جامبىل وبلىسىنىڭ 2025 جىلعا دەيىنگى دامۋ جوسپارىنىڭ جاڭا سيپاتتاعى جوباسى ازىرلەندى. بۇل تۋرالى وبلىس اكىمى نۇرجان نۇرجىگىتوۆ بۇقارالىق اقپارات قۇرالدارى وكىلدەرىمەن وتكەن كەزدەسۋدە باسا ايتتى.
بريفينگتە ايماق باسشىسى الدىمەن اعىمداعى جىلدىڭ 6 ايىنداعى نەگىزگى دامۋ كورسەتكىشتەرىنە قىسقاشا توقتالىپ، الداعى جوسپارلار تۋرالى كەڭىرەك باياندادى.
ءبىرىنشى جارتىجىلدىقتا وبلىستىڭ ەكونوميكالىق ءوسىمى 104,1 پايىزدى قۇراسا، ونەركاسىپ (108,1%), اۋىل شارۋاشىلىعى (102%), قۇرىلىس (105,7%), تۇرعىن ءۇي قۇرىلىسى (103,7%), ساۋدا (105,3%), بايلانىس (101,9%) سالالارىندا وڭ ديناميكا ساقتالعان. ەسەپتى كەزەڭدە وڭىرگە 155,8 ملرد. تەڭگە ينۆەستيتسيا تارتىلعان.
باستى تالاپ – حالىقتىڭ تابىسىن ارتتىرۋ، تۇرمىسىن جاقسارتۋ، قوردالانعان ماسەلەلەرىن شەشۋ دەگەن نۇرجان نۇرجىگىتوۆ مەملەكەت باسشىسىنىڭ تاپسىرماسىمەن ازىرلەنگەن «حالىقتىڭ تابىسىن ارتتىرۋ» باعدارلاماسىن جەمىستى جۇزەگە اسىرۋعا ايرىقشا دەن قويىلىپ وتىرعانىن اتاپ ءوتتى.
ايماق باسشىسى 2025 جىلعا دەيىنگى جامبىل وبلىسىنىڭ دامۋ جوسپارىنىڭ جاڭا سيپاتتاعى جوباسى ازىرلەنگەنىن جەتكىزدى.
- ماقساتىمىز – اۋىل شارۋاشىلىعى جانە ونەركاسىپتى دامىتا وتىرىپ، اۋىل تۇرعىندارى ءۇشىن تۇراقتى جۇمىس ورىندارىن قۇرۋ، تۇرمىس جاعدايىن جاقسارتۋ، تابىسىن ارتتىرۋ.
جوسپار حالىقتىڭ الەۋمەتتىك يگىلىكتەر مەن مەملەكەتتىك قىزمەتتەرگە قولجەتىمدىلىگىن قامتاماسىز ەتۋ جانە جالپى جايلى ءومىر ءسۇرۋ ورتاسىن قالىپتاستىرۋ بويىنشا بىرقاتار مىندەتتەردى شەشۋدى كوزدەيدى.
دامۋ جوسپارى 3 نەگىزگى بولىمنەن تۇرادى. ولار: ينۆەستيتسيالىق جوبالار، بيۋدجەتتىك ينۆەستيتسيالىق جوبالار، جۇمىسپەن قامتۋ.
العاشقى ءبولىم ەكى ءىرى – اۋىل شارۋاشىلىعى جانە ونەركاسىپ سالالارىندا 2025 جىلعا دەيىن قۇنى 2 ترلن. تەڭگەنى قۇرايتىن 1154 جوبانى ىسكە اسىرا وتىرىپ، 14,4 مىڭ جۇمىس ورنىن قۇرۋعا باعىتتالدى،-دەدى نۇرجان نۇرجىگىتوۆ.
اتالعان دامۋ جوسپارى اياسىندا اگروونەركاسىپ كەشەنى سالاسىندا جالپى قۇنى 73,5 ملرد. تەڭگەنى قۇرايتىن 711 جوبانى ىسكە اسىرىپ، 4,3 مىڭ جاڭا جۇمىس ورىندارىن اشۋ كوزدەلۋدە.
جىل قورىتىندىسىمەن جالپى سالادا 110 جوبا ىسكە قوسىلىپ، 400-گە جۋىق ادام تۇراقتى جۇمىسقا ورنالاسپاق.
اگروونەركاسىپ كەشەنىن دامىتۋ 10 باعىتتا جۇزەگە اسادى دەپ كۇتىلۋدە.
وبلىس اكىمىنىڭ ايتۋىنشا، اۋىلدىق ەلدى مەكەندەردە كووپەراتسيا جۇيەسىن دامىتۋ ماقساتىندا اۋدان اكىمدەرى ەلدى مەكەننىڭ اۋىل شارۋاشىلىعى سالاسى الەۋەتىن تۇبەگەيلى زەردەلەپ، ءار اۋىلدىق وكرۋگتىڭ ءونىم ءوندىرۋ، قايتا وڭدەۋ جانە ءونىمدى وتكەرۋدە كلاستەرلىك ءتاسىلدى قولدانىپ، جوسپارىن ازىرلەدى.
بۇل ءتاسىلدى قولدانۋ ءۇشىن 10 اۋداننان ءبىر اۋىلدىق وكرۋگتەن، تاراز قالاسىنان ءبىر ماسسيۆ تاڭداپ الىندى. اتالعان جوبالار كلاستەرلىك باعىتتا «ءبىر اۋىلدا - ءبىر جوبا» قاعيداتىمەن جۇزەگە اسىرىلاتىن بولادى.
