساتىن زاۋىت تىڭ جوبالاردى قولعا العان. سەرىكتەستىك ديرەكتورى قايرات قايمولداەۆتىڭ ايتۋىنشا، زاۋىتتا بۇعان دەيىن مەديتسينالىق حالات، بينت، ءبىر جولعى باحيلدەر، بەتپەردەلەر مەن توسەنىشتەر شىعارىلىپ كەلسە، ەندى زاۋىت اۋماعىندا قۇرىلىسقا ءتوزىمدى تىگىندى ەمەس ماتەريالدار شىعاراتىن تسەحتى ىسكە قوسۋ جوسپارلانۋدا.

- ءوندىرىستىڭ جىلدىق قۋاتى 300 ميلليون دانادان استام مەديتسينالىق بۇيىمدار شىعارۋ. ءونىمدى وتكىزۋدە مəسەلە جوق. قۇرىلىس الاڭىن كەڭەيتىپ، تىگىندى ەمەس ماتەريالدار شىعارۋدى قولعا الۋعا نيەتتىمىز. ول زاۋىتقا قاجەتتى قۇرال-جابدىقتاردى əكەلىپ قويدىق. تەك قىتايدان كەلەتىن مامانداردى كۇتىپ وتىرمىز. شەتەلدىك مامانداردىڭ ەلگە كىرۋىنە مۇمكىندىك بولماي جاتىر. سىرتقى ىستەر مينيسترلىگىنە دە ءوتىنىش بەرگەنبىز. بىراق مامانداردى كىرگىزە الماي، ءوندىرىستى باستاي الماۋدامىز. زاۋىت دايىن، ماماندار كەلىپ قۇرال-جابدىعىن ورنالاستىرىپ بەرسە ءۇش ايدا ءونىم شىعارامىز. ايىنا 700 توننا تىگىندى ەمەس ماتەريال شىعاراتىن مۇمكىندىگىمىز بار. شيكىزاتتى پاۆلاداردان جەتكىزەمىز. ولار ءبىزدىڭ اشىلىپ، جۇمىس ىستەۋىمىزدى عانا كۇتىپ وتىر،- دەدى سەرىكتەستىك ديرەكتورى.

ايماق باسشىسى بۇل مəسەلەنى رەسپۋبليكاعا شىعىپ، ءتيىستى مينيسترلىكتەرگە سۇرانىس جاساپ شەشىپ بەرۋگە تىرىساتىنىن جەتكىزدى.

سونداي-اق وبلىس əكىمى وسى وكرۋگتە تۇرعىزىلىپ جاتقان 300 ورىندىق ورتا مەكتەپتىڭ قۇرىلىس جۇمىسىمەن تانىستى. ونىڭ قۇرىلىسىن «تاراز ستروي -2004» جشس جۇرگىزۋدە. سەرىكتەستىك ديرەكتورى مەيىربەك ءجۇنىسوۆتىڭ ايتۋىنشا، نىسان قۇرىلىسى 90 پايىزعا اياقتالعان. مەردىگەر ونى جوسپارعا سəيكەس تاپسىرامىز دەپ وتىر. ايماق باسشىسى مەكتەپتى 1 قىركۇيەككە دەيىن تاپسىرۋدى شەگەلەپ تاپسىردى. سونىمەن قاتار وسى اۋماقتاعى جاڭا تۇرعىن القاپتا اتقارىلىپ جاتقان جۇمىس بارىسىن كوردى. مۇندا كەزەكتە تۇرعان تۇرعىندارعا 382 جەر تەلىمىن بەرۋ كوزدەلگەن. جاڭا تۇرعىن القاپتىڭ ينفراقۇرىلىمى اياقتالۋعا جاقىن.

ايماق باسشىسى جەر تەلىمى بەرىلگەن سوڭ ول جەرگە ءۇش جىلدىڭ ىشىندە ءۇي سالىنۋى كەرەكتىگىن تۇرعىندارعا ەسكەرتۋدى تاپسىردى. جاڭا تۇرعىن القاپتان جەر تەلىمىن ۇلەستىرۋ بيىل شەشىمىن تاپپاق.

كەلەسى كەزەكتە وبلىس əكىمى قانت قىزىلشاسى القابىن كوردى. "اقكول" شارۋا قوجالىعى 40 گەكتار القاپقا ءتəتتى ءتۇبىردىڭ "اكاتسيا" مەن "ۆيوريكا" سۇرىپتارىن ورنالاستىرعان. شارۋا ونىڭ ءəربىر گەكتارىنان 450-600 تسەنتنەردەن ءونىم الۋدى جوسپارلاۋدا. شارۋاشىلىق جەتەكشىسى التىنبەك كەرىمقۇلوۆ بالتامىر جينايتىن كومباين الۋعا مۇمكىندىگى جوقتىعىن ايتىپ، قانت زاۋىتى كومباين الىپ شارۋالارعا ءونىم جيناردا كومەك كورسەتسە دەگەن ءوتىنىشىن جەتكىزدى. بۇدان بولەك، قوجالىقتىڭ 300 گەكتار پيازى دا جايقالىپ تۇر.

قوس القاپتا بولعان وبلىس əكىمى نۇرجان نۇرجىگىتوۆ: "بيىل قانت قىزىلشاسىنا بەرىلەتىن باعا 30 تەڭگە بولدى. تۇقىم مەن تىڭايتقىش 50 پايىز جەڭىلدىكپەن سۋبسيديالانۋدا. ەندى بىرنەشە شارۋا قوجالىعى بىرىگىپ قانت قىلشاسىن جينايتىن كومباين ساتىپ الۋدى ۇيلەستىرگەن دۇرىس. سول ءۇشىن كووپەراتيۆكە بىرىگىپ جۇمىس جاساعان ءتيىمدى. بۇل ماقساتقا وبلىستىق بيۋدجەتتەن 758 ميلليون تەڭگە ءبولىپ، "تاراز" əلەۋمەتتىك-كəسىپكەرلىك كورپوراتسياسى" اق-نا قارجى ءبولىپ وتىرمىز. وسى مۇمكىندىكتى پايدالانۋعا اسىعىڭىزدار. جاڭا تەحنيكا الساڭىزدار ونىڭ 50 پايىزى əكىمدىك تاراپىنان سۋبسيديالاناتىن بولادى، - دەدى.

كەلەسى كەزەكتە ءايشابيبى اۋىلدىق وكرۋگىنە قاراستى قىزىلتاڭ اۋىلى قاسىندا 110 گەكتارعا ورنالاسقان 50 مەگاۆاتتىق "ايشا كۇن شۋاق" ەلەكتر ستانساسىنىڭ جۇمىسىمەن تانىستى. ستانسا باسشىسى جاندوس رايبەكۇلىنىڭ ايتۋىنشا، نىسان جۇمىسىن ناۋرىز ايىندا باستاعان. جىلدىق قۋاتى ساعاتىنا 92 ميلليون كيلوۆاتتى قۇرايدى. جوبانىڭ ينۆەستورى "Unigreen Energy" جشس، ال جوبا وپەراتورى "اەس اsa" جشس. جوبانىڭ جالپى قۇنى 20,8 ميلليارد تەڭگە. سەرىكتەستىك باسشىسى الداعى ۋاقىتتا تاعى 20 مەگاۆاتتىق كۇن ەلەكتر ستانساسىن سالماق نيەتى بارىن ايتتى. ونىڭ مەگاۆاتىن كەزەڭ كەزەڭمەن كوبەيتۋ ءۇشىن 300 گەكتار جەر تەلىمىن العانىن ايتتى.

ايماق باسشىسى تابيعات كوزىنەن ەلەكتر ەنەرگياسىن وندىرۋدە ءبىزدىڭ وبلىس الدىڭعى ورىندا ەكەنىن، رەسپۋبليكاداعى ەنەرگيا ءوندىرىسىنىڭ 21 پايىزىن جامبىل وبلىسى قۇراپ وتىرعانىن ايتىپ، بۇل شارۋانىڭ وڭىردە دامۋىنا قولداۋ كورسەتۋگە دايىن ەكەنىن جەتكىزدى.

كەلەسى كەزەكتە ايماق باسشىسى Əۋليە باستاۋ باسىنداعى كەلۋشىلەرگە ىڭعايلى بولۋى ءۇشىن جاسالىپ جاتقان قۇرىلىس جۇمىسىن كوردى. وندا قولعا الىنعان جوبامەن اۋدان əكىمى ەرلان قىدىرالىۇلى تانىستىردى.

بۇدان كەيىن اسا اۋىلىنداعى اۋداندىق ورتالىق اۋرۋحانا عيماراتىنىڭ جاعدايىمەن اۋرۋحانانىڭ باس دəرىگەرى التاي ساۋرۋكوۆ تانىستىرىپ، عيماراتقا كۇردەلى جوندەۋ كەرەكتىگىن ايتىپ، قارجى ءبولۋدى سۇرادى. بۇدان بولەك، قاراكەمەر اۋىلىنداعى 25 كەلۋشىگە ارنالعان دəرىگەرلىك امبۋلاتورياسىنىڭ قۇرىلىس جۇمىسىنىڭ بارىسىن كوردى. مەردىگەر نىساندى ءبىر ايدا تاپسىرماق نيەتتە. ونداعى قۇرىلىس ساپاسىنا جاقسى باعا بەرگەن وبلىس əكىمى نىساندى مەرزىمىندە تاپسىرۋدى مىندەتتەدى.

اۋدانعا جاساعان جۇمىس ساپارى سوڭىندا وبلىس əكىمى نۇرجان نۇرجىگىتوۆ اۋدان əكىمدىگى اپپاراتىنىڭ ءمəجىلىس زالىندا اۋدان اكتيۆىمەن كەزدەستى. كەزدەسۋدە اۋدان əكىمى ەرلان قىدىرالىۇلىنىڭ ەسەبى تىڭدالدى. اكتيۆتە ارىز-شاعىمدى قاراۋ، اۋىز سۋ تارتۋ، تۇرعىنداردى كوگىلدىر وتىنمەن قامتۋ، شالعاي ەلدىمەكەندەرگە ينتەرنەت جەلىسىن تارتۋ جəنە باسقا دا قاداۋ-قاداۋ مəسەلەلەر قارالىپ، تالقىلاندى.

جيىن قورىتىندىسىندا ايماق باسشىسى نۇرجان نۇرجىگىتوۆ اۋدان əكىمى ەرلان قىدىرالىۇلى مەن ونىڭ ورىنباسارلارىنا ءتيىستى تاپسىرما بەرىپ، باسقارما اراسىندا كەرى بايلانىستى ورناتىپ، جۇمىستى جانداندىرۋدى تاپسىردى.

 

پىكىرلەر